އުމުރުން އެންމެ 12 އަހަރުގެ ބަމްބި: ހުނަރުވެރި، މޮޅު ކުރެހުންތެރިއެއް!
ކޮންމެ ކުއްޖަކީ ވެސް ތަފާތު އެކި ހުނަރު ލިބިގެންވާ ކުއްޖެކެވެ. ބައެއް ކުދިންގެ ޝައުޤުވެރިކަން ގުޅިފައިވަނީ އެކުއްޖެއްގެ ގާތް މީހަކު ކުރަމުންދާ ކަމަކުންކަން ވެސް ފާހަގަ ވެއެވެ.
އުމުރުން އެންމެ 12 އަހަރުގެ ފާތިމަތު އީޝަލް އިނާޔަތު (ބަމްބި) ގެ ކުރެހުމުގެ ހުނަރު ވެސް ފެށުނީ އެފަދަަ ގޮތަކަށެވެ. ބަމްބި އަކީ ވަރަށް މޮޅަށް ކުރަހާ ކުއްޖެކެވެ. ފަންސޫރާއި ގަލަމާއި ފެން ކުލައިން ވެސް ވަރަށް ޗާލު މަންޒަރުތައް ބަމްބި އުފައްދާލައެވެ.
މިކަމަށް ޝައުޤުުވެރިކަން އުފެދުނު ގޮތް "ދެން" އާއި ހިއްސާ ކުރަމުން ބަމްބި ބުނީ އޭނާ އެންމެ ފުރަތަމަ ކުރަހަން ފެށީ އޭނަގެ ބޭބެ ކުރަހާތަން ފެނިގެން ޝައުޤުވެރިކަން އުފެދިގެން ކަމަށެވެ.
"ފުރަތަމަކޮޅު ބޭބެ ވަރަށް އެހީތެރިވެދިން ކުރެހުމުގައި. އެއްޗެއް ނޭނގެންޏާވެސް ބުނެދިން ހަދާނެ ގޮތް. ދެން މިހާރު ޔޫޓިއުބް ވީޑިއޯތައް ބަލައިގެންނާއި އާޓިސްޓުން ކުރަހާތަން ބަލައިގެން ކުރަހަނީ" ބަމްބި ބުންޏެވެ.
ރީތިކޮށް ކުރެހުމުގެ ހުނަރާއި ކުރެހުންތަކުގައި ބޭނުން ކުރާނެ ކުލަތައް ގެންގުޅެން އެނގުމުގެ ހުނަރު އެންމެ ކުޑައިރުން ފެށިގެން ވެސް ބަމްބިގެ ހުންނަކަން އޭނާގެ އާއިލާއިން ވަނީ ފާހަގަ ކޮށްފައެވެ. ނަމަވެސް ގިނައިން ކުރަހާ، މިކަމުގައި މިހާރު ބޮޑަށް އުޅެން އަމިއްލަ ނަފްސަށް އިތުބާރު ލިބިފައި ވަނީ ބަމްބިގެ އުމުރުން 9 އަހަރުން ފެށިގެންނެވެ. އެއިރު ގިނައިން ހަދާފައިވާނީ ޕެއިޓިންގްސް ކަމަށް ބަމްބި ބުންޏެވެ.
ސްކޫލްގެ ފިލާވަޅުތައް ނިންމުމަށްފަހު ލިބޭ ހުސްވަގުތުތަކުގައި ކުރަހާ ބަމްބި ބުނީ، އޭނާއަށް އެންމެ ރީތިކޮށް ކުރެހެނީ މީހުންގެ ފޮޓޯ (ޕޯޓްރެއިޓް) އެވެ. އޭގެ އިތުރުން ބަމްބި އަކީ ފެންކުލަ ބޭނުން ކޮށްގެން ވެސް ރީތި ކުރެހުންތައް ކުރަހާ ކުއްޖެކެވެ.
"މިހާރު ގާތްގަނޑަކަށް 100 އަށްވުރެ ގިނަ ކުރެހުން ކުރެހިއްޖެ. ކުރަހަން ބޭނުން ކުރަނީ ފަންސޫރާއި ގަލަން. ޕެއިންޓިންގްސް އަށް ހުންނާނީ ފެން ކުލަ" ބަމްބި ބުންޏެވެ.
ކުކުރެހުމުގައާއި އެހެން ހުރިހާ ކަމެއްގައިވެސް ބަމްބި އަށް އެންމެ ބޮޑު ހިތްވަރެއް ލިބެނީ އޭނަގެ މަންމަ (ފިލްމީތަރި) އައިޝަތު ގުލްފާ (އައިޝާ) ގެ ފަރާތުންކަން އޭނާ ފާހަގަ ކުރިއެވެ. މަންމަ ގެ އިތުރުން ބަމްބިގެ މާމަ އާއި ބޭބެ އަދި އަމާނީ ދައްތަގެ ފަރާތުން ކުރެހުމުގަ އެހީތެރިކަން ލިބެއެވެ.
ބަމްބި ގެ ހުނަރުވެރިކަން ހަމައެކަނި ކުރެހުމަކުން ނުނިމެއެވެ. އޭނާއަކީ ވަރަށް މީރުކޮށް އަދި އެހާމެ ރީތި ކޭކު ވެސް އަޅަން އެނގޭ ކުއްޖެކެވެ. ހަމައެކަނި އާއިލީ ހަފްލާތަކަށް އެކަނި އަދި ކޭކު އަޅައިދިން ނަމަވެސް، ބަމްބިގެ އެމަސައްކަތަށް ވެސް ތައުރީފު ޙައްޤެވެ.
"ކޭކު އަޅާ ހިތްވީ ދައްތަ ކޭކު އަޅާތަން ފެނުނީމަ. ބަމްބި ވެސް ބޭނުންވީ ދަސްކުރަން. އާއްމުކޮށް އަޅަނީ ލޭޔަރ ކޮށްފަ ޗޮކްލެޓް ކޭކު. އެންމެ ފުރަތަމަ ކޭކެއް އެޅީ މިދިޔަ އަހަރު މާރޗުގަ މަންމިގެ އުފަންދުވަހު. އެދުވަހު އެކަމަކު ނުބައިކޮށް ކޭކު އެޅުނީ. ފްރޮސްޓިންގ ގަވެސް ހަކުރު ހެފޭގޮތަށް ހުރީ. ދެން ޔޫޓިއުބް ބަލައިގެން އިތުރަށް ދަސްކޮށް ރަނގަޅުކުރީ. ޝަފޫ ދައްތަ ކޭކު އެޅުމުގައި އެހީވެދިނީ" ބަމްބި ބުންޏެވެ.
ބަމްބި އާއިމެދު އޭނަގެ މަންމަ އައިޝާ ބުނީ، ބަމްބި އަކީ ވަރަށް ބަސްއަހާ ރަނގަޅު ކުއްޖެއް ކަމަށެވެ.
"ދުވަހަކު ވެސް ބާރަށް އެއްޗެއް ބުނެ، މޫނުމަތީގައި ޒުވާބުކޮށް ނުހަދާނެ. ކަންތައްތައް ވިސްނޭ، ކިޔަމަންތެރި އަދި ފިލާވަޅުތައް ވެސް ބަރާބަރަށް ނިންމާ ބަސްއަހާ ކުއްޖެއް އެއީ. އަޅުގަނޑު ފަޚުރުވެރިވަން އަަޅުގަނޑުގެ ދަރިންނާމެދު. ހަގު ދަރިފުޅު އީހާން އަކީ ވެސް ވަރަށް ބަސްއަހާ ކުއްޖެއް" އޭނާގެ ދަރިންނާމެދު އައިޝާ ބުންޏެވެ.
މުސްތަޤްބަލުގައި ބަމްބި ބޭނުން ވަނީ އޭނާގެ ކުރެހުންތައް ވިއްކާ، އޭނާއަކީ މޮޅު ކުރެހުންތެރިއަކަށް ވާށެވެ.
