މަސްވެރިންނަށް ތެޔޮ ހެޔޮ އަގުގައި ދ. މީދޫން ތެޔޮ ލިބޭނެ އިންތިޒާމުތައް ހަމަޖައްސައިފި

ދިވެހި މަސްވެރިންނަށް ދިމާވެފައިވާ ދަތިތަކަށް ލުޔެއް ހޯދައިދިނުމުގެ ގޮތުން، މަސްވެރިކަމާ ބެހޭ ވުޒާރާއިން ދ. މީދޫގައި ވެސް ހެޔޮ އަގެއްގައި މަސްދޯނިފަހަރަށް ތެޔޮ ފޯރުކޮށްދޭން ފަށައިފިއެވެ.

މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ބުނީ، މެދުއިރުމަތީގެ ހަނގުރާމައިގެ ސަބަބުން ތެލުގެ އަގު އިންތިހާއަށް ބޮޑުވެފައިވީ ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުގެ ދަށުން ސަރުކާރުން މަސައްކަތް ކުރަމުންދަނީ މަސްވެރިކަމުގެ ސިނާއަތަށް އޭގެ ނޭދެވޭ އަސަރު ފޯރިޔަނުދީ ހިފެހެއްޓުމަށް މަސައްކަތް ކުރަމުންދާ ކަމަށެވެ. މިގޮތުން، މަސްވެރިންގެ އޮޕަރޭޝަނަލް ޚަރަދުތައް ކުޑަކޮށް، އެ ފަރާތްތަކަށް ލިބޭ އިޤްތިޞާދީ މަންފާ އިތުރުކޮށްދިނުމަށްޓަކައި މުޅި ރާއްޖޭގެ އެކި ސަރަޙައްދުތަކުގައި ތެޔޮ ލިބޭނެ މަރުކަޒުތައް ދަނީ އިތުރުކުރަމުންނެވެ.

ކުރިން ހަމައެކަނި ހަތަރު ސަރަޙައްދަކުން ފޯރުކޮށްދެމުން އައި މި ޚިދުމަތް މިހާރު އިތުރު ދިހަ ސަރަޙައްދަކަށް ވަނީ ފުޅާކޮށްފައެވެ. އެންމެ ފަހުން މި ޚިދުމަތް ތަޢާރަފުކުރި ދ. މީދޫއާ އެކު އެ އަތޮޅުގެ ދެ ރަށަކުން މިހާރު ލުއި އަގުގައި ތެޔޮ ލިބޭނެއެވެ. ނަމަވެސް، ރ. އަތޮޅާއި ތ. އަތޮޅުގައި އަދި މި އިންތިޒާމުތައް ގާއިމުކުރެވިފައެއް ނުވެއެވެ. އުޅަނދުތަކުގެ ބޮޑުމިނަށް ބަލައި މިފްކޯއިން ތެޔޮ ދޫކުރާ ނިސްބަތަށް ބަލާއިރު، 85 ފޫޓަށްވުރެ ބޮޑެތި ދޯނިފަހަރަށް 5000 ލީޓަރު، 50 ފޫޓާއި 85 ފޫޓާ ދެމެދުގެ ދޯނިފަހަރަށް 3000 ލީޓަރު، އަދި 50 ފޫޓުން ދަށުގެ އުޅަނދުތަކަށް 1500 ލީޓަރުގެ ތެޔޮ ކަނޑައެޅިފައިވާ ޚާއްސަ ރޭޓުގައި ލިބޭނެއެވެ.

މަސްވެރިކަމާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، ދުނިޔޭގެ މަސްރަޙަށް އަންނަ ބަދަލުތަކުން ރައްކާތެރިވުމަށް ސަރުކާރުން ފަށާފައިވާ މި ޚާއްސަ ޕްރޮގްރާމުގެ ދަށުން، މިހާތަނަށް ދިވެހި މަސްވެރިންނަށް 2.5 މިލިޔަނަށްވުރެ ގިނަ ލީޓަރުގެ ތެޔޮ ވަނީ ހެޔޮ އަގުގައި ފޯރުކޮށްދީފައެވެ.