ކްރިމިނަލް ކޯޓުގެ އިސްގާޒީއަކަށް ޝަކީލް
ދިވެހި ރާއްޖޭގެ ކްރިމިނަލް ކޯޓުގެ އިސްގާޒީ އަކަށް އަހުމަދު ޝަކީލު އައްޔަނު ކުރައްވައިފިއެވެ.
ޖުޑިޝަލް ސާވިސް ކޮމިޝަން (ޖޭއެސްސީ) އިން ވިދާޅުވީ އެ ކޮމިޝަންގައި ބޭއްވި ރަސްމިއްޔާތެއްގައި އިސް ގާޒީގެ މަގާމުގެ ފަތްކޮޅު ޝަކީލްއާ ހަވާލުކޮށް ދެއްވީ އެ ކޮމިޝަންގެ ރައީސް ހިސާން ހުސައިން ކަމަށެވެ.
ކްރިމިނަލް ކޯޓުގެ ގާޒީއެއް ހޯދުމަށް ކުރި އިއުލާންގެ ދަށުން ކުރިމަތިލި ބޭފުޅުންނާ "ފަނޑިޔާރުން އައްޔަން ކުރުމުގައި ކޮމިޝަނަށް ލަފާދޭ ކޮމިޓީ" އިން ޖޭއެސްސީ އަށް ހުށަހަޅާފައިވާ ރިޕޯޓުގައި ބުނެފައިވަނީ ޝަކީލް އިސް ގާޒީއަކަށް އައްޔަނު ކުރަން ފެންނަ ކަމަށެވެ.
ކްރިމިނަލް ކޯޓުގެ އިސްގާޒީ ކަމަށް ކުރިން ހުންނެވީ އަހުމަދު ހައިލަމް އެވެ. ޝަކީލަކީ ކުރިން ޖުވެނައިލް ކޯޓާއި ފެމިލީ ކޯޓުގެ ފަނޑިޔާރު ކަން ކުރެއްވި ބޭފުޅެކެވެ. އެނގިފައިވާ ގޮތުގައި ކްރިމިނަލް ކޯޓުގެ އިސް ގާޒީ ކަމަށް ކުރިމަތިލާން ހުޅުވާލުމުން އެކަމަށް ކުރިމަތިލައްވާފައި ވަނީ ވެސް ޝަކީލް އެކަންޏެވެ.
ޝަކީލް ކުރިން ވަނީ ކްރިމިނަލް ކޯޓުގައި ހިނގި ސިޔާސީ ބައެއް ބޭފުޅުންގެ މައްސަލަތައް ވެސް ކުރިން ބައްލަވާފައެވެ.
