ޑްރައިވަރުން ގައިޑްލައިނަށް ޢަމަލު ކުރާނެބާ؟
ރާއްޖޭގައި ވެސް ކޮވިޑް-19 ފެތުރެމުން ދިޔުމާ ގުޅިގެން މިދިޔަ އޭޕްރިލް މަހު ފުރަބަންދު ކުރިއެވެ. ފުރަބަންދާ ގުޅިގެން ހުރިހާ އިގްތިސާދީ ހަރަކާތެއް ވެސް ހުއްޓުނެވެ. ނަމަވެސް ބަލިފެތުރޭ މިންވަރު ދަށްވަމުން ދިޔުމުން، ފުރަބަންދު އުވާލުމަށްފަހު ލުއިތައް ވެސް ދެމުން ދިޔައެވެ. އަދި ޚާއްސަ ގައިޑްލައިންތަކަކާއި ޕްރޮޓޮކަޮލްތަކާއެކު، ސިނާއަތްތަކުގެ މަސައްކަތް އަލުން ފެށުމުގެ ހުއްދަތައް ވެސް ދޭން ފެށިއެވެ.
މިފަދައިން ޚިދުމަތްތައް ދިނުން އެއިރު ހުއްޓުނަމަ ނަމަވެސް، ފަހުން އެޚިދުމަތްތައް އަލުން ދޭން ވަނީ ހުއްދަ ދީފައެވެ.
ޓެކްސީގެ ޚިދުމަތްތައް އަލުން ދިނުމުގެ ހުއްދަ އަލުން ދިނީ، ވަކި ޚާއްސަ މިންގަނޑުތަކަކާ އެއް ގޮތަށް ޓެކްސީތައް ބަލަހައްޓާ، ކަސްޓަމަރުންނާ މެދު އަމަލުކޮަށް މިކަމާ ގުޅޭގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރެފައިވާ ގައިޑްލައިނާ އެއްގޮތަށް ޢަމަލު ކުރުމަށެވެ. މިއީ ޓެކްސީތަކުގައި ދަތުރު ކުރާ މީހުންނާއި ޑްރައިވަރުންގެ ރައްކާތެރި ކަމަށް މުހިންމު ފިޔަވަޅުތަކެއް ކަމުގައިވެސް އެޗްޕީއޭއިން ވަނީ ބުނެފައެވެ.
މިގައިޑްލައިނުގައިވާ އުސޫލުތަކުން އަންގާފައިވާ ގޮތުގައި، ޓެކްސީތަކުގެ ކުރީ ސީޓަށް ކަސްޓަމަރުން އެރުވުން މަނަލެވެ. އަދި ޓެކްސީގެ ޑްރައިވަރު އިންނަ ސީޓާއި ފަހަތު ދެ ސީޓު ވަކިކުރަން ޚާއްސަ ޕާޓިޝަނެއް ވެސް ޖަހާފައި ހުންނަން ޖެހެއެވެ. މީގެއިތުރުން، ޓެކްސީ ކުރަން ޖެހެނީ ވައި ރަނގަޅަށް ދައުރުވާނެހެން ކާރުގެ ފަހަތު ދޮރުތަކުގެ ބިއްލޫރި ތިރިކޮށްގެންނެވެ.
ނަމަވެސް ޓެކްސީ ޚިދުމަތްދޭ ގިނަ ފަރާތްތަކުން މިއުސޫލުތަަކަށް ބޯނުލަނބާކަން ރޭގެ ނޫސްވެރިންގެ ބައްދަލުވުމުގައި އެޗްޕީއޭއިން ވެސް ވަނީ ފާހަގަ ކޮށްފައެވެ.
ކާރުގެ ފަހަތު ދޮރުތަކުގެ ބިއްލޫރި ތިރި ނުކުރާއިރު، ކުރީ ސީޓަށް ވެސް މީހުން އަރުވަނީއެވެ. އަދި ޑްރައިވަރު ސީޓާއި ޕަސަންޖަރު ސީޓާ ދެމެދު ޕާޓިޝަނެއް ވެސް ގިނަ ކާރުތަކުގައި ނެތްކަން ފާހަގަވެއެވެ.
މިފަދަ ބައެއް ޓެކްސީ ޑްރައިވަރުންނަށް ގައިޑްލައިންގައިވާ ގޮތްތައް ހަނދާން ކޮށްދިނުމުން އެމީހުންގެ ޖަވާބަކަށްވީ ގައިޑްލައިނަށް ޢަމަލު ކުރަން ނުޖެހޭ ކަމަަށެވެ. އަދި ކާރުތެރޭގައި ސެނިޓައިޒަރ ހުންނާނެކަން ވެސް ބުނެފައިވެއެވެ.
