ބޮޑުވަޒީރު މޯދީ އީރާނުގެ ރައީސަށް އީދުގެ ތަހުނިޔާ ފޮނުއްވައި، ކަނޑުދަތުރުފަތުރުގެ މިނިވަންކަން ކަށަވަރުކުރުމަށް ގޮވާލައްވައިފި
އިންޑިއާގެ ބޮޑުވަޒީރު ނަރެންދުރަ މޯދީ ހޮނިހިރު ދުވަހު އީރާނުގެ ރައީސް މަސްޢޫދު ޕެޒެޝްކިއާނާ ފޯނުން ގުޅުއްވައި، ފިޠުރު އީދާއި ނައުރޫޒްގެ މުނާސަބަތުގައި ހެޔޮއެދުންތައް ފޮނުއްވައިފިއެވެ. މި މަޝްވަރާގައި މޯދީ ވަނީ މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ސަރަހައްދީ ހަމަޖެހުމަށް ކުރިމަތިވަމުންދާ ނުރައްކާތަކާ މެދު ކަންބޮޑުވުން ފާޅުކުރައްވާފައެވެ.
އެކްސްގައި ކުރެއްވި ޕޯސްޓެއްގައި ބޮޑުވަޒީރު ވިދާޅުވީ، އެމެރިކާއާއި އިސްރާއީލް އެއްކޮޅުން އަދި އީރާނުން އަނެއްކޮޅުން ހަރަކާތްތެރިވަމުންދާ މި ހަނގުރާމަ ވަރުގަދަވަމުންދާ ދަނޑިވަޅެއްގައި، މެދުއިރުމައްޗަށް އަމާންކަމާއި ތަނަވަސްކަން ލިބުމަށް އެދިވަޑައިގަންނަވާ ކަމަށެވެ. "ރައީސް ޑރ. މަސްޢޫދު ޕެޒެޝްކިއާނާ އާ ވާހަކަދައްކައި، އީދާއި ނައުރޫޒްގެ ތަހުނިޔާ އަރިސްކުރިން. މި އުފާވެރި މުނާސަބަތަކީ މެދުއިރުމައްޗަށް ސުލްހައާއި ހަމަޖެހުން ގެނެސްދޭނެ ދުވަސްތަކެއް ކަމަށް އުއްމީދުކުރަން،" އެ ޕޯސްޓުގައިވެއެވެ.
ސަރަހައްދުގެ މުހިންމު ވަސީލަތްތަކަށް ދެމުންދާ ހަމަލާތައް ބޮޑުވަޒީރު ވަނީ ވަރަށް ބޮޑަށް ކުށްވެރިކުރައްވާފައެވެ. މިފަދަ އަމަލުތަކުގެ ސަބަބުން ސަރަހައްދީ ހަމަޖެހުމަށް ބޮޑެތި ނުރައްކާތަކެއް ކުރިމަތިވެ، ދުނިޔޭގެ މުދާ އުފުލުމުގެ ނިޒާމަށް ނުވަތަ ސަޕްލައި ޗެއިންއަށް ބުރޫއަރާކަން އެމަނިކުފާނު ފާހަގަކުރެއްވިއެވެ.
މީގެ އިތުރުން، ކަނޑުގެ ސަލާމަތާއި ރައްކާތެރިކަން، ހާއްސަކޮށް ހޯރްމޫޒް ކަނޑުއޮޅިން ދަތުރުކުރާ އާގުބޯޓުފަހަރުގެ ސަލާމަތަށް ބޮޑުވަޒީރު އިސްކަންދެއްވިއެވެ. ކަނޑުދަތުރުފަތުރުގެ މިނިވަންކަން ދެމެހެއްޓުމާއި، މަގުތައް ރައްކާތެރިކޮށް ބެލެހެއްޓުމަކީ އިންޑިއާގެ ސިޔާސަތުކަން އެމަނިކުފާނު ތަކުރާރުކުރެއްވިއެވެ.
އީރާނުގައި ދިރިއުޅޭ އިންޑިއާގެ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމުގައި އީރާނުގެ ސަރުކާރުން ދެމުންދާ އެއްބާރުލުމަށްޓަކައި ބޮޑުވަޒީރު ވަނީ ޝުކުރު އަދާކުރައްވާފައެވެ.
މި މަޝްވަރާތައް ކުރިއަށް ގޮސްފައިވަނީ މިދިޔަ ފެބްރުއަރީ 28 ވަނަ ދުވަހު އީރާނުގެ ރޫހާނީ ކާބަފާ އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން މަސްރަހު ނުތަނަވަސްވެފައިވާ ދަނޑިވަޅެއްގައެވެ. އެމެރިކާއާއި އިސްރާއީލް ގުޅިގެން ދިން ހަމަލާތަކެއްގައި އޭނާ އަވަހާރަކޮށްލުމުން، އީރާނުން ވަނީ ގަލްފުގެ ބައެއް ގައުމުތަކުގައި ހުރި އެމެރިކާއާއި އިސްރާއީލުގެ އަމާޒުތަކަށް ހަމަލާދީފައެވެ. މީގެ ސަބަބުން ދުނިޔޭގެ ހަކަތައިގެ ބާޒާރަށާއި އިގްތިސާދަށް ވަނީ ބޮޑެތި ލޮޅުންތަކެއް އަރާފައެވެ.
މި ހަމަަނުޖެހުންތަކާ ގުޅިގެން، ދުނިޔެއަށް ހަކަތަ ފޯރުކޮށްދިނުމުގައި އެންމެ މުހިންމު އެއް މަގު ކަމަށްވާ ހޯރްމޫޒް ކަނޑުއޮޅި އީރާނުން ވަނީ ގާތްގަނޑަކަށް ބަންދުކޮށްފައެވެ. އަލީ ޚާމަނާއީ އަވަހާރަވުމާ ގުޅިގެން، އީރާނުގެ އާ ރޫހާނީ ކާބަފާއަކަށް މިހާރު އައްޔަންކޮށްފައިވަނީ އޭނާގެ ދަރިކަލުން މުޖްތަބާ ޚާމަނާއީއެވެ.
މިއަދުގެ ކުރީކޮޅު އެމެރިކާއާއި އިސްރާއީލުން ވަނީ އީރާނުގެ ނަޓާންޒްގައި ހުންނަ ޔުރޭނިއަމް މުއްސަނދިކުރާ މަރުކަޒަށް ހަމަލާދީފައެވެ. ނަމަވެސް އެ ހަމަލާގެ ސަބަބުން ރޭޑިއޭޝަން ބޭރުވެފައި ނުވާ ކަމަށް އީރާނުގެ މީޑިއާތަކުން ރިޕޯޓުކުރެއެވެ. މީގެ އިތުރުން، އީރާނުން ވަނީ ގަތަރުގެ ރަސް ލައްފާން ސިނާއީ ސަރަހައްދަށް ބެލިސްޓިކް މިސައިލް ހަމަލާތަކެއް ދީފައެވެ. މި ހަމަލާތަކުގެ ސަބަބުން ގަތަރުގެ އެލްއެންޖީ (LNG) އެކްސްޕޯޓް ކުރުމުގެ ގާބިލްކަން 17 އިންސައްތަ ދަށަށް ގޮސް، ދުނިޔޭގެ ބާޒާރުގައި ހަކަތައިގެ އަގު ވަނީ ވަރަށް ބޮޑަށް އުފުލިފައެވެ.
