ގޭތެރެ ސާފުކުރުމަށް ހަމަޖެއްސި މަސައްކަތުމީހާ އަށް ގޭގެ ވެރިފަރާތް އެނގުނު ހިސާބުން ކަންތައް ވީގޮތް
ގޭތެރޭގައި މަސައްކަތް ކުރާނެ މީހުން ހޯދުމަށް ގިނަ ބަޔަކު މަސައްކަތް ކުރެއެވެ. އަދި ގިނަ ބަޔަކު އެގޮތަށް މުސާރައަށް ގޭގޭގައި މަސައްކަތް ވެސް ކޮށްދެއެވެ. އެހެން ނަމަވެސް މިވާހަކައަކީ މަސައްކަތް ކުރަން ހަވާލުވި ގޭގެ ވެރިފަރާތް އެނގުނު ހިސާބުން މަސައްކަތު މީހާ ކަންތައް ކުރި ގޮތުގެ ވާހަކައެވެ.
“ކާރާ ސިމޮންސް” އަކީ ގޭގޭގައި މަސައްކަތް ކުރަމުން ދިޔަ އިނގިރޭސި ވިލާތުގެ އެކަނިވެރި މައެކެވެ. މީނާ މަސައްކަތް ކުރަމުން އައީ އެގޮތަށް ގޭގެއަށް މީހުން މަސައްކަތް ކުރުމަށް ފޮނުވާ ކުންފުންޏެއްގައެވެ. އެގޮތުން ކާރާ އަށް “ވީއައިޕީ” މީހެއްގެ ގެ ސާފުކުރުމަށް ހަވާލު ކުރެވުނެވެ.
މަސައްކަތާއި ހަވާލުވެ ހުރެ ސާފުކުރުމުގެ މަސައްކަތް މީނާ ވަނީ ވަރަށް އަވަހަށް ނިންމާލާފައެވެ. ސާފުކުރުމުގެ އިތުރުން ގޭތެރޭގައި ކުރަންޖެހޭ ބައެއް މަސައްކަތްތައް ނިންމަމުން ދަނިކޮށް ކާރާ އަށް މިގޭގެ އަސްލު ވެރިމީހާ އެނގިއްޖެއެވެ. ބޮޑު ހައިރާން ކަމެއްގެ ތެރެއަށް ކާރާ ދަމައިގަތީ އެހިސާބުންނެވެ.
ކާރާ މި މަސައްކަތް ކުރަމުން ދިޔައީ ހަމައެކަނި ދަރިންނަށް ޓަކައެއް ނޫނެވެ. ދިރިއުޅެމުން އަންނަ ގޭގެ ކުލި ދެއްކުމާއި އަމިއްލަ ޒަރޫރީ ބޭނުންތައް ވެސް ފުއްދުމަށެވެ.
ކާރާގެ ބޮޑު މީހާގެ ނަމަކީ “މެޑަލިން ބްލޫ” އެވެ. މެޑަލިން ކާރާ ވަކި ގެއަކަށް ޚާއްސަކޮށް ފޮނުވީ ވަރަށް ބޮޑު ހިކުމަތަކާއިއެކުގައެވެ. އެހާ ބުރަކޮށް މަސައްކަތް ކުރާ، އެއްވެސް ބަންދެއް ނުނަގާ ހުއްޓުމެއްނެތި މަސައްކަތް ކުރާ ކާރާ އަށް ވަރަށްވެސް ހައިރާން ކުރުވާ “ސަޕްރައިޒް” އެއް ދިނުމަށެވެ.
ގޭތެރެ ސާފުކޮށް ނިމުމުން އެގެއަށް ގެނައީ ފޮށިގަނޑެއްގައި ބަންދު ކޮށްފައި ހުރި ސާމާނު ތަކެކެވެ. ފޮށި ހުޅުވާލުމާއިއެކު ކާރާ އާޝޯޚުވިއެވެ. އޭނާ ދިރިއުޅެމުން އަންނަ ގޭގައި ވެސް ހުރީ ހަމަ އެފަދަ ސާމާނު ތަކެކެވެ. އެއަށް ފަހު ދޮރުގައި ޓަކި ޖެހުމާއި އެކު ކާރާ ދޮރު ހުޅުވީ ވަރަށް ކެތްމަދު ވެފައިވާ ޙާލުއެވެ. ދެން ވާނެ ގޮތަކާއި މެދު ވިސްނާފައެވެ.
ދޮރު ހުޅުވުމާއިއެކު ކާރާ ކުރިމަތީގައި ތިބީ ކާރާގެ ދެ ދަރިންނާއި، އެމެރިކާގެ އެކްޓަރެއް ކަމަށްވާ “ގްރެގް ބެންސަން” ނަމަކަށް ކިޔާ މީހެކެވެ. ހަގީގަތުގައި މިވީ ގޮތަކީ، އެގެއަކީ ކާރާއަށް ޚާއްސަކޮށް ހަދާފައިވާ ގެއެކެވެ. ކާރާގެ ބޮޑުމީހާގެ ފަރާތުން ކާރާއަށް ލިބިފައިވާ ހަދިޔާއެކެވެ.
ކާރާ އެ ކުންފުނީގައި އިޚުލާސްތެރި ކަމާއެކު މަސައްކަތް ކުރުމުގެ ނަތީޖާއަކަށްވީ އެ ބޮޑު ގޭގެ ވެރިފަރާތަކީ ކާރާ ކަމުގައި ވުމެވެ. އިންސާނިއްޔަތުގެ ވަރަށް ވެސް ބޮޑު ނަމޫނާ އެކެވެ.
