ފަސް އަތޮޅުގައި ޓޫރިޒަމަށް އިންވެސްޓްކުރަން ޝައުގުވެރިކުރުވަން ލުއިތަކެއް ދެނީ

ފަސް އަތޮޅުގައި ޓޫރިޒަމްއަށް އިންވެސްޓްކުރަން ޝައުގުވެރިކަން އިތުރުކުރުމަށް ލުއިތަކެއް ދޭން ނިންމައިފި އެވެ.

މިއަދު ކުރިއަށްދާ ނޫސްވެރިންގެ ބައްދަލުވުމުގައި ރައީސް ޑރ. މުހައްމަދު މުއިއްޒު ވިދާޅުވީ ފަތުރުވެރިކަން އެންމެ ކުޑަކޮށް އޮތް 5 އަތޮޅަށް ފަތުރިވެރިން އަންނަ މިންވަރު އިތުރުކުރުމުގެ ގޮތުން އިންވެސްޓަރުން ޝައުގުވެރިވާނެ ގޮތަށް ހަދަން ގަވައިދަށް ބަދަލު ގެނައުމުގެ މަސައްކަތް ކުރަމުންދާ ކަމަށެވެ.

އެ ފަސް އަތޮޅުގެ ގޮތުގައި ރައީސް ފާހަގަކުރެއްވީ ހއ. ހދ. ށ. ތ. ލ. އެވެ.

އެގޮތުން އެ 5 އަތޮޅަށް އެކަނި ހާއްސަ ލުއިތަކެއް ވަކި މުއްދަތެއް ދޭން ނިންމާފައިވާކަން ރައީސް މިއަދު އިއުލާންކުރެއްވި އެވެ.

<strong>"ލުއިކޮށްލަނީ މައިގަނޑު ގޮތެއްގައި ލޭންޑް އިކުޒިޝަން ކޯސްޓަށް ވަރަށް ބޮޑު ލުއިތަކެއް ދޭނަން. އަދި އެ ގެންނަ ބައެއް ތަކެތީގެ ޑިއުޓީތަކަަށް ހާއްސަ ލުއިތަކެއް ދޭނަން"</strong> ރައީސް ވިދާޅުވި އެވެ.

އެ ލުއިތަކާއެކު އެ ފަސް އަތޮޅުގައި ޓޫރިޒަމް ދާއިރާއަށް އިންވެސްޓްކުރާނެ ފަރާތްތައް ލިބިގެންދާނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށް އެމަނިކުފާނު ވިދާޅުވި އެވެ.

<strong>"މި މަހުގެ ތެރޭގައި އިއުލާންކުރަން މި ޓާގެޓްކުރަނީ. މީގެ ހުރިހާ ކަންކަން ނިމެމުން ދަނީ. މި މަހުގެ ތެރޭގައި އިންވެސްޓަރުންނަށް ފުރުސަތު ހުޅުވާލާނަން އިރާދަ ކުރެއްވިއްޔާ"</strong> ރައީސް މުއިއްޒު ވިދާޅުވި އެވެ.