އަނެއްކާވެސް ސެމްސަންގުން އެޕަލް އަށް ވައްބަހުން ޖަހައިފި
އެޕަލްއާ ސެމްސަންގުގެ ވާދަވެރިކަމުގެ ވާހަކަ އަކީ އައު ވާހަކައެއް ނޫނެވެ. މި ދެ ބްރޭންޑުގެ ފޭނުންވެސް ވަރަށް ގިނައިން ބަހުސް ކުރާ މަންޒަރު ފެނެއެވެ.
އެޕަލް އިން އެންމެ ފަހުން ނެރުނު އައިފޯން 12އާއެކު ޗާޖަރާއި ހެޑްސެޓު ނުދޭތީ އެކަމާ އެޕަލްގެ ގިނަ ކަސްޓަމަރުން ވެސް ވަނީ ކަންބޮޑުވުން ފާޅު ކޮށްފައެވެ. އަދި އެކަމާ ސެމްސަންގު ބޭނުންކުރާ ފަރާތްތަކުން އެޕަލް ބޭނުންކުރާ މީހުންނަށް މީސްމީޑިއާގައި ދިމާކޮށް ވެސް ހެދިއެވެ.
އެޕަލް އިން އައިފޯން 12އާއެކު ޗާޖަރު ނުދޭކަން ހާމަކުރުމުން ސެމްސަންގުގެ އޮފިޝަލް ފޭސްބުކް އެކައުންޓުގައި އެމީހުން ވަނީ ވަރުގަދަ ޕޯސްޓެއް ޖަހާފައެވެ. އެ ޕޯސްޓުގައި ބުނެފައިވަނީ ސެމްސަންގުން އައިފޯން ބޭނުންކުރާ ފަރާތްތަކުން ހޯދަން އުޅޭ އެޑަޕްޓަރު ލިބޭނެ ކަމަށެވެ. އަދި އެ އެޑަޕްޓަރަކީ އައިފޯން ބޭނުންކުރާ ފަރާތްތަކަށް ވެސް ބޭނުން ކުރެވޭނެ އެޑަޕްޓަރެއް ކަމަށް އެ ޕޯސްޓުގައި ބުނެފައިވެއެވެ.
މި ބީދައިން ސެމްސަންގުން ޕޯސްޓު ކުރުމުން އެތައްބަޔަކު ވަނީ އެ ޕޯސްޓު ޝެއަރކޮށް އައިފޯނަށް ޖޯކު ޖަހައިފައެވެ.
އަނެއްކާވެސް ސެމްސަންގުން މިވަނީ އެޕަލް އަށް ވައްބަހުން ޖަހާ ޕޯސްޓެއް ކޮށްފައެވެ. އެ ޕޯސްޓުގައި ބުނެފައިވަނީ ސެމްސަންގުން ވަކިން އެއްޗެހި ނުވިއްކާ ކަމަށެވެ. އަދި އިތުރު އަގަކާ ނުލާ ސެމްސަންގުން ފޯނާއެކު ޗާޖަރާއި ހެޑްސެޓް ލިބޭނެ ކަމަށް އެ ޕޯސްޓުގައި ބުނެފައިވެއެވެ.
ސެމްސަންގުން އެ ބްރޭންޑުގެ އެންމެ ފަހުގެ ފޯނު ނޯޓް 20އާއެކު ހިއްސާ ކޮށްފައިވާ މި ޕޯސްޓު ގިނަ ބަޔަކު ވަނީ ހިއްސާ ކޮށްފައެވެ.
