ބަންދު އަމުރު ބާތިލުކުރަން ޝަމްއާން ހުށަހެޅި މައްސަލަ ކުރިއަށް ގެންދިއުމަށް ހައި ކޯޓުން ނިންމައިފި
މޯލްޑިވްސް އިމިގްރޭޝަނުގެ ބަންދަށް ގެންދިޔަ ބިދޭސީ މަސައްކަތްތެރިއެއްގެ އަތުން ނާޖާއިޒު މަންފާތަކެއް ނެގި ކަމަށް ބުނާ މައްސަލައެއްގައި ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ބަންދުކުރި މައްސަލަ ބާތިލުކޮށްދިނުމަށް އެދި ހައި ކޯޓަށް ހުށަހެޅި މައްސަލަ ބަލައިނުގަތުމަށް ކޯޓުގެ ރަޖިސްޓްރާ ނިންމި ނިންމުން ބާތިލުކޮށް، މައްސަލަ ކުރިއަށް ގެންދިއުމަށް އެ ކޯޓުގެ ފަނޑިޔާރުންގެ މަޖިލިހުން ނިންމައިފި އެވެ.
ބިދޭސީ މަސައްކަތްތެރިންގެ އަތުން ފައިސާ ނަގާކަމުގެ ތުހުމަތުގައި ޝަމްއާން އިމިގްރޭޝަނުގެ ކޮންޓްރޯލަރުގެ މަގާމުން ވަކިކޮށްފައި ވަނީ މިދިޔަ މަހުގެ 20 ވަނަ ދުވަހުގެ ރެ އެވެ. މައްސަލައިގެ ތަހުގީގަށް ފުލުހަށް ހާޒިރު ކުރުމަށް ފަހު އޭނާ ހައްޔަރުކުރީ ޖެހިގެން އައި ދުވަހުގެ ރެ އެވެ. ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހަށް ޝަމްއާން ބަންދުކުރުމަށް އަމުރުކުރި އެވެ.
ބަންދުގެ މުއްދަތު ހަމަވާތީ ކޯޓަށް ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް މިދިޔަ އާދިއްތަ ދުވަހު ކްރިމިނަލް ކޯޓުން ވަނީ އަމުރުކޮށްފަ އެވެ.
އޭނާ ބަންދުކުރަން ނެރުނު އަމުރު ޝަމްއާނުގެ ފަރާތުން އިސްތިއުނާފުކުރީ މިދިޔަ މަހުގެ 27 ވަނަ ދުވަހު އެވެ. އެހެންނަމަވެސް މައްސަލަ ހައި ކޯޓުން ބަލައިނުގަތުމަށް އެ ކޯޓުގެ ރަޖިސްޓްރާ ވަނީ ނިންމާފަ އެވެ.
ޝަމްއާނުގެ ފަރާތުން ބަންދު އަމުރު ބާތިލުކޮށްދިނުމަށް އެދި ހުށަހެޅި މައްސަލައިގައި ބުނެފައި ވަނީ ކްރިމިނަލް ކޯޓުގެ ފަނޑިޔާރު، އޭނާގެ މައްޗަށް ބަންދުގެ އަމުރު ނެރުމުގައި ގޯސް ހަދާފައިވާ ކަމަށެވެ. އެ އަމުރު ނެރުމުގައި ހެކިތަކަށް ރިއާޔަތް ކުރަން ޖެހޭ މިންވަރަށް އެކަން ކޮށްފައި ނުވާ ކަމަށެވެ.
މައްސަލަ ކޯޓަށް ބަލައިނުގަންނަން މާޗް މަހުގެ 27 ވަނަ ދުވަހު ނިންމި ނިންމުމުގައި ހައި ކޯޓުގެ ރަޖިސްޓްރާ ފާހަގަކުރީ މައްސަލަ ބަލާ ފަނޑިޔާރު ގާނޫނީ ގޮތުން ގޯހެއް ހަދާފައިވާ ކަމަށް ނުވަތަ ރިއާޔަތްކުރަން ޖެހޭ މިންވަރަށް ހެކިތަކަށް ރިއާޔަތްކޮށްފައި ނުވާ ކަމަށް ނުވަތަ އިސްތިއުނާފުކުރާ ފަރާތުގެ ހައްގުތައް ގެއްލި، އިންސާފަށް ހުރަސް އެޅިފައިވާ ކަމަށް ހަމައެކަނި ބުނާ ބުނުމަކުން އެ މައްސަލައެއް ހައި ކޯޓުގައި އިސްތިއުނާފު ކުރުމަށް ގާނޫނު ހުއްދަކުރާ މިންގަނޑަށް ވާސިލުނުވެވޭނެ ކަމަށެވެ.
އެފަދައިން ކަންކަން ހުރި ކަމަށް ބުނާ ނަމަ، އެކަމުގައި އުފެދޭ ގާނޫނީ ބަހުސަކީ ކޮބައިކަން އިސްތިއުނާފުކުރާ ފަރާތުން ސާފުކޮށް ބަޔާންކޮށްދޭން ޖެހޭއިރު، އިސްތިއުނާފުކުރަން ހުށަހެޅި މައްސަލައިގައި އެ ކަންކަން ސާފުކޮށްދީފައި ނުވާ ކަމަށެވެ.
އަދި ކްރިމިނަލް ކޯޓުގެ ފަނޑިޔާރަށް ބަންދުގެ އަމުރު ނެރުމަށް ލިބިފައިވާ އިހުތިޔާރު ބޭނުންކުރި ގޮތުގެ މައްޗަށް އިސްތިއުނާފީ ކޯޓަކުން ވަންނަން ޖެހޭ ހާލަތެއް ޝަމްއާނުގެ ފަރާތުން ހުށަހަޅާފައިވާ މައްސަލައިގައި ބަޔާންކޮށްދެވިފައި ނުވާ ކަމަށް ވެސް ހައި ކޯޓުގެ ރަޖިސްޓްރާގެ ނިންމުމުގައިވެ އެވެ.
ރަޖިސްޓްރާގެ ނިންމުން މުރާޖައާކޮށްދޭން ޝަމްއާނުގެ ފަރާތުން މިދިޔަ މަހުގެ 29 ވަނަ ދުވަހު ހުށަހެޅި އެވެ. އެ މައްސަލަ ބެއްލެވި ތިން ފަނޑިޔާރުންގެ ބެންޗުން ނިންމާފައި ވަނީ ޝަމްއާނުގެ ފަރާތުން އިސްތިއުނާފު މަރުހަލާގެ ބޭނުމަށް ހުށަހަޅާފައިވާ ނުކުތާތަކުގައި ގާނޫނީ ބަހުސެއް އޮތް ކަމަށް ބެލެވޭތީ ރަޖިސްޓްރާގެ ނިންމުން ރަނގަޅު ނޫން ކަމަށެވެ. ފަނޑިޔާރުންގެ އިއްތިފާގުން އިއްޔެ ނިންމި އެ ނިންމުމާ އެކު، މައްސަލައިގެ ޝަރީއަތް ކޯޓުގައި ކުރިއަށްދާނެ އެވެ.
މައްސަލަ އާ ގުޅޭގޮތުން މީގެކުރިން ފުލުހުން ބުނެފައި ވަނީ ބިދޭސީން ދިރިއުޅޭ ގެއެއް އިމިގްރޭޝަނުގެ ބައެއް އޮފިސަރުން މަގާމުގެ ބޭނުން ނަހަމަ ގޮތުގައި ބޭނުންކޮށްގެން ރެއިޑްކޮށްފައިވާ ކަމަށެވެ.
އެހެން ފުލުހުން ބުނެފައިވާ ސަބަބަކީ ރެއިޑްކުރި އިމިގްރޭޝަނުގެ އޮފިސަރުންނަކީ ގަވާއިދާ ހިލާފަށް އުޅޭ ބިދޭސީން ހޯދުމުގެ ޒިންމާ ހަވާލުކުރި ޓާސްކް ފޯސް އަދި ރިސްކް މެނޭޖްމަންޓުގައި ނުވެސް ހިމެނޭ މުވައްޒަފުންތަކަކަށް ވާތީ އެވެ.
އެ ރެއިޑުގައި އިމިގްރޭޝަނުގެ ޑިޓެންޝަނަށް ގެންދިޔަ ބިދޭސީއަކު 530،000 ރުފިޔާ ދިނުމުން ދޫކޮށްލީ ޝަމްއާނުގެ އަމުރަކަށް ކަމަށް ފުލުހުން ތުހުމަތުކޮށްފައިވެ އެވެ. ދޫކޮށްލުމަށް ފަހު، އޮޕަރޭޝަން ހިންގި އޮފިސަރުން މަގުމަތިން ބިދޭސީ މީހާ އާ ބައްދަލުކޮށް އެ ފައިސާ ޝަމްއާނުގެ ގެއަށް ގެންދިޔަ ކަމަށް ވެސް ތުހުމަތުކުރެ އެވެ.
މައްސަލަ އާ ގުޅިގެން ފުލުހުން ވަނީ ޝަމްއާނު ދިރިއުޅޭ ގެ ބަލައި ފާސްކޮށްފަ އެވެ. އެ ގެއިން ގިނަ އަދަދެއްގެ ފައިސާގެ އިތުރުން އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންދިޔަ އެވެ.
މައްސަލަ އާ ގުޅިގެން ޝަމްއާނު ހިމެނޭހެން ފަސް މީހަކު ވަނީ ފުލުހުންގެ ހައްޔަރަށް ގެންގޮސްފަ އެވެ. އެ އޮފިސަރުންނަކީ އިމިގްރޭޝަނުގެ ކޮންޓްރޯލާ ޖެނެރަލްގެ ބިއުރޯގައި މަސައްކަތް ކުރާ އޮފިސަރުންކަން ވަނީ އެނގިފަ އެވެ.
އެ މައްސަލައިގައި ޝަމްއާނުގެ އަނބިކަނބަލުން ހިދްފާ ފާއިޒުގެ ފޯނު ފުލުހުން ހިފަހައްޓައި، ދެ މީހަކު ފުރުން މަނާކޮށްފައިވެ އެވެ.
Ads by STO
