ޒުވާނުންގެ އެވޯޑް ލިބުނު އާފިރު ކޯޓަށް ހާޒިރުނުކުރެވިގެން ހޯދަނީ
ޒުވާނުންގެ އެވޯޑް ލިބުނު ގދ. ރަތަފަންދޫ / އައްސޭރިވިލާ، އާފިރު މުހައްމަދު ކޯޓަށް ހާޒިރުނުކުރެވިގެން އޭނާ ހޯދަން ފުލުހުން މިއަދު އިއުލާންކޮށްފިއެވެ.
ފުލުހުން މިއަދު ބުނީ އާފިރު ހޯދަމުންދަނީ ސިވިލް ކޯޓަށް ހުށަހަޅާފައިވާ މައްސަލައަކާ ގުޅިގެން ހާޒިރުނުކުރެވުމުން އޭނާ ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ކަމަށެވެ.
ސިވިލް ކޯޓުން އަމުރުކޮށްފައިވަނީ އަންނަ މަހުގެ އެއްވަނަ ދުވަހުގެ 11:30އަށް ސިވިލް ކޯޓަށް އާފިރު ހާޒިރުކޮށްދިނުމަށެވެ.
އެހެންވެ އާފިރުއާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ކަސްޓޯޑިއަލް ނަންބަރު 9991442އަށް ގުޅުއްވައި ހިއްސާކުރަން ފުލުހުން ވަނީ އެދިފަ އެވެ.
ސިވިލް ކޯޓުގެ ޝަރީއަތްތަކުގެ ޝެޑިއުލްއިން ދައްކާގޮތުން އާފިރުގެ މައްޗަށް ދައުވާކޮށްފައިވަނީ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަންއިންއެވެ.
ކުރިން ވައްކަމާއި މަސްތުވާތަކެތީގެ މައްސަލަތަކުގައި ޖަލުގައި ހޭދަކުރި އާފިރުއަށް ޒުވާނުންގެ އެވޯޑް 2022ވަނަ އަހަރު އެރުވީ މަސްތުވާތަކެއްޗާ ދުރުވެ އެއާ ދެކޮޅަށް ކުރި މަސައްކަތާ ގުޅިގެންނެވެ.
