Tuesday, 17 November 2026
Advertisement
Ooredoo — Article-Top (leaderboard)
ސިޔާސީ

ދައުލަތުގެ އިސްވެރިންގެ ވަށައިގެން ކޮރަޕްޓު މީހުން ތިބޭނަމަ ރައްޔިތުންގެ އިތުބާރު ގެއްލޭނެ: ޔާމީން

ދައުލަތުގެ އިސްވެރިންގެ ވަށައިގެން ކޮރަޕްޓު މީހުން ތިބޭނަމަ ރައްޔިތުންގެ އިތުބާރު ގެއްލޭނެ: ޔާމީން

ޤައުމުގެ އިސްވެރިން ވަށައިގެން ކޮރަޕްޓު މީހުން ގެންގުޅުއްވާނަމަ ރައްޔިތުންގެ އިތުބާރު އެ ބަޔަކަށް ނޯންނާނެކަމަށް ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ޕީޕަލްސް ނެޝަނަލް ފްރަންޓް (ޕީއެންއެފް)އިން ސިލްސިލާކޮށް ކުރިއަށްގެންދާ ޓައުންހޯލް ބައްދަލުވުމުގައި ވާހަކަފުޅު ދައްކަވަމުން ޔާމީން ވަނީ ކުރީގެ ރައީސް އިބްރާހީމް މުޙައްމަދު ޞާލިޙާއި، މިހާރުގެ ރައީސް ޑރ. މުޙައްމަދު މުޢިއްޒުގެ ސަރުކާރުގެ އެންމެ އިސް ސަފުގައި ކޮރަޕްޝަނުގެ ތުހުމަތު ކުރެވޭ ފަރާތްތައް ހަރަކާތްތެރިވަމުންދާ ކަމަށް ވިދާޅުވެ، އެކަމަށް ވަރަށް ބޮޑަށް ފާޑުވިދާޅުވެފައެވެ. އަދި ވެރިކަމުގައި ތިއްބަވާ ބޭފުޅުންނަށް އޭގެ ސަބަބުން ނާޖާއިޒު މަންފާތަކެއް ލިބިވަޑައިގަންނަވާތީ، އެފަދަ ފަރާތްތަކާ މެދު ފިޔަވަޅު އަޅުއްވަން ފަސްޖެހިވަޑައިގަންނަވަނީ ކަމަށް އެމަނިކުފާނު ތުހުމަތުކުރެއްވިއެވެ. ކޮރަޕްޓު އަދި ނާޤާބިލު މީހުންނަށް އިސް މަޤާމުތައް ދިނުމަކީ ރައްޔިތުންނަށް ހެޔޮ ގޮތެއް ވެދާނެކަމުގެ އުންމީދު ކަނޑައިގެންދާނެ ކަމެއް ކަމުގައި ވެސް ވިދާޅުވިއެވެ.

ޔާމީންގެ ވެރިކަމުގައި ހިނގައިދިޔަ އެމްއެމްޕީއާރުސީގެ ބޮޑު ޚިޔާނާތަށް އަލިއަޅުއްވާލައްވަމުން އެމަނިކުފާނު ވިދާޅުވީ، އޭރުގެ ނައިބު ރައީސް އަޙްމަދު އަދީބުގެ މައްޗަށް ކުށް ސާބިތުވުމުން ވަގުތުން ފިޔަވަޅު އެޅުއްވި ކަމަށެވެ. ނަމަވެސް، ރައީސް ޞާލިޙުގެ ވެރިކަމުގައި އަދީބަށް މަޢާފުދެއްވައި ޖަލުން މިނިވަންކުރުމަކީ ބަލައިގަނެވޭނެ ކަމެއް ނޫންކަމަށް ވިދާޅުވެ، އެ ނިންމެވުމަށް ނުރުހުން ފާޅުކުރެއްވިއެވެ. ރައީސް ޞާލިޙު އޭރު ވިދާޅުވެފައިވަނީ އަދީބު މިނިވަންވި ނަމަވެސް، ދައުލަތަށް ގެއްލުނު ފައިސާ ހޯދުމުގެ މަސައްކަތަށް ސަރުކާރުން ހުރަސް ނާޅާނެ ކަމަށެވެ.

Advertisement
Ooredoo — Square (box)

ޚިޔާނާތުގެ މައްސަލަތަކުގައި އެހެން ބޭފުޅުންނަށް ޔާމީން ފާޑުވިދާޅުވިއިރު، އެމަނިކުފާނުގެ މައްޗަށް ވެސް ކޮރަޕްޝަނުގެ ބޮޑެތި ތުހުމަތުތަކެއް ކުރެވި ޝަރީޢަތްތައް ދަނީ ހިނގަމުންނެވެ. ފަތުރުވެރިކަމުގެ ބޭނުމަށް ވ. އާރަށް ކުއްޔަށް ދޫކުރުމުގެ މުޢާމަލާތާ ގުޅިގެން ދަށު ކޯޓުން އިއްވި 11 އަހަރުގެ ޖަލު ޙުކުމް، ގޯސްތަކެއް ހުރިކަމަށް ކަނޑައަޅައި ހައިކޯޓުން ބާޠިލުކޮށްފައިވީ ނަމަވެސް، އެ މައްސަލައިގެ ހެކިބަހާ ގުޅޭ ބައެއް އަންނަ މަހު ސުޕްރީމް ކޯޓުގައި ކުރިއަށް ގެންދިއުމަށް ވަނީ ތާވަލުކުރެވިފައެވެ. މީގެ އިތުރުން، އެމަނިކުފާނުގެ އަމިއްލަފުޅު އެކައުންޓަށް ޖަމާވި އެއް މިލިއަން ޑޮލަރުގެ މައްސަލައިގެ އިސްތިއުނާފު ވެސް ހައިކޯޓުގައި އޮތީ ނިމުމަކާ ގާތްވެފައެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.