މިފަހަރު ޕިން ފެނުނީ ގޮހޮރަކުންނެއް ނޫން، ސިކުނޑިން!
އާއްމުގޮތެއްގައި ޕިނެއް ނުވަތަ އެ ޒާތުގެ އެއްޗެއް ދިރުވާލެވިއްޖެ ނަމަ އެފަދަ އެއްޗެއް ފެންނަނީ ގޮހޮރުން، ނުވަތަ ފުއްޕާމެއިން ފަދަ ގުނަވަނަކުންނެވެ. ނަމަވެސް ޗައިނާ އަންހެނެއްގެ ސިކުނޑީގައި ދެ ޕިން ހަރުލާފައި އޮއްވާ ދާދި ފަހުން މިވަނީ ފެނިފައެވެ.
ޗައިނާ ގެ ހެނާން ޕްރޮވިންސްގެ ޒެންގްޒޫ ގައި ދިރިއުޅޭ ޒޫ ނަމަކަށް ކިޔާ އުމުރުން 29 އަހަރުގެ އަންހެނަކު ހޮސްޕިޓަލަށް ދިޔައީ ކާރު އެކްސިޑެންޓެއް ވުމުން ލިބުނު އަނިޔާއަށް ފަރުވާ ކުރުމަށެވެ. ފަރުވާގެ ކުރިން ބޮލުގެ އެތެރެއިން އެއްވެސް ގެއްލުމެއް ލިބިފައިވޭތޯ ބެލުމަށް ސީޓީ ސްކޭނެއް ހަދަން ޑޮކްޓަރުން އިރުޝާދު ދިނެވެ.
އޭނާގެ ބޮލުގެ ސީޓީ ސްކޭނެއް ކުރުމަށްފަހު ޑޮކްޓަރުންނަށް ވެސް ލިބުނީ ކުއްލި ސިހުމެކެވެ. ޒޫ ގެ ސިކުނޑީގެ ވަރަށް އަޑީގައި ދެ ޕިން ހަރުލާފައިވާ ކަމަށް އެސްކޭނުން ދެއްކިއެވެ.
އެކްސިޑެންޓުން ޒޫ ގެ ބޮލަށް އެއްވެސް ގެއްލުމެއް ލިބިފައިވާ ކަމަކަށް ނުދެއްކި ނަމަވެސް ގާތްގަނޑަކަށް 5 ސެންޓިމީޓަރުގެ ދިގުމިން ހުރި ދެ ޕިން ސިކުނޑިއަށް ހެރިފައިވާ ތަން ފެނުމުން އެންމެން ވެސް ބިރުގަނެ ހާސްވިއެވެ.
ޒޫ ބުނި ގޮތުގައި ބޮލުގެ އެއްވެސް ސާޖަރީއެއް އޭނާ ހަދާފައެއް ނުވެއެވެ. އަދި ބޮލަށް ތަދުވެގެން އުޅެން ޖެހުނު ކަމަށް ޒޫ ގެ ހަނދާނަށް ނާންނަ ކަމަށް ވެސް އޭނާ ބުންޏެވެ.
ޑޮކްޓަރުން ލަފާ ކޮށްފައިވަނީ ޒޫ ގެ ސިކުނޑިއަށް އެޕިންތައް ހެރިފައި އެވަނީ އޭނާ ކުޑައިރު ކަމަށެވެ. އެއީ ގަސްތުގައި މީހަކު ކުރި ކަމެއްކަން ނުވަތަ ނޫންކަން ބުނަން ނޭނގޭ ކަމަށް ވެސް ޑޮކްޓަރުން ބުންޏެވެ.
ޒޫ ގެ މައިންބަފައިންނަށް ވެސް އެއީ ކިހިނެއްވީ ކަމެއްކަން ހަނދާން ނުވާ ކަމަށް ރިޕޯޓުތަކުން ބުނެފައިވެއެވެ.
ޑޮކްޓަރުން މިދިޔަ އޯގަސްޓް 30 ވަނަ ދުވަހު ޒޫ ގެ ސިކުނޑިން އެޕިންތައް ނެގި ނަމަވެސް އޭނާ ވަނީ އެކަން ތަހުގީގު ކުރުމަށް ފުލުހަށް މައްސަލަ ޖައްސާފައެވެ.
