Sunday, 15 November 2026
Advertisement
STO — McCoy (leaderboard)
ދުނިޔެ

އިންޑިއާއިން އަޑިއަށްދިޔަ ބޯޓަކުން ޗައިނާގެ ދެ މީހަކު ސަލާމަތްކޮށް، އިތުރު މީހުން ހޯދުމުގެ މަސައްކަތް ފަށައިފި

އިންޑިއާގެ އިރުމަތީ އައްސޭރިފަށަށް ފެތުނު ޕެނަމާގެ ދިދަ ނަގާފައިވާ ކާގޯ ބޯޓެއްގައި ތިބި 24 ފަޅުވެރިންގެ ތެރެއިން ޗައިނާގެ ދެ މީހަކު ސަލާމަތްކޮށް، ގެއްލުނު މީހުން ހޯދުމުގެ މަސައްކަތް އިންޑިއާގެ ކޯސްޓްގާޑާއި ކަނޑުގެ ސިފައިން އާދީއްތަ ދުވަހު ފުޅާކޮށްފިއެވެ. ކޯސްޓްގާޑުން މަޢުލޫމާތު ދިން ގޮތުގައި އެ ބޯޓުގައި ޖުމްލަ 20 ޗައިނާ ރައްޔިތުން ތިއްބެވެ.

އިންޑިއާގެ މެރިޓައިމް އެޑްމިނިސްޓްރޭޝަންގެ ޑިރެކްޓަރ ޖެނެރަލް ޝިޔާމް ޖަގަންނާތަން ވިދާޅުވި ގޮތުގައި، ސަލާމަތްކުރެވުނު ޗައިނާގެ ދެ ފަޅުވެރިން ވަނީ، ހުކުރު ދުވަހު އެ ބޯޓު އަރިއަޅާލައި، އެންމެ އަށް މިނެޓުގެ ތެރޭގައި އަޑިއަށް ގޮސްފައިވާކަން ހާމަކޮށްފައެވެ. އަދި އޭގެ ސަބަބުން ފަޅުވެރިންނަށް މަޖުބޫރުވީ ބޯޓު ދޫކޮށްލާށެވެ.

ޝިޔާމް އިތުރަށް ވިދާޅުވީ، ހާދިސާއަށް 12 ގަޑިއިރު ފާއިތުވުމަށްފަހު މީހުން ދިރިތިއްބާ ފެނުމުގެ ފުރުސަތު އާންމުގޮތެއްގައި ވަރަށް ބޮޑަށް ކުޑަވެގެންދާނެ ކަމަށެވެ. ނަމަވެސް، މީހުން ސަލާމަތްކުރާ ޓީމުތަކުން އަދިވެސް ދަނީ މެދުކެނޑުމެއްނެތި އެ ސަރަޙައްދު ބަލައި ފާސްކުރަމުންނެވެ.

Advertisement
Ooredoo — Square (box)

އިންޑިއާގެ ކޯސްޓްގާޑުން ހާމަކޮށްފައިވާ ގޮތުގައި، "އޯޝަން ވިންނަރ" ނަމަކަށް ކިޔާ މި ބޯޓުން ގެއްލުނު 22 ފަޅުވެރިންގެ ތެރޭގައި ހިމެނެނީ ޗައިނާގެ 18 ރައްޔިތަކާއި، މިޔަންމާގެ ތިން ރައްޔިތެއްގެ އިތުރުން ބަންގްލަދޭޝްގެ ރައްޔިތެކެވެ.

މީސްމީޑިއާގައި އިންޑިއާގެ ކަނޑުގެ ސިފައިން އާންމުކުރި ޕޯސްޓެއްގައި ބުނެފައިވަނީ، ގެއްލިފައިވާ ފަޅުވެރިން ހޯދުމުގެ މަސައްކަތުގައި ކޯސްޓްގާޑާއެކު އެ އިދާރާއިން ވަރަށް ގާތުން ގުޅިގެން ހަރަކާތްތެރިވަމުން އަންނަ ކަމަށެވެ.

މީގެ އިތުރުން، ކޯސްޓްގާޑުގެ ތަރުޖަމާނަކު ވިދާޅުވީ، މީހުން ހޯދުމުގެ މި އޮޕަރޭޝަނަށް ސްރީ ވިޖަޔާ ޕުރަމް (ކުރިން ޕޯޓް ބްލެއަރގެ ނަމުން ނަންދެވިފައިވާ) އިން ކޯސްޓްގާޑުގެ ދެ އުޅަނދެއް މިހާރު ފޮނުވާފައިވާ ކަމަށެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.