އަމިއްލަ ކުއަންޓަމް ޓެކްނޮލޮޖީ އުފެއްދުމަށް ޑީއާރްޑީއޯ އިން 500 ކްރޯޑު ރުޕީސްގެ ފުރަތަމަ ޑީޕް-ޓެކް އެއްބަސްވުން ގާއިމުކޮށްފި

ޓެކްނޮލޮޖީ ޑިވެލޮޕްމަންޓް ފަންޑް (ޓީޑީއެފް) ސްކީމްގެ ދަށުން، ޑިފެންސް ރިސާޗް އެންޑް ޑިވެލޮޕްމަންޓް އޯގަނައިޒޭޝަން (ޑީއާރްޑީއޯ) އިން އެ އިދާރާގެ ފުރަތަމަ އަގުބޮޑު ޑީޕް-ޓެކް ޕްރޮޖެކްޓް އެއްބަސްވުމުގައި ސޮއިކޮށްފިއެވެ. ނިއު ދިއްލީގައި ސޮއިކުރެވުނު މި އެއްބަސްވުމަކީ ކުއަންޓަމް އެޕްލިކޭޝަންތަކަށް ބޭނުންވާ 20 މިލިކެލްވިން (އެމްކޭ) ގެ ޑައިލިއުޝަން ރެފްރިޖަރޭޓަރެއް އިންޑިއާގައި އަމިއްލައަށް އުފެއްދުމަށް، ރާޖަސްތާނުގެ އަލްވާރްގައި ގާއިމުވެފައިވާ ސްޓާޓްއަޕް ކުންފުންޏެއް ކަމަށްވާ 'ޒީރޯ އެމްކޭ އިންޑިއާ ޕްރައިވެޓް ލިމިޓެޑް' އާއެކު ވެވުނު އެއްބަސްވުމެކެވެ.

މި އެއްބަސްވުމުގައި ސޮއިކުރެއްވީ ޓީޑީއެފްގެ ޑިރެކްޓަރާއި ޒީރޯ އެމްކޭ އިންޑިއާގެ މަންދޫބުންނެވެ. މިއީ ޑީޕް-ޓެކް އަދި ޒަމާނީ ޓެކްނޮލޮޖީގެ މަޝްރޫއުތަކަށް އެހީތެރިވުމުގެ ގޮތުން އިންޑިއާގެ ޑިފެންސް މިނިސްޓަރު ރާޖްނާތު ސިންގް ހުއްދަދެއްވާފައިވާ 500 ކްރޯޑު ރުޕީސްގެ ފަންޑުގެ ދަށުން ވެވުނު ފުރަތަމަ ބޮޑު އެއްބަސްވުމެވެ.

ޑައިލިއުޝަން ރެފްރިޖަރޭޓަރަކީ މިލިކެލްވިން ރޭންޖުގައި އިންތިހާއަށް ފިނިހޫނުމިން ދަށްކޮށްދިނުމުގެ ގާބިލުކަން ލިބިފައިވާ ޚާއްސަ ކްރައިއޯޖެނިކް ނިޒާމުތަކެކެވެ. މިފަދަ ނުހަނު ދަށް ފިނިހޫނުމިނުގެ މާހައުލުތަކަކީ ކުއަންޓަމް ކޮމްޕިއުޓިންގ ޕްލެޓްފޯމްތަކާއި އެހެނިހެން ކުއަންޓަމް ޓެކްނޮލޮޖީތައް އޮޕަރޭޓްކޮށް ޓެސްޓުކުރުމަށް ކޮންމެހެން ބޭނުންތެރި މާހައުލުތަކެކެވެ.

20 އެމްކޭ ފަންތީގެ ޑައިލިއުޝަން ރެފްރިޖަރޭޓަރެއް އަމިއްލައަށް އުފެއްދުމުގެ މި މަސައްކަތަކީ ނޭޝަނަލް ކުއަންޓަމް މިޝަންގެ މަގުސަދުތަކާ ގުޅިފައިވާ ކަމެކެވެ. މީގެ ސަބަބުން ކުއަންޓަމް ޓެކްނޮލޮޖީއާއި، އެޑްވާންސް ކްރައިއޯޖެނިކްސް އަދި ސްޓްރެޓީޖިކް ޓެކްނޮލޮޖީގެ އެހެނިހެން ދާއިރާތަކުން އިންޑިއާގެ ގާބިލުކަން އިތުރުވެގެންދާނެ ކަމަށް ވަނީ ލަފާކޮށްފައެވެ. އަދި މި މަޝްރޫއުގެ އަމާޒަކީ ބޭރުން އެތެރެކުރާ ކްރައިއޯޖެނިކް ވަސީލަތްތަކަށް އިންޑިއާއިން ބަރޯސާވާ މިންވަރު ކުޑަކޮށް، ގައުމުގެ އެތެރޭގެ ކުއަންޓަމް ޓެކްނޮލޮޖީގެ އީކޯސިސްޓަމް ވަރުގަދަކުރުމެވެ.

މި ޕްރޮޖެކްޓްގައި ބައިވެރިވާ ޑީއާރްޑީއޯ އާއި، އިންޑަސްޓްރީގެ އިތުރުން އެހެނިހެން ހިއްސާދާރުންނަށް ޑިފެންސް މިނިސްޓަރު ރާޖްނާތު ސިންގް ވަނީ މަރުހަބާ ވިދާޅުވެފައެވެ. އަދި މި ޕާޓްނަރޝިޕަކީ ކުރިމަގުގައި އައު ޓެކްނޮލޮޖީގެ ދާއިރާތަކުން ޑީއާރްޑީއޯ އާއި އިންޑަސްޓްރީ ގުޅިގެން މަސައްކަތްކުރުމަށް ހުޅުވިގެންދާ މުހިންމު މިސާލަކަށް ވެގެންދާނެކަމުގެ ޔަގީންކަން އޭނާ ފާޅުކުރެއްވިއެވެ.

މީގެ އިތުރުން ޑިފެންސް ސެކްރެޓަރީ އަދި ޑިޕާޓްމަންޓް އޮފް ޑިފެންސް އާރްއެންޑްޑީގެ ސެކްރެޓަރީ، އަދި ޑީއާރްޑީއޯގެ ޗެއާމަން ރާޖޭޝް ކުމާރު ސިންގް ވެސް ވަނީ މިކަމުގައި ޝާމިލުވާ ޓީމުތަކަށް މަރުހަބާ ވިދާޅުވެ، މަޝްރޫއުގެ އަމާޒުތައް ހާސިލުކުރުމުގައި ކާމިޔާބީއަށް އެދިވަޑައިގެންފައެވެ.

ސޮއިކުރުމުގެ ރަސްމިއްޔާތުގައި ޑިރެކްޓަރ ޖެނެރަލް، މައިކްރޯ އިލެކްޓްރޯނިކް ޑިވައިސް އެންޑް ކޮމްޕިއުޓޭޝަނަލް ސިސްޓަމް އެންޑް ސައިބަރ ސެކިއުރިޓީ (ޑީޖީ އެމްސީސީ) އާއި، ޑިރެކްޓަރ ޖެނެރަލް، ޓެކްނޮލޮޖީ މެނޭޖްމަންޓް (ޑީޖީ ޓީއެމް) ގެ އިތުރުން ސޮލިޑް ސްޓޭޓް ފިޒިކްސް ލެބޯރެޓަރީ (އެސްއެސްޕީއެލް) ގެ ޑިރެކްޓަރާއި އެހެނިހެން އިސް ފަރާތްތައް ބައިވެރިވެވަޑައިގަތެވެ. މި މަޝްރޫއު މޮނިޓަރކޮށް، އިރުޝާދުދީ، އެހީތެރިކަން ފޯރުކޮށްދެމުންދާނީ އެސްއެސްޕީއެލްގެ ޑިރެކްޓަރާއި އޭނާގެ ޓީމުންނެވެ.