ޑރ. ޝަހީމް މަސައްކަތް ފެއްޓެވުމުން އިތުރު ގިނަ ޢިލްމުވެރިން އިދިކޮޅު ކޯލިޝަނާ ގުޅިވަޑައިގަންނަވާނެ: އާދަމް ޝަރީފް އުމަރު
ކުރީގެ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސައީދު މަސައްކަތް ފެއްޓެވުމުން އިތުރު ގިނަ ޢިލްމުވެރިން އިދިކޮޅު ޕީޕީއެމް/ޕީއެންސީ އާއި ގުޅިވަޑައިގަންނަވާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު ޢުމަރު ވިދާޅުވެެއްޖެއެވެ.
"ރާއްޖޭގައި އިސްލާމީ ވަޙުދަތު ރައްކާތެރި ކުރުމަށް ޕީޕީއެމްޕީއެންސީ ކުރަމުންދާ މަސައްކަތްތައް އިތުރަށް ހަރުދަނާކޮށް، އެކްސްޓްރީމިސްމް (ހަރުކަށިފިކުރު) އާއި އެތީޒްމް (އެއްވެސް ދީނެއް ޤަބޫލު ނުކުރާ މީހުން) އާއި ދެކޮޅަށް ކުރަމުންދާ މަސައްކަތް ވަރުގަދަ ކުރާނަން އިން ޝާ ﷲ" ކުރީގެ ޑިފެންސް މިނިސްޓަރުކަން ވެސް ކުރައްވާފައިވާ އާދަމް ޝަރީފް ވިދާޅުވިއެވެ.
ޑރ. ޝަހީމް އިއްޔެ ވަނީ އަލުން ޕީޕީއެމް އާއި ގުޅި އެކޯލިޝަނުގެ އެޑްވައިޒަރުކަމާއި ވެސް ހަވާލުވެފައެވެ.
ޕީޕީއެމް/ޕީއެންސީ ކޯލިޝަނުން އެއޮފީހުގައި އިއްޔެ އެކަމަށްޓަކައި ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން ޑރ. ޝަހީމް ވިދާޅުވީ ރާއްޖެ ވަޑައިގެން ޤައުމީ ޚިދުމަތް ކުރުމުގެ ފުރުސަތު ލިބިވަޑައި ގެންނެވުމުން އުފާވެރިކަމުގެ އިހުސާސް ކުރެވޭ ކަމަށެވެ.
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ބަންދުގައި ހުންނެވުމުން އެކަމާއި ހިތާމަ ކުރައްވާކަން ފާހަގަ ކުރައްވާ ޑރ. ޝަހީމް ވަނީ ރައީސް ޔާމީން މިނިވަން ކުރެއްވުމަށް ވެސް ގޮވާލައްވާފައެވެ.
