ވޯޓް އޮޅުވާލިކަން ސާބިތުކޮށްދީފިނަމަ 1 މިލިޔަން ޑޮލަރު
އެމެރިކާގެ ރިޔާސީ އިންތިޚާބުގައި އޮޅުވާލުން ތަކެއް ހުރި ކަމަށް އިންތިޚާބުން ބަލިވެ ވަޑައިގަތް އެމެރިކާގެ މިހާރުގެ ރައީސް ޑޮނާލްޓް ޓްރަންޕް ބުނަމުންދާ ދަނޑިވަޅެއްގައި، އެކަން މީހަކު ސާބިތު ކޮށްދީފިނަމަ އެމީހަކަށް 1 މިލިޔަން ޑޮލަރު ހަދިޔާއަކަށް ދެއްވާނެ ކަމަށް، ޓްރަންޕްގެ ޕާޓީ ރިޕަބްލިކަން ޕާޓީއަށް ނިސްބަތްވެ ވަޑައިގަންނަވާ ޓެކްސަސްގެ ލޫޓެނަންޓް މޭޔަރ ޑޭން ޕެޓްރިކް ވިދާޅުވެއްޖެއެވެ.
އެމެރިކާގެ ރޭޑިއޯ ޗެނަލް އަކަށް ދެއްވި އިންޓަރވިއުއެއްގައި ޕެޓްރިކް ވިދާޅުވީ، އެމެރިކާގެ ވޯޓް ލާ ނިޒާމަކަށް ރައްޔިތުންގެ މެދުގައި އޮތް އިތުބާރު ގެއްލިފައިވާ ކަމަށެވެ. އަދި މި އިތުބާރު އިޔާދަ ކުރެވޭނީ ވޯޓްގައި އޮޅުވާލި އޮޅުވާލުންތައް ފަޅާ އަރުވާލާ، އަދި ދެވަނަ ފަހަރަށް އެފަދަ ކަމެއް ތަކުރާރު ނުވާ ގޮތަށް ކަންތައްތައް ތަރުތީބު ކުރެއްވެމުން ކަމަށެވެ.
މިމޭރުމުން ވާހަކަފުޅު ދައްކަވަމުން ޕެޓްރިކް ވިދާޅުވީ، އިންތިޚާބުގައި އޮޅުވާލިކަން ކޯޓްގައި ސާބިތުކޮށްދީފި މީހަަކަށް 1 މިލިޔަން ޑޮލަރު ދެއްވާނެ ކަމަށެވެ. އަދި އެފައިސާ ދެއްވާނީ އަމިއްލަ ޖީބުން ކަމަށް ވެސް ޕެޓްރިކް ވިދާޅުވިއެވެ.
އިންތިޚާބުގެ ކުރިން ވެސް، ޕެޓްރިކް ވަނީ އޭނާ އިންތިޚާބު ޤަބޫލު ނުކުރައްވާނެ ކަމަށް ވިދާޅުވެފައެވެ. އަދި މިހާރު އެމެރިކާގެ ނިޒާމު އޮންނަ ގޮތުން ވޯޓް އޮޅުވާލަން ފަސޭހަ ވާނެ ކަމަށް ވެސް އެމަނިކުފާނު ވިދާޅުވިއެވެ.
އެމެރިކާގެ ރިޔާސީ އިންތިޚާބުން ރައީސް ޓްރަންޕް ބަލިވެވަޑައިގަތުމުން ބަލި ޤަބޫލު ނުކުރައްވާ އިންތިޚާބު އޮޅުވާލި ކަމަށް ދަނީ ތަކުރާރުކޮށް ވިދާޅުވަމުންނެވެ. އަދި ވޯޓް ލީ ވަގުތު، ހިނގި ޝައްކުވާ ޒާތުގެ ކަންކަން އެނގޭނަމަ، އެކަންތައް ރިޕޯޓް ކުރުމަށް ޓްރަންޕްގެ ކެންޕެއިންއިން ވަނީ ގުޅޭނެ ޚާއްސަ ނަންބަރެއް ހަދާފައެވެ. ނަމަވެސް ގިނަ ބަޔަކު ޖެއްސުން ކުރުމުގެ ގޮތުން ގުޅަމުންދާކަމަށް ޓްރަންޕްގެ ކެންޕެއިން ޓީމުން ބުނެއެވެ.
