މި ކުރަނީ ބާރުގަދަ ކޮޅިގަނޑެއްގެ ވިއްސާރަ، މޫސުން އަލިވާނީ ހޯމައިން ފެށިގެން: މެޓް
މިހާރު ކުރަމުން މިދަނީ ބާރުގަދަ ކޮޅިގަނޑެއްގެ ވިއްސާރަކަމަށާއި މޫސުން އަލިވާން ފަށާނީ ހޯމަ ދުވަހުން ފެށިގެންކަމަށް މޫސުމާ ބެހޭ ޤައުމީ އިދާރާގެ މީޓްރޮލޮޖިސްޓް ހުސައިން ވަހީދު ވިދާޅުވެއްޖެއެވެ.
ޕީއެސްއެމް ނިއުސްއާ ވާހަކަ ދައްކަވަމުން ހުސައިން ވަހީދު ވިދާޅުވީ، ކުރިއަށް އޮތް 5 ދުވަހު ރާއްޖޭގެ އެކި ހިސާބަށް މޫސުން ގޯސްވާނެކަމަށާއި ކުރިއަށް އޮތް 24 ގަޑިއިރު ވެސް ރާއްޖޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭވެހޭނެ ކަމަށެވެ. އަދި މެދުރާއްޖެތެރޭގެ އަތޮޅުތަކަށް 13 މޭލާއި 23 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާއި އުތުރާއި ދެކުނުގެ އަތޮޅުތަކަށް 10 މޭލާއި 20 މޭލާ ދެމެދުގެ ބާރު މިނެއްގައި ވައިޖެހި، ވިލާގަނޑުގައި 40 މޭލަށް ވައި ގަދަވާނެކަމަށް ވަހީދު ވިދާޅުވިއެވެ.
"މިއީ ސްރީލަންކާ ކައިރީގައި އުފެދިފައިވާ ކޮޅިގަނޑެއް. މި ކޮޅިގަނޑުގައި ވަނީ ގިނަ އަދަދަކަށް ވިއްސާރަ ވިލާ އުފެދިފަ. ރާއްޖޭގެ އެހެން ސަރަހައްދުތަކަށް ވުރެ، މެދުރާއްޖެތެރެއަށް މޫސުން ގޯސްވާނެ. އެ ސަރަހައްދުގެ ކަނޑުތައް ވެސް ޢާންމުކޮށް ގަދަވާނެ. އުތުރާއި ދެކުނުގެ ކަނޑުތައް އާދައިގެ ވަރަކަށް ގަދަވާނެ." ހުސައިން ވަހީދު ވިދާޅުވިއެވެ.
ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށާއި ސަލާމަތީ ގޮތުން ރައްކާތެރިކަމުގެ ފިޔަވަޅުތަކަށް ސަމާލުކަން ދިނުމަށް ދިފާއީ ބާރުން އިލްތިމާސްކުރެއެވެ. އަދި ކަނޑު ދަތުރުފަތުރުތަކުގައި ކޮންމެހެން ކުރަންޖެހޭ ދަތުރެއް ފިޔަވައި، އެހެން ދަތުރުތައް ނުކުރުމަށް ވެސް ޤައުމީ ދިފާއީ ބާރުން އިލްތިމާސްކުރެއެވެ.
Ads by STO
