ރުޤްޔާ ކުރުމުގެ ނަމުގައި އަނިޔާކުރި ދެމީހުންގެ ބަންދުގެ މުއްދަތު ޖަހައިފި
މެދުރާއްޖެތެރޭގެ ރަށެއްގައި ރުޤްޔާ ކުރުމުގެ ނަމުގައި، އަންހެނަކަށާއި އޭނަގެ ތިން ދަރިންނަށް ޖިންސީ އަދި ނަފްސާނީ އަނިޔާކުރި ކަމުގެ ކުށުގައި ހައްޔަރުކުރި ދެމީހުންގެ ބަންދުގެ މުއްދަތު ޖަހައިފިއެވެ.
އެގޮތުން މިތުހުމަތުގައި ކޯޓު އަމުރެއްގެ ދަށުން ހައްޔަރު ކޮށްފައިވަނީ އުމުރުން 24 އަހަރުގެ ފިރިހެނަކާއި 39 އަހަރުގެ ފިރިހެނެކެވެ.
އޭގެ ތެރެއިން 24 އަހަރުގެ މީހާގެ ބަންދުގެ މުއްދަތާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 15 ދުވަހުގެ މުއްދަތެއް ޖަހާފައިވާ ކަމަށް ފުލުހުން ބުނެފައިވެއެވެ. އަދި އުމުރުން 39 އަހަރުގެ މީހާ ޝަރީޢަތް ނިމެންދެން ބަންދުގައި ބެެހެއްޓުމަށް ކޯޓުން ވަނީ އަމުރު ކޮށްފައެވެ.
މިމައްސަލައިގައި ކޯޓު އަމުރެއްގެ ދަށުން، އުމުރުން 39 އަހަރުގެ ފިރިހެންމީހާ ހައްޔަރު ކޮށްފައިވަނީ ބުދަ ދުވަހުގެ 22:30 ގައެވެ. އަދި 24 އަހަރުގެ މީހާ ހައްޔަރު ކުރީ އިއްޔެ ހެނދުނު 9:51 ގައި ކަމަށް ވެސް ފުލުހުން ބުނެފައި ވެއެވެ.
ރުގްޔާގެ ނަމުގައި އަންހެން މީހާ އާއި އޭނާގެ ދަރިންނަށް އަނިޔާކުރި މީހުން ހައްޔަރު ކުރިއިރު އެކަމުގެ ޝިކާރައަކަށްވި އާއިލާއިން މައުލޫމާތުދޭ ގޮތުގައި ތިން މަސް ދުވަސް ވަންދެން އެމީހުން ރަހީނުކޮށް ނަފްސާނީ އަދި ޖިސްމާނީ އަނިޔާ ދީފައިވެއެވެ. އެމީހުންނަށް އެއަނިޔާތަކުން ސަލާމަތް ވެވިފައި ވަނީ މިދިޔަ މަހުގައި ކަމަށާއި ސަލާމަތްވި ދުވަހު ފުލުހުންނަށް މައްސަލަ ހުށަހެޅި ކަމަށް ވެސް ބުންޏެވެ.
