ކޮވިޑް19އާ ގުޅިގެން އާމްދަނީ ނުލިބޭތީ މިއަންހެންމީހާ ކާރު ބަދަލުކޮށްލީ މާ ވިއްކާ ފިހާރައަކަށް
ކޮވިޑް19ގެ ބަލިމަޑުކަމަކީ އެތައް ބަޔަކަށް އެތައް ގޮތަކުން ދިރިއުޅުމަށް ބަދަލު ގެނައި ބަލިމަޑު ކަމެކެވެ. އިންޑިއާ ފަދަ ބޮޑެތި ގައުމުތަކުގައި ވެސް ހީނުކުރާހާ ދަރަޖައަށް މީހުންގެ ދިރިއުޅުމުގެ ޙާލަތު ވެއްޓިގެން ދިޔައެވެ. މަސައްކަތް ގެއްލި އާމްދަނީ ލިބޭނެ ގޮތެއް ނުވުމުން ، ކާނެ ފަދަ ނެތި އެތައް ބަޔަކު ނިކަމެތި ޙާލުގައި ޖެހުނެވެ. އަދި އާއިލާ ގާތަށް ދިޔުމަށް އެތައް ބަޔަކު ދިގު ރާސްތާތަކަށް ބައިސްކަލާއި ފައިމަގުގައި ދަތުރުކުރިއިރު ބައެއް މީހުން ވަނީ މިފަދަ ދަތުރުތަކުގައި މަރުވެފައެވެ.
މި ބަލިމަޑުކަމުގެ އަސަރު ނުފޯރާ އޮތީ މަދު ގައުމެކެވެ. ޖަޒީރާވަންތަ މަދު ގައުމަކަށް ނޫނީ މި ބަލިމަޑުކަމުގެ ތަޖުރިބާ ، ދުނިޔޭގެ ހުރިހާ ގައުމަކުން ވެސް ދަނީ ކުރަމުންނެވެ. އެކި މީހުން އެކި ގޮތަށެވެ. އެކި މިންވަރަށެވެ.
މިއީ ބްރެޒިލްގެ 51 އަހަރު އަންހެނެއްގެ ދިރިއުޅުމުގެ ޙާލަތު މިހާރު ހުރި ގޮތެވެ. ރިއަލްސްޓޭޓްގެ މަސައްކަތުގައި ހަރަކާތްތެރިވަމުން ދިޔަ މި އަންހެން މީހާއަށް ، ކޮވިޑް19އާ ގުޅިގެން އާމްދަނީ ލިބޭ ގޮތެއް ނެތުމުން އޭނާ ވަނީ އޭނާގެ ކާރު މާ ވިއްކާ ފިހާރައަކަށް ބަދަލު ކޮށްލާފައެވެ. 1969 ވަނަ އަހަރުގެ ބްރޭންޑެއް ކަމަށްވާ "ބީޓްލް"ގެ ފެހި ކުލައިގެ މިކާރު މިހާރު ޒީނަތްތެރި ވެފައި ވަނީ މަލުންނެވެ. ކާރުގެ ބޮނެޓާއި ޑިކީއާއި ފުރާޅަކީ ވެސް މިހާރު މަލުގެ ޝޯކޭސްތަކެވެ.
ބްރެޒިލްގެ މީޑިއާތަކަށް މައުލޫމާތު ދެމުން މި އަންހެން މީހާ ބުނީ ކޮވިޑްއާ ގުޅިގެން އޭނާއަށް ގޭގެ ކުލި ދެއްކޭނެ ގޮތެއް ވެސް ނެތް ކަމަށާ އެހެން ކަމުން މި މަސައްކަތަކީ އެފަދަ ކަންކަން ފޫބެއްދުމަށް ކުރަމުންދާ މަސައްކަތެއް ކަމަށެވެ. އަދި ވިޔަފާރި ވެސް ރަނގަޅު ކަމަށް ފާހަގަ ކުރަމުން އޭނާ ބުނެފައި ވަނީ މިހާރު އެ ސަހަރައްދުގެ މީހުންގެ އާންމު ވާހަކައަކަށް އޭނާގެ މަލުގެ ވިޔަފާރީގެ ވާހަކަ ވެފައިވާ ކަމަށެވެ.
