ކަރަންޓު ކެނޑުމުންވެސް އޮންލައިންކޮށް ދެވުނު ހިދުމަތްތައް މެދު ނުކެނޑޭ: އެންސީއައިޓީ
މިއަދު ހެނދުނު މުޅި މާލެއިން ކަރަންޓު ކެނޑުމުގެ ސަބަބުން ވެސް ސަރުކާރުގެ އޮންލައިންކޮށް ހިދުމަތް ދެވޭ އެއްވެސް ހިދުމަތެއް މެދުނުކެނޑި ދެވުނު ކަމަށް ކޮމިއުނިކޭޝަން، ސައިންސް، އެންޑް ޓެކްލޮނޮޖީ މިނިސްޓްރީ އިން ވިދާޅުވެއްޖެއެވެ.
ކޮމިއުނިކޭޝަން މިނިސްޓްރީން މިއަދު ކުރެއްވި ޓުވީޓެއްގައި ބުނެފައިވަނީ، މިއަދު ކަރަންޓުގެ ހިދުމަތަށް ބުރޫ އެރިކަމުގައި ވީނަމަވެސް މެދުކެނޑުމެއްނެތި ގަވް.އެމްވީ ގެ ހިދުމަތްތައް ދެވުނު ސަބަބަކީ، މިސަރުކާރުގެ ކުރީކޮޅު ނޭޝަނަލް ސެންޓާ ފޮ އިންފޮމޭޝަން ޓެކްނޮލޮޖީ (އެންސީއައިޓީ) ގެ ޑޭޓާ ސެންޓަރުގެ ޕަވާ ސިސްޓަމް ވަރުގަދަ ކުރެވެމުން ކަމަށެވެ.
އަދި މިއަދު ވެސް ހިދުމަތްތައް މެދު ނުކެނޑި ދެވިފައި ވަނީ އެންސީއައިޓީގެ ހީވާގި މުވައްޒަފުންގެ ބުރަ މަސައްކަތުގެ ސަބަބުން ކަމަށް ވެސް ކޮމިއުނިކޭޝަން މިނިސްޓްރީން ބުނެފައި ވެއެވެ.
މުވާސަލާތީ ހިދުމަތްތަކާއި، ސަރުކާރުގެ އޮންލައިން ހިދުމަތްތައް ވަރުގަދަ ކުރުމަށް ސަރުކާރުން، ކޮމިއުނިކޭޝަން، ސައިންސް، އެންޑް ޓެކްނޮލޮޖީގެ ނަމުގައި މިނިސްޓްރީއެއް އުފެއްދި ނަމަވެސް ހިދުމަތްތަކުގެ ފެންވަރު ރަނގަޅު ނުވާ ކަމުގެ ޝަކުވާ އާންމުންގެ ތެރޭގައި ވަރަށް ބޮޑެވެ.
