ގެއްލިގެން އުޅުނު ހަޤީޤީ ލޯބިވެރިޔާ ފެނިއްޖެތަ؟
މި ދައްކަން އުޅެނީ ކޮން ވާހަކައެއް ކަން ސުރުޚީ އިން ވެސް ގިނަ ބަޔަކަށް ފަހުމްވާނެއެވެ. ތިޔަ ހީވީ ހަމަ ރަނގަޅަށެވެ. މި ދައްކަން އުޅެނީ ހަޤީގީ ލޯބިވެރިޔާގެ ވާހަކައެވެ.
ދުނިޔޭގެ ގާތްގަނޑަކަށް ހަތް ބިލިޔަން މީހުންގެ ތެރެއިން ޙަޔާތުގެ ބައިވެރިޔަކު އިޚްތިޔާރުކޮށް ލޯބީގެ ބަގީޗާތަކުގައި މާމެލާމެލި ފޮޅުވާ އަޙުދާއި ވަޢުދުތައްކޮށް އުމުރަށް އެކީ އުޅޭނެކަމުގެ ޔަޤީން ކަމާއެކު ޖަހާލެވޭ ޒަވާޖީ ގޮށް މޮހެވިދާން ވަރަށް ގިނަފަހަރު މެދުވެރިވާ ހަޤީގީ ލޯބިވެރިޔާގެ ވާހަކައެވެ.
ކައިވެނިކޮށް ދިރިއުޅުމުގެ ދަތުރު ފަށައި، ދަރިން ލިބޭ ހިސާބުން ހަޤީގީ ލޯބިވެރިއެއް ފެނި ދިރިއުޅުން ހައިޖާނަކަށްވެ ބޮއްސުންލައިގެން ދާންޖެހެނީއެވެ. އާއިލާ ރޫޅި ދަރިންކޮޅު ނިކަމެތިވެ ދުނިޔެއަށް ގިނަވަނީއެވެ. ދެން އުފެދެނީ ސުވާލުތަކެކެވެ.
ހަޤީގީ ލޯބިވެރިޔާ ހުއްޓާ މީހެއްގެ ލޯބިވާ ދަރިޔަކު ޙަޔާތަށް ގެނެސް ކުށެއް ނެތް މީހެއްގެ ދިރިއުޅުން ހަލާކު ކޮށްލުމުގެ ބޭނުމަކީ ކޮބައިހެއްޔެވެ؟
ކައިވެނީގެ ކުރިން ތިޔަ ލޯބިވާ ހަޤީގީ ލޯބިވެރިޔާ ކޮބައި ހެއްޔެވެ؟ އޭނާ ފެންނަންވީ ކައިވެނީގެ ފަހުން ހެއްޔެވެ. ކައިވެނީގެ ކުރިން އޭނާ ނުފެންނަންވީ ކީއްވެ ހެއްޔެވެ؟ މިކަމާ ގުޅިގެން މިފަދަ އެތައް ސުވާލުތަކެއް އުފެއްދިދާނެއެވެ.
މިކަމުގައި އަދި ވަރަށް ހެއްވާ އެހެން ކަމެއް ވެސް އެބައޮތެވެ. އެއީ މި ބުނާ ހަޤީގީ ލޯބިވެރިޔާގެ ވެސް ކުޅަދާނަކަމާއި ހުޝިޔާރުކަމެވެ. ލޯބިން އުޅެ އުޅެ ތިބޭ ދެމީހެއްގެ ދެމެދަށް ފުންމާލަން އެއްވެސް ޖެހިލުމެއް ފިކުރެއް ވެސް ނުހުރެއެވެ. އެހެނަސް ހަޤީގީ ލޯބިވެރިޔާއަށް އިންޒާރެއް ވެސް އެބައޮތެވެ. އެއީ އެހެން ބައެއްގެ ދިރިއުޅުން ހަލާކު ކޮށްލައިގެން ހަޤީގީ ލޯބިވިޔަސް ހަޤީގީ ލޯބިވެރިޔާއަށް ވެސް އަމިއްލަ ދިރިއުޅުން އާރާސްތެއް ނުކުރެވޭނެއެވެ.
ހަމަ ހަޤީގަތުގައި ވެސް މިއީ މިހާރަކަށް އައިސް މިރާއްޖޭގައި ވަރަށް ގިނަ ފަހަރު ކައިވެނިތައް ރޫޅެން ދިމާވާ ކަމެއްގެ ވާހަކައެވެ. މާ ވަރުގަދަ ހަޤީގީ ލޯބިވެރިއެއް ފެނި ބައެއް މީހުން އެމީހުންގެ އަތުން އެމީހުންގެ ދިރިއުޅުން ހަލާކުކޮށްލާ ހިތްދަތި ވާހަކައެވެ. ހަޤީގީ ލޯބިވެރިޔާ ބޭނުންވާނަމަ އެހެން މީހަކާއި އިނދެ ދަރިން ނުހޯދާށެވެ. ހަޤީގީ ލޯބިވެރިޔާގެ އިންތިޒާރުގައި ހުންނާށެވެ. އެހެން ކުރެވޭނަމަ ކައިވެންޏަށްފަހު ހަޤީގީ ލޯބިވެރިޔާ ހިތުގައި ކަފުންކޮށް ވަޅުލާށެވެ. ކައިވެންޏަށް ފަހު ހަގީގީ ލޯބިވެރިޔާގެ ސިފައިގައި ތިޔަ ފެންނަނީ ލޯބިވެރިއެއް ނޫނެވެ. ދިރިއުޅުމުގެ ހަލާކެވެ.
