ސިފައިންގެ ހިދުމަތުން ބްރިގޭޑިއާ ނަޝީދު ރިޓަޔާކުރައްވައިފި
ބްރިގޭޑިއާ ޖެނެރަލް އަހުމަދު ނަޝީދު، ޝަރަފުވެރިކަމާ އެކު ސިފައިންގެ ހިދުމަތުން ޝަރަފުވެރިކަމާއެކު ރިޓަޔާ ކުރައްވައިފިއެވެ.
އޭނާ ސިފައިންގެ ހިދުމަތުން ރިޓަޔާކުރެެއްވީ 37 އަހަރުގެ އިހުލާސްތެރި އަސްކަރީ ހިދުމަތަށް ފަހު އެވެ.
ރޭ ބަންޑާރަކޮށީ އޮޑިޓޯރިއަމުގައި ބޭއްވި ހާއްސަ ރަސްމިއްޔާތެެއްގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑޮކްޓަރ މުހައްމަދު މުއިއްޒު ދެއްވާ ހާއްސަ ސިޓީފުޅު، ބްރިގޭޑިއާ ޖެނެރަލް ރިޓަޔާޑް ނަޝީދުއާ ވަނީ ހަވާލުވެސްކޮށްފަ އެވެ. އެ ސިޓީ ހަވާލުކޮށްދެއްވީ ޑިފެންސް މިނިސްޓަރު މުހައްމަދު ޣައްސާން މައުމޫން އެވެެ.
އޭގެ އިތުރުން އެމްއެންޑީއެފުން ދޭ ސިޓީފުޅާއި އިހުލާސްތެރި ހިދުމަތް ރަމްޒުކޮށްދޭ ޑެކަރޭޝަން ބޯޑާއި ރިޓަޔާމަންޓްގެ ރަމްޒީ ކާޑު ވެސް އޭނާއާ ވަނީ ހަވާލުކޮށްފަ އެވެ.
ބްރިގޭޑިއަރ ޖެނެރަލް ނަޝީދު ސިފައިންގެ ހިދުމަތުން ޝަރަފުވެރިކަމާ އެކު ރިޓަޔާކުރެއްވި އިރު ހުންނެވީ ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް (ޖޭ4/ޖޭ8)ގެ ޑައިރެކްޓާ ޖެނެރަލް އަދި އޯޑްނަންސް ސާވިސްގެ ކޮމާންޑަރުގެ މަގާމުގަ އެވެ.
ނަޝީދުގެ ދިގު އަސްކަރީ ހިދުމަތުގައި، ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް (ޖޭ4/ޖޭ8)ގެ ޑައިރެކްޓާ ޖެނެރަލްގެ މަގާމާއި، ޑައިރެކްޓަރޭޓް އޮފް ލޮޖިސްޓިކްސް (ޖޭ4) ގެ ޕްރިންސިޕަލް ޑައިރެކްޓަރުގެ މަގާމާއި އޯޑްނަންސް ސާވިސްގެ ކޮމާންޑަރުގެ މަގާމާއި ކޮމާންޑިން އޮފިސަރުގެ މަގާމު ފުރުއްވި އެވެ.
އޭގެ އިތުރުން ކުއާޓާ މާސްޓާ ސާވިސްގެ ކޮމާންޑިން އޮފިސަރުގެ މަގާމާއި ސްޕެޝަލް ޕްރޮޓެކްޝަން ގްރޫޕްގެ ކޮމާންޑިން އޮފިސަރުގެ މަގާމް، ޓްރާންސްޕޯޓް ސާވިސްގެ ކޮމާންޑިން އޮފިސަރުގެ މަގާމު، ސަޕްލައި ޔުނިޓުގެ ކޮމާންޑިން އޮފިސަރުގެ މަގާމާއި އޮފިސަރުގެ ކޮމާންޑިންގެ މަގާމާއި އޮފިސާ ކޮމާންޑިން އެހީތެރިޔާގެ މަގާމު ވެސް ވަނީ އަދާކުރައްވާފަ އެވެ.
