ލޮނުޒިޔާރަތް ޕާކަށް ގެއްލުންދޭނަމަ ފިޔަވަޅު އަޅާނަން: މާލެ ސިޓީ ކައުންސިލު
ލޮނުޒިޔާރަތް ޕާކުގައި ހުރި ގަހަކަށް، ހަދާފައި ހުރި އިމާރާތަކަށް، ނުވަތަ އެއްވެސް އެއްޗަކަށް ވެސް ގެއްލުން ދީފިނަމަ، އެމީހަކާއިމެދު ފިޔަވަޅު އަޅާނެކަމަށް މާލެ ސިޓީ ކައުންސިލުން ބުނެފިއެވެ.
ލޮނުޒިޔާރަތް ޕާކު އިއްޔެ ހުޅުވުމާ ގުޅިގެން ސިޓީ ކައުންސިލުން ވަނީ އެޕާކުގައި އުޅޭއިރު ޢަމަލު ކުރަންވީ ގޮތްތަކަކާއި ޕާކު ހުޅުވާފައި ހުންނާނެ ގަޑިތައް ވެސް އާއްމު ކޮށްފައެވެ.
އެގޮތުން ލޮނުޒިޔާރަތް ޕާކު ހުޅުވާފައި ހުންނާނީ ފަތިހު 4:30 ން ފެށިގެން ހެނދުނު 9:30 އަށް ކަމަށާއި އަދި ހަވީރު 4:30 ން ރޭގަނޑު 9:30 އަށް ކަމަށް ސިޓީ ކައުންސިލުން ހާމަ ކޮށްފައިވެއެވެ.
ޕާކުތެރޭގައި ކުނިއަޅަން ވާނީ އެކަމަށް ޚާއްސަކޮށް ބަހައްޓާފައި ހުރި ކުނިއަޅާ ވަށިގަނޑުތަކަށް ކަމަށާއި، ޕާކަށް ދާއިރު ފެން އެޅުމަށްޓަކައި ފެން އަޅާ ފުޅި އަމިއްލައަށް ގެންނަން ވާނެކަމަށް ސިޓީ ކައުންސިލުގެ އުސޫލުގައިވެއެވެ. އަދި ޕާކުތެރެއަށް އެއްވެސް ބާވަތެއްގެ ކާބޯތަކެތި ވައްދައި ކައިބޮއެ ހެދުމަކީ މަނާކަމެއް ކަމުގައިވެސް ބުނެފައިވެއެވެ.
މާލެ ސިޓީ ކައުންސިލުގެ މޭޔަރ ޝިފާ މުޙައްމަދު ވިދާޅުވީ ލޮނުޒިޔާރަތް ޕާކަކީ ފަތިސް ގަޑީގައި އުމުރުން ދުވަސްވީ މީހުން ކަސްރަތު ކުރުމަށް ވެސް މުހިއްމު ތަނަކަށް ވެގެންދާނެ ކަމަށާއި، ރައްކާތެރިކަމުގެ ފިޔަވަޅެއްގެ ގޮތުން މިދުވަސްވަރު ޕާކަށް އަންނަ މީހުންގެ ނަންނޯޓު ކުރަމުންދާނެ ކަމަށެވެ. އަދި ޕާކް ބެލެހެއްޓުމުގައި ސިޓީ ކައުންސިލުގެ އިތުރުން ރައްޔިތުންގެ އެއްބާރުލުން ދިނުމަށް ވެސް ޝިފާ އިލްތިމާސް ކުރައްވާފައިއެވެ.
Ads by STO
