ރާއްޖޭގެ ގައުމީޓީމުގެ ކުރީގެ ކުޅުންތެރިޔާ ބޮންޑާ ހައްޔަރު ކޮށްފި
އައްޑޫ ސިޓީގައި ފުލުހުން ހިންގަމުންދާ މަސްތުވާ ތަކެތީގެ ޚާއްސަ އޮޕަރޭޝަނެއްގައި، ރާއްޖޭގެ ގައުމީ ފުޓްބޯޅަ ޓީމުގެ ކުރީގެ ކުޅުންތެރިޔާ ޝަމްވީލް ގާސިމް (ބޮންޑާ) ހައްޔަރު ކޮށްފިއެވެ.
އޮންލައިން ނޫހެއް ކަމަށްވާ “ވަގުތު” ގައި ރިޕޯޓުކޮށްފައިވާ ގޮތުގައި މިއަދު ހަވީރުގެ ވަގުތެއްގައި ބޮންޑާ ހައްޔަރު ކުރީ މަހަށް ގޮސް އައިތަނުން ބަނދަރުންނެވެ. އަދި ބޮންޑާ ހައްޔަރު ކޮށްފައިވަނީ އައްޑުއަށް މަސްތުވާ ތަކެތި އެތެރެ ކުރަން އުޅުމުގެ ތުހުމަތުގައެވެ.
ބޮންޑާ ހައްޔަރު ކުރީ ކަނޑުމަތީގައި އިންޖީނު ހުއްޓިފައި އޮތް ލޯންޗެއް ކަފި ޖަހައިގެން ބަނދަރާ ހަމައަށް ގެނެސް ދިނުމުން ކަމަށް ވެއެވެ. އެ ލޯންޗުން ގިނަ އަދަދެއްގެ މަސްތުވާ ތަކެތި ފެނިފައިވާ ކަމަށް ވެސް މައުލޫމާތު ލިބެއެވެ.
މި އޮޕަރޭޝަންގައި ބޮންޑާގެ އިތުރުން ވެސް ގިނަ ބަޔަކު ހައްޔަރު ކޮށްފައިވާ ކަމަށް މައުލޫމާތު ލިބެއެވެ. ނަމަވެސް މިކަމާ ބެހޭ މާބޮޑު މައުލޫމާތެއް ފުލުހުން ދީފައެއް ނުވެއެވެ. އައްޑޫގެ ގިނަ ރައްޔިތުން ގަބޫލުކުރާ ގޮތުގައި ބޮންޑާ މިފަދަ ކަމެއް ނުކުރާނެއެވެ.
ބޮންޑާ އަކީ ކުރިއަށް އޮތް ލޯކަލް ކައުންސިލް އިންތިޚާބުގައި ވެސް ވާދަ ކުރާ ކެނޑިޑޭޓެކެވެ.
