ރާއްޖެއަށް ބޭނުން ވަނީ ބާރުގަދަ ގައުމުތަކަށް އަޅުވެތިވެ އިސްދަށަށް ޖަހައިގެން ތިބޭނެ ވެރިންނެއް ނޫން: ޝައިޚް ޝަފީޢު
ދިވެހިރާއްޖެއަށް ބޭނުން ވަނީ ގައުމުގެ ކަރާމަތާއި ޢިއްޒަތް ހިފަހައްޓާނެ ވެރިން ކަމަށާއި ބާރުގަދަ ގައުމުތަކަށް އަޅުވެތިވެ އިސްދަށަށް ޖަހައިގެން ތިބޭނެ ވެރިންނެއް ނޫން ކަމަށް ޝައިޚް ޢަބުދުﷲ ޝަފީޢު ވިދާޅުވެއްޖެއެވެ.
ރާއްޖޭގައި އިންޑިއާ ސިފައިން ގާއިމުވެ ތިބޭތީ އެކަމާ އާންމުންގެ ގިނަ ބަޔަކު ދެކޮޅު ހަދަމުންދާ މިދަނޑިވަޅުގައި ޝައިޚް މިހެން ވިދާޅުވީ އެމަނިކުފާނު ކުރެއްވި ޓްވީޓެއްގައެވެ. ޝައިޚްގެ މި ޓްވީޓްގައި އިނގެރޭސީން އަޑީއޮވެ ރާއްޖޭގެ ދެކުނުގައި އުފެއްދި ގައުމު"ޔުނައިޓެޑް ސުވަދީބު އައިލެންޑްސް" އުވި ، އެ ގައުމުގެ ވެރިޔާ އަދި އައްޑޫގައި ތިބި އިނގެރޭސި ސިފައިންގެ ސެކްރެޓަރީ ޢަބުދުﷲ ޢަފީފާމެދު އިނގެރޭސީން ކަންތައްކުރި ގޮތާ އޭގެ ފަހުން ހިނގާދިޔަ ކަންކަމުގެ ވާހަކަ ގެނެސް ދެއްވާފައިވެއެވެ.
އެގޮތުން މާލޭގައި ހުންނަ އިނގެރޭސި ސަފީރު ޑޭވީ ، ރައީސް ނާސިރާ ބައްދަލު ކުރައްވާ އިނގެރޭސި ސަރުކާރަށް ސިޓީއެއް ރައްދު ކުރިކަމަށާއި އޭގައި އޮތީ އިނގެރޭސި ސަރުކާރުން ޢަބުދުﷲ ޢަފީފް ، ސީޝެލްސަަށް ގެންދިޔަ ވާހަކަ ކަމަށް ބުނެފައި ވެއެވެ.
"ފުރަތަމަ ވެސް ނާސިރު ޑޭވީ ކުރެން އެއްސެވީ މާލޭގައިވާ ދިވެހި ސަރުކާރު ނޫން ސަރޔކާރެއް އިނގެރޭސީން ގަބޫލު ނުކުރާނެ ކަމަށް ލިޔުމުން ދިވެހި ސަރުކާރަށް ވަނީ ޔަގީންކަން ދީފައި ނޫން ހެއްޔެވެ؟ އެހެން އެކަން އޮއްވާ ދިވެހި ސަރުކާރަށް އެނގުމަކާ ނުލާ ޢަބުދުﷲ ޢަފީފާ އޭނާގެ ޢާއިލާ ދިވެހިރާއްޖޭގެ ސަރަހައްދުން ބޭރަށް ގެންގޮސްގެން ނުވާނެ ނޫންހެއްޔެވެ؟ އެކަން އެގޮތަށް އެކުރީ ކީއްވެ ހެއްޔެވެ؟" އެ ހާދިސާ ހިނގިގޮތް ޝަފީޢު ލިޔުއްވާފައި ވެއެވެ.
އޭގެ ފަހުން ޑޭވީ ރުޅިއައިސް "ތިމަންނާމެން ބޭނުން މީހަކު ބޭނުން ތާކަށް ގެންދާނެ ކަމަށާއި ރާއްޖެއަކީ އިނގެރޭސީންގެ ހިމާޔަތުގައި އޮތް ގައުމެއް ކަމުން ދިވެހިންނަށް ކުރެވޭނެ އެއްވެސް ކަމެއް ނޯންނާނެ" ބުނި ކަމަށާ އެކަމަށް ރައީސް ނާސިރު ދެއްވި ޖަވާބު ކިޔައި ދެއްވާފައިވެއެވެ.
"އިނގެރޭސިން ބޭނުންހާ ގޮތެއް ދިވެހީންނަކަށް ނުހެދޭނެއެވެ. ހެދޭނެ ކަމަށް ވަންޏާ ދިވެހިންނަށް ވެސް ހެދޭނެ ގޮތްތައް ވެސް ހުންނާނެއެވެ.ކުރެވޭނެ ކަންތައް ވެސް ނެތިއެއް ނުދާނެއެވެ. ހިމާޔަތުގެ ވާހަކަ އިނގެރޭސީން ތިގޮތަށް ދައްކާ ކަމަށް ވަންޏާ ނުވަތަ ހިމާޔަތާމެދު ތިގޮތަށް އިނގެރޭސީން ދެކޭ ކަމަށް ވަންޏާ ތިޔަ ހިމާޔަތުގެ ދަށުގައި އެންމެ ހިނދުކޮޅަކު ތިބޭކަށް ވެސް ދިވެހިން ބޭނުމެއް ނޫނެވެ. ހަމަ މިހާރު ތިޔަ ހިމާޔަތުގެ ދަށުން ވަކިވާން ބޭނުމެވެ. ހަނދާން ކުރާށެވެ! އިނގެރޭސިންގެ ހިމާޔަތުގެ ދަށުން ދިވެހިން ވަކިވާން ބޭނުންވާ ވާހަކަ ދައްކަން އިނގެރޭސި ސަރުކާރުން އެއްބަސްނުވާހާ ހިނދަކު އިނގެރޭސީންނާ އެއްވެސް ވާހަކައެއް ދެއްކުން މީގެ ފަހުން ނެތީއޭ" ވިދާޅުވެ ބައްދަލުވުން ނިންމާ ނިކުމެ ވަޑައިގަތީއެވެ. އޭގެ ފަހުން އިނގެރޭސީންގެ ހިމާޔަތުން ވަކިވާ ވާހަކަ ދެއްކުމަށް އެއްބަސްވުމުން ނޫނީ ޑޭވީއަށް އަދި އިނގެރޭސި ސަރުކާރު ތަމްސީލް ކުރާ އެކަކަށް ވެސް ރައީސް ނާސިރު އެޕޮއިންޓްމަންޓެއް ދެއްވާފައެއް ނުވެއެވެ.
ގައުމުގެ ކަރާމަތާއި ޢިއްޒަތް ހިފެހެއްޓުމަށް ރައީސް ނާސިރު ކުރެއްވި މަސައްކަތް ފާހަގަ ކުރައްވަމުން ޝައިޚް ޝަފީޢު ވިދާޅުވީ އެމަނިކުފާނަށް ފަހު ވެސް ދިވެހި ގައުމު އެފަދަ އެހެން ވެރިޔަކު ދެކެފައިވާ ކަމަށެވެ.
"ރައީސް ނާސިރަށްފަހު ވެސް ދިވެހި ގައުމު އެފަދަ އެހެން ވެރިޔަކު ދެކެފައިވޭ ، ނަމަވެސް" ޝަފީޢު ވިދާޅުވެފައި ވެއެވެ.
