މަތިންދާ ބޯޓެއްގެ ބައިތައް އދ އަތޮޅު ފަޅުރަށެއް ކައިރިން ވެސް ފެނިއްޖެ
މަތިންދާ ބޯޓުގެ ބައިތަކެއް ކަމަށް ބެލެވޭ ބައިތަކެއް އދ އަތޮޅުގެ ފަޅުރަށެއް ކައިރިން ފެނިފައިވާ ކަމަށް އދ އަތޮޅުގެ ބަޔަކު ބުނެފިއެވެ.
އޮންލައިން ނޫސް "ސަން" އަށް އދ.ހަންޏާމީދޫ ބަޔަކު މައުލޫމާތު ދީފައިވާ ގޮތުގައި، އެ މަތިންދާބޯޓްގެ ބައިތައް ފެނިފައި ވަނީ، އެ ރަށާ ކައިރީ އޮންނަ ފަޅުރަށެއް ކަމުގައިވާ ފަޅުރަށެއް ކަމަށްވާ އަލިކޮއިރަށަށް ދަތުރު ދިޔަ ބަޔަކަށް ކަމަށެވެ. އަދި އެތަކެތި ފެނިފައި ވަނީ އޮޔާ ދަނިކޮށް ކަމަށް ވެސް ދަތުރު ދިޔަ މީހަކު ބުނެެފައި ވެއެވެ.
އޮންލައިން ނޫސް "ސަން" އަށް މައުލޫމާތު ދިން ބަޔަކު ބުނެފައި ވަނީ، އެތަކެތި އަދިވެސް ހުރީ އދ އަލިކޮއިރަށުގައި ކަމަށާއި، މިއަދާ ހަމައަސް ވެސް އެކަމުގެ މައުލޫމާތު ނުދީ ހުރީ އެއީ މާބޮޑު ކަމެއް ކަމަށް ނުދެކުމުން ކަމަށެވެ. އެހެން ނަމަވެސް އިއްޔެ ދ އަތޮޅުން ވެސް މަތިންދާ ބޯޓުގެ ބައިތަކެއް ފެނުމުން، އަލިކޮއިރަށުން ފެނުނު އެތަކެތީގެ މައުލޫމާތު އދ މަހިބަދޫ ކައުންސިލަށް ހިއްސާ ކުރަން ނިންމީ ކަމަށް ވެސް އެމީހުން ބުނެފައި ވެއެވެ.
އދ މަހިބަދޫ ކައުންސިލްގެ ނައިބު ރައީސް ވަނީ އޮންލައިން ނޫސް "ސަން" އަށް މިފަދަ މައުލޫމާތުތަކެއް އަދި ފޮޓޯތަކެއް ވެސް ލިބިފައިވާކަން ޔަގީން ކޮށްދީފައެވެ. އެކަމާ ގުޅޭ ގޮތުން ކައުންސިލްގެ އިތުރު ބަހެއް އަދި ލިބިފައެއް ނުވެއެވެ.
