ކުޅިވަރުގެ ދާއިރާއިން ގުޅުން ބަދަހިކުރަން ތައިލެންޑާއެކު އެއްބަސްވުމެއްގައި ސޮއިކޮށްފި
ތައިލެންޑްގެ ކުޅިވަރު ވުޒާރާގައި ކުރިއަށްދިޔަ މި ރަސްމިއްޔާތުގައި ދިވެހި ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ ރާއްޖޭގެ ސްޕޯޓްސް މިނިސްޓަރު އަބްދުﷲ ރާފިއު އެވެ، އަދި ތައިލެންޑް ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ އެގައުމުގެ ފަތުރުވެރިކަމާއި ކުޅިވަރާއި ބެހޭ ވަޒީރު ޕަތުޕޮންގު ޕޮންގުސަކުލްއެވެ.
ރާއްޖެއާއި ތައިލެންޑާއި ދެމެދު ވި އެއްބަސްވުމުގެ ދަށުން ދެ ގައުމުގެ ގުޅުން ބަދަހިކުރުމާއި ކުޅިވަރުގެ ދާއިރާއިން އެއްބާރުލުން ދިނުމުގެ އިތުރުން މިދާއިރާއިން މީހުން ތަމްރީނުކުރުމަށް ހަމެޖެހިފައިވާ ކަމަށް ވެސް ސްޕޯޓްސް މިނިސްޓްރީން ބުންޏެވެ.
އެގޮތުން ކުރެވޭ މަސައްކަތުގެ ތެރޭގައި ކުޅިވަރުގެ ދާއިރާގެ މުވައްޒަފުން ބަދަލުކުރުމާއި ތަރައްގީކުރުމުގެ އިތުރުން ކުޅިވަރުގެ ތަމްރީނާއި ކުޅިވަރުގެ ދާއިރާއިން ޒުވާނުން ތަރައްގީކުރުމުގެ ޕްރޮގްރާމްތައް ހިންގުން ހިމެނޭއިރު، ކުޅިވަރުގެ ވަސީލަތްތަކާއި ފެސިލިޓީތައް ތަރައްގީކުރުމަށް މިއެއްބަސްވުމުގެ ދަށުން އެހީތެރިކަން ލިބިގެންދާނެ ކަމަށް ވެސް މިނިސްޓްރީން ބުންޏެވެ.
އެއްބަސްވުމުގެ ރަސްމިއްޔާތުގައި ރާއްޖެ އާއި ތައިލެންޑް ސަރުކާރާ ދެމެދު ކުޅިވަރު ދާއިރާއިން ހިިޔާލާއި މަޝްވަރާވެސް ކުރިކަމަށް ސްޕޯޓްސް މިނިސްޓްރީން ބުންޏެވެ.
