އުލުބައިދަން ގޮވާލި މައްސަލަ ތަހުގީގުކުރެވޭނެތޯ ޕީޖީގެ ލަފަޔަކަށް އެދިއްޖެ
ނޫސްވެރިން އުލު ބައިދަން ޖެހޭކަމަށް ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވި މައްސަލަ ތަހުގީގުކުރަން ފުލުހުން ގާނޫނީ ލަފަޔަކަށް އެދިއްޖެ އެވެ.
އެގޮތުން ނޫސްވެރިން ޖަލަށް ލުމުގެ ބަދަލުގައި ނޫސްވެރިންނަށް ދޭންވީ އަދަބަކީ ކުރީގެ ޒަމާންތަކުގައި ދެމުން އައި ވަރަށް އަނިޔާވެރި އަދަބެއް ކަމަށްވާ އުލު ބޭންދުން ކަމަށް ފަލާހު ވިދާޅުވި އެވެ.
ފަލާހު ދެއްކެވި ވާހަކަތައް ތަހުގީގުކޮށް އޭނާގެ މައްޗަށް ފިޔަވަޅު އަޅައިދިނުމަށް މޯލްޑިވްސް ޖާނަލިސްޓް އެސޯސިއޭޝަންއިން ފުލުހަށް މައްސަލަ ހުށަހެޅި އިރު އިއްޔެ ނޫސްވެރިން ވެސް ވަނީ ރައީސް ޑރ. މުހައްމަދު މުއިއްޒުގެ ކުރިމަތީގައި ވެސް އިހުތިޖާޖުކޮށް އެ މައްސަލަ ރައީސް ބައްލަވާނެތޯ އަހައި ސުވާލުކޮށްފަ އެވެ.
ފުލުހުން މިއަދު މީޑިއާތަކާ ހިއްސާކުރި މެސެޖުގައި ބުނީ އެ މައްސަަލަ ތަހުގީގުކުރަން ގާނޫނީ ލަފަޔަކަށް އެދި ޕްރޮސިކިއުޓާ ޖެނެރަލް އޮފީހަށް ހުށަހަޅާފައިވާ ކަމަށެވެ.
ފަލާހުގެ ވާހަކަތައް ކުށްވެރިކޮށް މޯލްޑިވްސް ޖާނަލިސްޓް އެސޯސިއޭޝަންއިން ފުލުހުންގެ ހިދުމަތަށް ހުށަހެޅި ސިޓީގައި ބުނީ ފަލާހު ދެއްކެވި ވާހަކަތަކަކީ އިސްލާމް ދީނާ ވެސް ހިލާފު ވާހަކައެއް ކަމަށާއި އެފަދަ ގޮތަކަށް އަނިޔާވެރިވުމަށް ގޮވާލުމަކީ ނޫސްވެރިން ބިރުވެރިކަމެއްގެ ތެރެއަށް ވައްޓާލައި މުޖުތަމައުގެ އަމާންކަން ގެއްލުވާލައި ހަމަނުޖެހުމުގެ ތެރެއަށް ގައުމު ވެއްޓިގެންދާނެ ފަދަ ވާހަކަތަކެއް ކަމަށެވެ.
