ދިވެހިންނަށް ފަޚުރުވެރި ވަގުތުކޮޅެއް: އޭއެފްސީ ބްރެކެޓް ޗެލެންޖްގެ ފައިނަލަށް އަޝްފާޤް!
އޭޝިއާގެ ފުޓުބޯޅައިގެ މައި އިދާރާ އޭއެފްސީން ހުޅުވާލައިގެން ކުރިއަށް ގެންދާ "އޭއެފްސީ ބްރެކެޓް ޗެލެންޖް"ގެ ފައިނަލަށް ރާއްޖޭގެ އެންމެ މަޝްހޫރު އަދި އެންމެ ކާމިޔާބު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ދަތުރުކޮށްފިއެވެ.
އޭއެފްސީ ބްރެކެޓް ޗެލެންޖަށް ވޯޓުލުމުގެ ސުންގަޑި ހަމަވެފައި ވަނީ މިއަދު މެންދުރު 13:00 އަށެވެ. ސުންގަޑި ހަމަވީއިރު ސެމީ ފައިނަލްގައި ދަގަނޑޭ އަށް ލިބުނު ވޯޓުގެ އަދަދަކީ 54.68 އިންސައްތައެވެ. އާބާދީބޮޑު ވިއެޓްނާމުގެ ކުޅުންތެރިޔާއަށް ލިބުނީ 45.32 އިންސައްތައެވެ.
އެނގިފައިވާ ގޮތުގައި މި ޗެލެންޖުގެ ފައިނަލުގައި ދަގަނޑޭ ވާދަކުރާނީ ހޮންގްކޮންގްގެ ޗަން ސިއު ކީ އާއެވެ. އޭނާ ފައިނަލްގެ ޖާގަ ކަށަވަރުކުރީ ސެމީ ފައިނަލުގައި މެލޭޝިއާގެ ސަފާވީ ރާޝިދްގެ މައްޗަށް ކުރިހޯދައިގެނެވެ.
ކުއާޓާ ފައިނަލުގައި ވިއެޓްނާމުގެ ގުޔެން ވެން ގުޔެޓް މައްޗަށް ކުރިހޯދައިގެން ސެމީ ފައިނަލަށް ދަތުރުކުރި އަޝްފާޤު، ސެމީ ފައިނަލްގެ ގިނަ ވަގުތު އޮތީ ކުރީގައެވެ.
ކުއާޓާ ފައިނަލްއެކޭ އެއްފަދައިން ސެމީގައި ވެސް ވިއެޓްނާމް ކުޅުންތެރިއާއަށް ވޯޓު ހޯދައިދޭން އެޤައުމުގެ އެފްއޭގެ ފަރާތުން ގިނަ މަސައްކަތްތަކެއް ކުރިއެވެ.
ނަމަވެސް ގިނަ ދިވެހިންތަކެއް ކުރި ބުރަ މަސައްކަތުން އަޝްފާޤް މިވަނީ ސެމީ ފައިނަލްގައި ވެސް ކުރި ހޯދާ، ފައިނަލަށް ދަތުރު ކޮށްފައެވެ.
Ads by STO
