ލޮބުވެތި މުދައްރިސުންނަށް ޝުކުރިއްޔާ!
އުނގެނުމަށް ވުރެން ބުރަ ކަމަކީ އުނގަންނައި ދިނުމެވެ. ކޮވިޑް 19 ގެ ސަބަބުން އުނގަންނައި ދިނުމަށް ކުރިމަތިވެފައިވާ ގޮންޖެހުންތަކާއެކު ވެސް ޤައުމީ އެ މަތިވެރި ޚިދުމަތުގައި ތިއްބެވި ލޮބުވެތި ޚިދުމަތްތެރީންނަށް ހިތުގެ އެންމެ ފުންމިނުން ސާބަހާއި އައްސަރިބަހެވެ.
ޖީލެއްގެ މުސްތަގުބަލަށްޓަކައި ތިޔަކޮށްދެއްވާ މަތިވެރި ޖިހާދުގެ އަގު ވަޒަން ކުރާނެ ގޮތެއް އަޅުގަނޑު ކޮށި ވިސްނުމަށް ގެނެސް ގަންނާން ޚުދު އަޅުގަނޑަށް ވެސް ދައްޗެވެ. ވަރުބަލި ކަމެއް ނެތި އަޅުގަނޑުމެންގެ ދަރީންގެ މާދަމާގެ ފޮނި އުއްމީދުތަކުގައި ހަޤީގީ ކުލަ ޖައްސައިދިނުމަށް ތިޔަ އޮހޮރުވާ ދަލުގެ ބަދަލު ދެއްވުން އަދާ ކަލާނގެ ކިބަފުޅަށް އަޅު ދުޢާކުރަމެވެ.
ޤައުމެއްގެ ކުރިބޯއްޓަކީ ތަޢުލީމީ ޤާބިލް ދުޅަހެޔޮ ޖީލެއް ބިނާކުރުމެވެ. އެ މަތިވެރި މަސައްކަތް ހަވާލު ވެފައިވާ ފަރާތަކީ ލޮބުވެތި މުދައްރިސުންނެވެ. އެ މަޤުޞަދު ގައި ޅަ ސިކުނޑިތައް ކޮށާމަށާ ކިއްސަރު ކުރާ ތިޔަ ބޭފުޅުންގެ އަގު ވަޒަން ނުކޮށް އަޅުގަނޑުމެން ކުރަންޖެހޭ ވަކި އިތުރު ކަމެއް ކޮބައިތޯއެވެ. ނަމަވެސް އަސަރާއި އެކު ދަންވާލަންޖެހޭ ހަޤީގަތަކީ މުދައްރިސުން އުފުލާ ބުރަޔަށް ލިބެނީ ހައްޤު މިންވަރެއް ނޫނެވެ. މީ ކަމާއި ބެހޭ އެންމެހާ ފަރާތްތަކުން ފުންކޮށް ވިސްނާ އަވަސް ހައްލެއް ހޯދައިދޭންޖެހޭ ކަމެއްކަން އަޅުގަނޑު ފާހަގަކޮށްލަމެވެ.
ޤައުމަކަށް މުދައްރިސުންގެ މުހިއްމުކަން ހުރި މިންވަރު ނިކަން ވިސްނާލައްވާށެވެ. ދެވަނަ ބޮޑު ހަނގުރާމައިން ޖަޕާން ބަލިވެ، އެތައްބަޔަކު ޤަތުލުވެދިޔަ ދަނޑިވަޅުގައި، ޖަޕާނުގެ ވެރިން ފުރަތަމަ ބެލީ ދިރިތިބި ސިފައިންގެ އަދަދެއް ނޫނެވެ. އެންމެ ފުރަތަމަ ވެސް އެވެރިން ބެލީ ދިރި ތިބި މުދައްރިސުންގެ އަދަދެވެ. މުދައްރިސުންގެ މުހިއްމުކަން ޤައުމަކަށް ކިހާ ބޮޑުތޯއެވެ.
ޤައުމަކަށް މުދައްރިސުންގެ މުހިއްމުކަން އެހާ ބޮޑު އިރު މުދައްރިސުންގެ ބޮލުގައި އެޅިފައިވާ ޒިންމާތައް ވެސް އެހާ ބޮޑެވެ. އުނގަންނައިދޭ ދަރިވަރުންގެ މެދުގައި ހަމަހަމަކަން ޤާއިމްކޮށް ތަފާތުކުރުންތައް ނައްތާލުމަކީ ކޮންމެހެން މުހިންމުކަމެކެވެ. ތަފާތު އެކި މިޒާޖުގެ ދަރިވަރުން ތަކަކަށް އެއް ހަމައެއް ގެންގުޅެވޭތޯ ކޮންމެ މުދައްރިސަކު ވެސް މަސައްކަތް ކުރަން ޖެހޭނެއެވެ. ދަރިވަރުންނާއި ބެލެނިވެރިންގެ ލޯބި ލިބި ކާމިޔާބު މުދައްރިސަކަށް ވެވޭނީ އެ އަޒުމުގައި ކުރިޔަށް ގޮސްގެންނެވެ.
ތިޔަ ލޮބުވެތި މުދައްރިސުން ހުޅުވައިލަދިން ތަރުބިއްޔަތުގެ ދޮރާށިން މިއަދު ވަދެ ހުރެ ، ތަރުތީބު މަގުން އަމުނާލެވިފައިވާ މާމަލުގެ ހާރުތައް ތިޔަ ހުރިހާ ލޮބުވެތި މުދައްރިސުންގެ ކަރުގައި އަމުނާލަދެމުން ތިޔަ ބޭފުޅުންނަން އަދަށް ވުރެން ފެހި މާދަމާއަކަށް އެދެމެވެ. ޖީލުތައް ބިނާ ކުރުމަށް ތިޔަ ބޭފުޅުން ކުރައްވާ މަސައްކަތް ކޮންމެ ދުވަހަކު ބަލައިގަންނަމެވެ. ނަމަވެސް މިއަދު ވަކީން ޚާއްޞަކޮށް އަޑުހަރުކޮށް ޝުކުރިއްޔާއޭ ބުނެލަން ބޭނުމެވެ. އަޅުގަނޑުމެންގެ ދަރީންނާމެދު ތިޔަ ބަހައްޓަވާ ގާތްކަމާ އެކުދީންގެ މާދަމާއަށް ތިޔަ ކުރައްވާ މަސައްކަތަށްޓަކައި ހާސް ފަށުން ޝުކުރިއްޔާއެވެ. ސާބަހެވެ. ތިޔަކުރައްވާ ބުރަ މަސައްކަތުގައި ﷲ ތަޢާލާ ބަރަކާތް ލައްވާށިއެވެ.
