އަހަރެންގެ ހިނިތުންވުމުގެ ފުރަގަހުގައި ތިބާއަށް ނޭނގޭ އެތައް ވާހަކަތަކެއް ފޮރުވިފައި ވެއެވެ.
ކިތަންމެ ގާތްމީހަކަށް ވިޔަސް އަހަރެންގެ ހަޔާތުގެ ކަންތައްތައް ތިބާ އަށް ފޮރުވަން ޖެހުނީ ސަބަބު ތަކަކާ ހުރެއެވެ. އަހަންނަކީ ތިބާ ކުރިމަތީގައި ކިހާ ޤަދަރު ކުޑަ މީހެއްކަން ވިސްނުމުންނެވެ. ތިބާގެ ފުށުން ކުރިމަތިވި ދުއްތުރާތަކާ ކުރިމަތިލާން އަހަންނަށް ޖެހުނީ އެހެން މީހުންނަށް އެކަމުގެ ހިލަމެއް ވެސް ނުވާނެ ފަދައިންނެވެ. އާދޭހެވެ. މިކަމުގެ ސަބަބުން އަހަންނަށް އަހަރެންގެ ހިތާމަތައް ފޮރުވުމަށްޓަކައި ހިނިތުންވާން ދަސްވެއްޖެއެވެ.
ތިބާ އަހަރެންގެ ސިފަތަކަށް މަލާމާތްކޮށް ފުރައްސާރަ ކުރި ދުވަސްތައް މަތިން ހަނދާންވޭ ހެއްޔެވެ؟ އަހަރެންގެ ހަށިގަނޑުގައިވާ އުނި ސިފަ ތަކުގެ ސަބަބުން ތިބާ އަށް އަހަރެން ކަމުނުދާކަމަށް މީހުން ކައިރީ ބުނަމުން ދުވި ދުވަސް ހަނދާން ވޭ ހެއްޔެވެ؟ މިކަމާހުރެ އަހަރެންގެ އަމިއްލަ ނަފުސަށް އޮތް އިތުބާރު ކުޑަ ވެގެން ދިޔައެވެ. އެހެނަސް، އަހަރެން އެކަން ތިބާ އަށް ނުދެއްކުމަށް، ހިނިތުން ވުމަކުން ފުއްދާލީއެވެ.
ކޮންމެ ފަހަރަކު ވެސް އަހަރެން އާ ކަމެއް ދަސްކުރަން އުޅުމުން އެކަމަށް ހަޖޫޖަހާ، ތިކަން ނުވާނެއޭ ބުނި އެކަކީ ތިބާއެވެ. އެހެންކަމުން، ތިބާގެ ދުލުން ހިތްވަރުގެ ބަހެއް އިވޭތޯ އަހަރެން ކޮށްފައި ނުކުރާކަށް މަސައްކަތެއް ވެސް ނެތެވެ. އެހެނަސް، އަހަރެން އިތުރަށް ދެރަ ކޮށްލުމުގެ ގޮތުން ތިބާ ކީ އެއްޗިހި ހަނދާން އާވާ ކޮންމެ ފަހަރަކު އަދިވެސް އަހަރެންގެ ހިތަށް އުނދަގޫވެއެވެ. ކުރަން އުޅޭކަން ކުރާ ހިތް ވެސް ކެނޑެއެވެ.
އެންމެ ގާތް އެކުވެރިއެއްގެ ގޮތުގައި ހުރެ އަހަރެންގެ ހުރިހާ އުފާތަކެއް ނިގުޅައިގަތީ ހަމަ ތިބާއެވެ. އެހެނަސް، އަހަރެން އެކަމާ ‘އުޕް’ ވެސް ނުބުނަމެވެ. އެކަމުގެ ނާޖާއިޒު ފައިދާ ނެގީ ވެސް ހަމަ ތިބާއެވެ. ހަޔާތުގެ ބޮޑު އަޑިގަނޑަކަށް އަހަރެން ވެއްޓިފައި ވީ އިރު ތިބާ އަށް އެކަން ރޭކާލީ ހެއްޔެވެ؟ އޭރުވެސް ތިބާ އުޅުނީ އަހަންނޭ ކިޔައިގެން އެކިއެކި ވާހަކަ ފެތުރުމުގައެއް ނޫންހެއްޔެވެ؟
އަހަރެންނަށް ދެރަ ގޮތެއް ނަހަދާނެ ކަމަށް ބުނެ ތިބާ ކުރި ވަޢުދާއި އަހުދުތައް ވަޔާ ގޮސްފިއެވެ. އަހަރެން ތިބާ އަށް އެންމެ ބޭނުންވި ދުވަހު ތިބާ އަހަރެން ދޫކޮށް ދިޔައީއެވެ. އެހެންކަމުން، މަދަދުވެރި ވާނެ އިތުރު ފަރާތެއް ނެތުމުން އަހަރެން ޖެހުނީ އެކަނި ގިނި ކަންޏާ، މި ކެހިވެރި ދުނިޔެއަށް ދެލޯ ހުޅުވާށެވެ.
ތަޤުދީރުގައި އަހަންނަށް ލިޔެވިފައި އޮތީ މިގޮތް ކަމަށް ވެސް ވެދާނެއެވެ. ނަމަވެސް، އަހަރެން ކިތަންމެ ބޮޑު ހިތާމައަކާއި ވެސް ކުރިމަތިލާނީ ކެރިގެން، ހިނިތުންވުމަކާ އެކުއެވެ. އޭގެ ފަހަތުހައި ވަނީ އުފާވެރި ކަމަށް ނުވެދާނެއެވެ. އެހެން ކަމަށް ވެއްޖިއްޔާ އެއީ އަހަރެންގެ އުފަލަށްޓަކައި ކުރާ ހަނގުރާމަ ކަމުގައި ތިބާ ބަލާށެވެ.
