ފަރުދުންގެ އާމްދަނީން ނަގާ ޓެކުހުން 95 މިލިއަން ރުފިޔާ ލިބޭނެ ކަމަށް ލަފާކޮށްފި
އަންނަ އަހަރަށް ލަފާކޮށް ރައްޔިތުންގެ މަޖިލީހުން ހުށަހަޅާފައިވާ 34.78 ރުފިޔާގެ ބަޖެޓުގައި، އިންކަމް ޓެކުހުެ ގޮތުގައި 95 މިލިއަން ރުފިޔާ ލިބޭނެކަމަށް ލަފާކޮށްފިއެވެ.
އިންކަމް ޓެކްސް ނެގުމުގެ ގާނޫނު 2019 ވަނަ އަހަރުގެ ޑިސެމްބަރު މަހުގައި ރައީސް ތަސްދީގުކޮށްދެއްވާފައިވާއިރު، އިންކަމް ޓެކްސްގެ ގާނޫނުގެ ދަށުން މިއަހަރުގެ ޖެނުއަރީން ފެށިގެން ފަރުދުންގެ އާމްދަނީން ޓެކްސް ނަގަން ވަނީ ފަށާފައެވެ. ފަރުދުންގެ އާމްދަނީން ޓެކްސްގެ ބައިގައި ހިމެނެނީ މުސާރަ ނުވަތަ އުޖޫރަ ނޫން ގޮތްގޮތަށް ލިބޭ އާމްދަނީއެވެ.
ފަރުދުންގެ އާމްދަނީ ޓެކްސް ނަގަމުން އަންނަ ފަސް ބްރެކެޓު:
- - 60،000 ރުފިޔާ އިން ދަށުގެ އާމްދަނީ - 0 ޕަސެންޓު
- - 60،000 އާއި 100،000 ރުފިޔާއާ ދެމެދުގެ އާމްދަނީ: 5.5 ޕަސެންޓު
- - 100،00 އާއި 150،000 ރުފިޔާއާ ދެމެދުގެ އާމްދަނީ: އަށް ޕަސެންޓު.
- - 150،000 އާއި 200،000 ރުފިޔާއާ ދެމެދު އާމްދަނީ އިން 12 ޕަސެންޓު
- - 200،000 ރުފިޔާ އިން މަތީގެ އާމްދަނީ އިން 15 ޕަސެންޓު
2021 ވަނައަހަރުގެ ބަޖެޓަށް، ބިޒްނަސް އަދި ޕްރޮޕަޓީ ޓެކުހުގެ ގޮތުގައި ދެ ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު ފަރުދުންގެ އާމްދަނީ އިން 95 މިލިއަނަށް ވުރެ ގިނަ ރުފިޔާ ލިބޭނެކަމަށް ލަފާކޮށްފައި ވެއެވެ. އަދި ޖީއެސްޓީގެ ގޮތުގައި ލަފާކޮށްފައިވަނީ ހަތަރު ބިލިއަން އަންނަ އަހަރު ލިބޭނެ ކަމަށެވެ.
އަދި ހަމައެހެންމެ ޓެކްސް ނޫން ގޮތް ގޮތުން ފަސް ބިލިއަނަށްވުރެ ގިނަ ރުފިޔާ ލިބޭނެ ކަމަށް ލަފާކޮށްފައިވާއިރު ހިލޭ އެހީގެ ގޮތުގައި ދެ ބިލިއަނަށްވުރެ ގިނަ ރުފިޔާ ލިބޭނެ ކަމަށް ވަނީ ލަފާކޮށްފައެވެ.
2021 ވަނައަހަރުގެ ބަޖެޓު މަޖިލީހަށް ހުށަހެޅުމާއެކު ފިނޭންސް މިނިސްޓަރު އިބްރާހީމް އަމީރު ވިދާޅުވީ އަންނަ އަހަރަކީ ވެސް އާމްދަނީގެ ގޮތުން ތަދު އަހަރަކަށް ވެގެން ދާނެކަމަށެވެ. އެގޮތުން އަންނައަހަރުގެ އާމްދަނީއާއި ހިލޭ އެހީގެ ގޮތުގައި ލިބޭނީ 17.8 ބިލިއަން ރުފިޔާ ކަމަށް ލަފާކުރެވޭ ކަމަށް ވެސް މިނިސްޓަރ އަމީރު ވަނީ ވިދާޅުވެފައެވެ.
