"ކޮވިޑު ޖެހި ރަނގަޅުވިތާ ތިން މަސް ވެއްޖެނަމަ، އަލުން ސާމްޕަލް ދޭންޖެހޭނެ"
ކޮވިޑް-19 ޖެހި، ބަލިން ރަނގަޅުވި ފަހުން ތިން މަސް ވެއްޖެނަމަ، އަލުން ސާމްޕަލް ދޭން ޖެހޭނެ ކަމަށާއި އެ ކަމަށް އެއްބާރުލުން ދިނުމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭގައި ބުނެފިއެވެ.
ރޭގެ ޕްރެސް ކޮންފަރަންސް ގައި އެޗުޕީއޭގެ އެޕިޑަމިއޮލޮޖިސްޓު ޑރ. އިބްރާހިމް އަފްޒަލް ވިދާޅުވީ ކޮވިޑް ޖެހިފައިވާ ވަރު ބަލަން އެކްޓިވް ސަވައިލަންސްގެ މަސައްކަތް ކުރާއިރު، އެ ބަލިން ރަނގަޅު ވެފައިވާ މީހުންގެ ސާމްޕަލް ނަގަން އުޅުމުން ކަންބޮޑުވުން ފާޅުކުރަމުންދާ ކަމަށެވެ. އެހެންކަމުން މި މަސައްކަތުގައި އަމަލީ ގޮތުން ހަރަކާތްތެރިވާ ރެޕިޑް ރެސްޕޮންސް ޓީމް (އާރްއާރްޓީ) އިން އެދެނީ، ބަލިން ރަނގަޅުވި ފަހުން ތިން މަސް ދުވަސް ވެއްޖެ ނަމަ އަލުން ސާމްޕަލް ދިނުމަށް ކަމަށް ޑރ. އަފްޒަލް ވިދާޅުވި އެވެ.
ޑރ. އަފްޒަލް ވިދާޅުވީ ކޮވިޑު ޖެހި ރަނގަޅު ވެފައިވާ މީހުންނަށް އެ ބަލި އަލުން ނުޖެހޭނެ ކަމަށް މިހާރު ބަލަމުން އަންނަ މުއްދަތަކީ ތިން މަސް ދުވަސް ކަމަށާއި އެއަށް ވުރެ ގިނަ ދުވަސް ވެއްޖެ ނަމަ ބަލި އަލުން ޖެހިދާނެ ކަމަށެވެ. އެހެންވެ ޓެސްޓުކުރުން މުހިއްމު ކަމަށް ޑރ. އަފްޒަލް ވިދާޅުވިއެވެ.
އެ މީހާގެ ސާމްޕަލް ނެގުން ވަރަށް މުހިއްމު ވާނެ. އެއީ އަޅުގަނޑުމެންނަށް އެ ބަލި ހަގީގަތުގައި (ޖެހެނީ) ކިހިނެއްތޯ (އެނގޭނީ އޭރުން). ތިން މަސް ދުވަހުންތޯ ނުވަތަ އެ އަށް ވުރެ ގިނަ މުއްދަތެއްތޯ، އެވިޑެންސްތަކެއް މި ނެގެވެނީ" ޑރ. އަފްޒަލް ވިދާޅުވި އެވެ.
މީގެއިތުރުން ކޮވިޑަށް ޓެސްޓު ކުރަން ސާމްޕަލް ދޭން އާންމުކޮށް ދެކޮޅު ހަދަނީ އެ ބަލިން ރަނގަޅުވިތާ ހަ މަސް ވެފައިވާ މީހުން ކަމަށް ވެސް ޑރ. އަފްޒަލް ވިދާޅުވި އެވެ. އެހެންވެ، ބަލި ޖެހުނު ފަހުން ހަ މަސް ދުވަސް ވީ ނަމަވެސް، އާރްއާރްޓީއަށް އެއްބާރުންދީ ސާމްޕަލް ދޭން އޭނާ އެދިވަޑައިގަތެވެ.
Ads by STO
