ދުންފަތުގެ ޖެނެރޭޝަން ބޭން އާ ގުޅޭގޮތުން ޑަބްލިއުއެޗްއޯ އާއި ޔުނިސެފް އާ މަޝްވަރާކޮށްފި

ދުންފަތުން ރައްކާތެރި ޖީލެއް ބިނާކުރުމަށް "ޖެނެރޭޝަން ބޭން" ތައާރަފުކުރަން ކުރަމުން އަންނަ މަސައްކަތުގެ ތެރެއިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާއި ޔުނައިޓެޑް ނޭޝަންސް އިންޓަނޭޝަނަލް ޗިލްޑްރެންސް އެމަޖެންސީ ފަންޑް (ޔުނިސެފް) އާއެކު މަޝްވަރާކޮށްފި އެވެ.
ޒުވާން ޖީލު ދުންފަތާ ދުރުކުރުމަށް އެކަށައަޅުއްވާފައިވާ ޖެނެރޭޝަން ބޭން ކަނޑައަޅެއްވުމަށް ރައީސް ޑރ. މުހައްމަދު މުއިއްޒު އިއުލާނުކުރައްވާފައި ވަނީ ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ޕޮޑްކާސްޓުގެ ފުރަތަމަ އެޕިސޯޑުގައި މިދިޔަ މަހުގެ 27 ވަނަ ދުވަހު އެވެ.
ހެލްތު މިނިސްޓްރީން ބުނީ ޖެނެރޭޝަން ބޭން ތައާރަފުކުރުމަށް ކަމާ ގުޅުންހުރި ފަރާތްތަކުގެ ހިޔާލު ހޯދުމުގެ މަސައްކަތް ސަރުކާރުން ކުރަމުންދާ ކަމަށެވެ.
އެ މަސައްކަތުގެ ތެރެއިން ހެލްތު މިނިސްޓަރު އަބްދުﷲ ނާޒިމް އިބްރާހީމް ޑަބްލިއުއެޗްއޯ އާއި ޔުނިސެފްގެ އޮފިޝަލުންނާ ބައްދަލުކުރައްވާ ކަމާ ގުޅުންހުރި މަޝްވަރާތައް ކުރައްވާފައިވާ ކަމަށް މިނިސްޓްރީން ބުންޏެވެ.
ހެލްތު މިނިސްޓްރީން ބުނި ގޮތުގައި ޖެނެރޭޝަން ބޭން ކާމިޔާބުކަމާ އެކު ތަންފީޒުކުރުމުގައި ސަމާލުކަން ދޭން ޖެހޭ ކަންކަމާ ގުޅޭގޮތުން އެ އިދާރާތަކުން ލަފާދެއްވާފައިވާ ކަމުގަ އެވެ.
https://twitter.com/MoHmv/status/1909249507600015675
ޖެނެރޭޝަން ބޭން ކަނޑައެޅުމުގައި ރައީސް ވަނީ ތިން ގޮތެއް ހުށަހަޅުއްވާފަ އެވެ. އެމަނިކުފާނު ހިއްސާކުރެއްވި ގޮތްތަކުގެ ތެރެއިން ގޮތެއް އިހުތިޔާރުކުރުމަށް އާންމުންގެ ހިޔާލަށް މިދިޔަ ބުރާސްފަތި ދުވަހު ވަނީ ހުޅުވާލާފަ އެވެ.
ސޯޝަލްމީޑިއާގައި ޕޯލްއަށް ހުށަހެޅުއްވި ތިން ގޮތަކީ:
- 2007 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.