އެމްޕީއެލްގެ ބޮޑު ޚިޔާނާތާ ގުޅިގެން މުވައްޒަފުންތަކެއް ސަސްޕެންޑު ކޮށްފި
ކޮވިޑް-19 އާއި ގުޅިގެން ކުރި ފުރަބަންދުގައި، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އަށް މިލިއަން ރުފިޔާގެ ޚިޔާނާތެެއް ހިންގާފައިވާ ކަމުގެ ތުހުމަތުގައި އެކުންފުނިން މުވައްޒަފުންތަކެއް ސަސްޕެންްޑު ކޮށްފިއެވެ.
އެމްޕީއެލް އިން ކޮރަޕްޝަނަށް މަގު ފަހިވާ ފަދަ މިފަދަ ޚިޔާނާތުގެ ޢަމަލެއް ހިންގާފައިވާކަން ހާމަ ކޮށްފައިވަނީ އެކުންފުނީގެ ޗެއާމަން މުޙައްމަދު ޒަކީ (ނަޒާކީ ޒަކީ) އެވެ.
ޒަކީ ކުރެއްވި ޓްވީޓެއްގައި ވިދާޅުވެފައި ވަނީ އަށް މިލިއަން ރުފިޔާގެ އެ ޚިޔާނާތް ހިންގާފައި ވަނީ ތެޔޮ ވިއްކުމުގެ ތެރެއިން ކަމަށާއި އެކަމުގައި ތުހުމަތުވާ މުވައްޒަފުން ސަސްޕެންޑް ކުރަން މަސައްކަތް ކުރުމުން އެކަމަށް ކުންފުނީގެ ބޯޑުގެ ތާއީދު ލިބިފައި ނުވާ ކަމަށެވެ. އެގޮތުން ހަތް މެންބަރުން ހިމެނޭ އެބޯޑުން، އެމުވައްޒަފުން ސަސްޕެންޑު ކުރަން ފެންނަ ކަމަށް ތިން މެންބަރުން ވޯޓު ދެއްވިއިރު، ބާކީ ހަތަރު މެންބަރުން ވޯޓު ދެއްވީ ނުފެންނަ ކަމަށްކަން ޒަކީ ފާހަގަ ކުރައްވާފައި ވެއެވެ.
ނަމަވެސް އެމްޕީއެލްއިން މިއަދު ނެރުނު ބަޔާނެއްގައި ބުނެފައި ވަނީ މިމައްސަލައިގެ ތުހުމަތުވާ މުވައްޒަފުން ސަސްޕެންޑުކޮށް، މަސައްކަތުން އެކަހެރި ކޮށްފައިވާ ކަމަށެވެ. އަދި މިމައްސަލަ އިތުރަށް ތަހުގީގު ކުރަމުންދާ ކަމަށް ވެސް ބުނެފައިވެއެވެ.
"މިމައްސަލައާއި ގުޅިގެން މިހާތަނަށް ލިބިފައިވާ މައުލޫމާތުތަކުގެ އަލީގައި، މިމައްސަލަ އިތުރަށް ތަހުގީގު ކުރުމަށް ފުލުހުންނާއި، އޮޑިޓޯ ޖެނެރަލް އޮފީސް އަދި އެންޓި ކޮރަޕްޝަން ކޮމިޝަން (އޭސީސީ) އަށް މިހާރު ވަނީ ހުށަހަޅާފަ" އެމްޕީއެލް ގެ ބަޔާނުގައިވެއެވެ.
އެމްޕީއެލުން ބުނީ ކޮރަޕްޝަންގެ މައްސަލަތަކަކީ އެކުންފުނިން ވަރަށް ސީރިއަސްކޮށް ބަލާނެ މައްސަލަތަކެއް ކަމަށާއި މިފަދަ ޢަމަލެއްގައި ޝާމިލުވާ މުވައްޒަފުންތަކާމެދު އެކުންފުނިން ޤާނޫނާއި ޤަވާއިދާ އެއްގޮތްވާ ގޮތުގެ މަތިން އެންމެ ހަރުކަށި ފިޔަވަޅު އަޅާނެ ކަމަށެވެ.
Ads by STO
