"މާލޭ ރައްޔިތުންނަށް ދިމާވެފައިވާ މައްސަލަތައް ހައްލުކޮށް ނަތީޖާ ނެރެވޭނީ ސަރުކާރުގެ ޕްރެޝަރަށް ދީލާނުލާނެ މީހަކަށް"
މާލޭ ރައްޔިތުންނަށް ދިމާވެފައިވާ މައްސަލަތައް ޙައްލުކޮށް ނަތީޖާ ނެރެދެވޭނީ ސަރުކާރުގެ ޕްރެޝަރަށް ދީލާނުލާނެ މީހަކަށް ކަމަށް މާލޭ މޭޔަރު ކަމަށް ވާދަ ކުރައްވާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ވިދާޅުވީ "މާލޭ ރައްޔިތުންނަށް ދިމާވެފައިވާ މައްސަލަތައް ޙައްލުކޮށް ނަތީޖާ ނެރެދެވޭނީ މި ސަރުކާރުގެ ޕަޕެޓަކަށް ނުވާނޭ ، ސަރުކާރުގެ ޕްރެޝަރަށް ދީލާނުލާނޭ ، ސަރުކާރާ ޑީލްތައް ނުހަދާ ، ރައްޔިތުންގެ ފަޅީގައި ހުންނާނޭ ، ރައްޔިތުންގެ ޚާދިމަކަށް" ކަމަށެވެ.
އަންނަ އަހަރުގެ މާޗު މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި މުޢިއްޒުގެ އިތުރުން މާލޭ މޭޔަރުކަމަށް ވާދަ ކުރައްވަނީ އެމްޑީޕީގެ ކެނޑިޑޭޓް އަނަސް ޢަބުދުއްސައްތާރާއި ، އަލްހާން ފަހުމީއެވެ.
މާލޭގެ ރައްޔިތުންނަށް ދިމާވެފައިވާ އެންމެ ބޮޑު މައްސަލަ ކަމުގައިވާ މާލޭ ރައްޔިތުންނަށް ދާއިމީ ބޯހިޔާވަހިކަމެއް ހޯދައިދިނުމަށް މުޢިއްޒު ގޮވާލަމުންދާއިރު ، އަނަސް ތަމްސީލް ކުރައްވާ އެމްޑީޕީން ދަނީ މުޢިއްޒުގެ ގޮވާލުމާ ދެކޮޅަށް މަސައްކަތް ކުރައްވަމުންނެވެ.
މުޢިއްޒު ދެކޭ ގޮތުގައި މާލޭ ރައްޔިތުންގެ ބޯހިޔާވަހި ކަމުގެ މައްސަލައަށް ދާއިމީ ހައްލެއް ލިބޭނީ ގުޅީފަޅާއި ފުށިދިއްގަރަކީ ބޯ ހިޔާވަހިކަމަށް ޚާއްޞަ ރަށްތަކެއް ކަމަށް ކަނޑައަޅައިގެން ކަމަށެވެ. އަދި މާލޭ ވިޔަފާރި ބަނދަރު ތިލަފުއްޓަށް ބަދަލު ކުރުމަށް ވެސް މުޢިއްޒު ދަނީ ގޮވާލަމުންނެވެ. ނަމަވެސް މި ސަރުކާރުން ދަނީ އެ ބަނދަރު ގުޅީފަޅަށް ބަދަލު ކުރުމަށް މަސައްކަތް ކުރަމުންނެވެ. އަދި ވޭތުވެދިޔަ ސަރުކާރުން ހިންގި ހުޅުމާލެ ފޭސް ދެއަކުން ގޯތި ދެވެން ނެތް ކަމަށް ވެސް އިކޮނޮމިކް މިނިސްޓަރ ފައްޔާޒު އިސްމާއީލް ވަނީ ދާދި ފަހުން ވިދާޅުވެފައެވެ.