ޓެކްސް ދައްކާ ފަރާތްތަކަށް ލުއި ފަސޭހަކޮށްދިނުމަށް "މޯލްޑިވްސް ގެސްޓް އިންފޮމޭޝަން ސިސްޓަމް" ތައާރަފްކޮށްފި
ޓެކްސް ދައްކާ ފަރާތްތަކަށް ލުއިފަސޭހަ ހިދުމަތްތަކެއް ފޯރުކޮށްދިނުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން ކުރަމުންދާ މަސައްކަތްތަކުގެ ތެރެއިން، "މޯލްޑިވްސް ގެސްޓް އިންފޮމޭޝަން ސިސްޓަމް" (އެމްޖީއައިއެސް)ރަސްމީކޮށް އިފުތިތާހުކޮށްފިއެވެ.
މި ސިސްޓަމް އިފުތިތާހުކޮށްދެއްވީ މިކަމަށްޓަކައި އެކަމަށް ބޭއްވި ހާއްސަ ރަސްމިއްޔާތެއްގައި، ފިނޭންސް މިނިސްޓަރު ހަސަން ޒަރީރެވެ.
މި ސިސްޓަމް ތަޢާރަފުކުރުމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ޓޫރިސްޓް އެސްޓެބްލިޝްމަންޓްތަކަށް އަންނަ ފަތުރުވެރިންގެ މައުލޫމާތު މި ސިސްޓަމް މެދުވެރިކޮށް ހުށަހެޅޭނެއެވެ. އަދި މި ސިސްޓަމުން މަޢުލޫމާތު ހުށަހެޅުމުން، ޓޫރިޒަމް މިނިސްޓްރީއަށް ހުށަހަޅަންޖެހެ މައުލޫމާތު އެ މިނިސްޓްރީއަށް ވެސް ހުށަހެޅުނީ ކަމުގައި ބެލެވޭނެއެވެ.
މީރާއިން ހާމަކުރާގޮތުގައި، މި އައު އިންތިޒާމުގެ ސަބަބުން ޓޫރިސްޓް އެސްޓެބްލިޝްމަންޓްތަކުން މައުލޫމާތު ހުށަހެޅުމުގެ އިލްތިޒާމު ފުރިހަމަކުރުމަށް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ. އަދި މި ސިސްޓަމް ޓޫރިސްޓް އެސްޓެބްލިޝްމަންޓްތަކުގެ ސިސްޓަމާ އިންޓަގްރޭޓްކުރުމުން، މައުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތް ނިމުމަކަށް އަންނާނެއެވެ.
މި ސިސްޓަމަކީ ހުރިހާ ފަރާތްތަކަށް ހުޅުވާލެވިފައިވާ ސިސްޓަމެއް ކަމުގައި ވިޔަސް، ޓެކްސްދައްކާ ފަރާތްތައް އޮންބޯޑް ކުރުމުގައި މީރާއިން އިސްކަންދޭނީ ޓެކްސް ދައްކާ ފަރާތްތައް ދެބަޔަކަށް ބަހާލައިގެން ކަމަށް މިީރާއިން ބުންޏެވެ. އެގޮތުން ރިސޯޓްތަކާއި، ހޮޓާތަކާއި، އަދި 50އެނދަށްވުރެ މަތީގެ ގެސްޓްހައުސްތަކުން، 1ނޮވެމްބަރ 2026އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ފަށަން ޖެހޭއިރު، ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން، 1ޖެނުއަރީ 2027އިން ފެށިގެން ހިނގާ މުއްދަތުތަކުގެ މަޢުލޫމާތު މި ސިސްޓަމް މެދުވެރިކޮށް ރިޕޯޓްކުރަން ޖެހޭނެ ކަމަށް މީރާއިން ބުންޏެވެ.
މި އައު ސިސްޓަމް ތަޢާރަފުކުރި ނަމަވެސް، ގްރީން ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް އެއްވެސް ބަދަލެއް ނާންނާނެއެވެ. އަދި ކުރިއެކޭ އެއްފަދައިން ގްރީން ޓެކްސް ރިޓާން ހުށަހެޅުމާއި ފައިސާ ދެއްކުން ކުރިއަށް ދާނީ "މީރާކަނެކްޓް"މެދުވެރިކޮށެވެ.
ނަމަވެސް، މި ސިސްޓަމަށް މަޢުލޫމާތު ރިޕޯޓް ކުރުމުން، އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރާކަށް ނުޖެހޭނެއެވެ. އޭގެ ބަދަލުގައި ބަޔާން ހުށަހަޅާއިރު އެ މައުލޫމާތު ގްރީން ޓެކްސް ބަޔާނަށް ޕްރީފިލް ކޮށްދޭނެ ކަމަށްވެސް މީރާއިން ބުންޏެވެ.
