ދަރިއެއްގެ ސުވާލު އޭނަގެ ބައްޕައަށް: ބައްޕައެއްގެ ލޯބި ދިނިން ހެއްޔެވެ؟
މިއީ ހަގީގަތުގައި އެންމެ ހާދިސާއެއް ނޫނެވެ. އެތައް ހާދިސާތަކަކާ ގުޅިގެން ޒުވާން އަންހެން ކުއްޖަކު އޭނާގެ ބައްޕައާއި ދުރުވި ޢިބްރަތްތެރި ވާހަކައެކެވެ.
"އަހަރެންގެ އުމުރުން އެންމެ ހަތަރު އަހަރުގައި އަހަރެންގެ މައިންބަފައިން ވަކިވެއްޖެއެވެ. އަހަރެންގެ އިތުރުން ދެން މަންމަގެ ހުންނަނީ އަހަރެންގެ ފިރިހެން ކޮއްކޮއެވެ. އޭނައަށް އެއިރު އެއް އަހަރެވެ.
އަހަރުމެން ދިރިއުޅުނީ މަންމަ ގާތުގައެވެ. މައިންބަފައިން ވަކިވި ފުރަތަމަ ދުވަސްކޮޅު، ބައްޕަ އަހަރުމެންނާ ބައްދަލު ކުރަން އައިކަން އަހަރެން ކޮންމެވެސް ވަރަކަށް ހަނދާން ހުރެއެވެ. ނަމަވެސް ބޮޑަށް ހަނދާން ވަނީ ބައްޕަ އަހަރުމެން ކައިރީގައި ނުހުންނަ ހަނދާނެވެ.
ބައްޕައާ ބެހޭގޮތުން ދުވަހަކު ވެސް ދެރަ ބަހެއް މަންމަ އަހަރުމެން ގާތު ނުބުނެއެވެ. އަބަދުވެސް ބުނަނީ ބައްޕަ ދެކެ ލޯބިވުމަށާއި، ބަައްޕަ އަހަރުމެންނާ ބައްދަލުކުރަން އައުމުން ވެސް އުފަލާއެކު ވާހަކަ ދެއްކުމަށެވެ.
ކިތަންމެ ދުވަހަކު ބައްޕައާ ވާހަކަ ދައްކާށޭ ބުނެ އަހަރެން އަތަށް މަންމަ ފޯނު ވެސް ދެއެވެ. ދައްކާނެ ވާހަކައެއް ނޭނގުމުން، ކިޔަންވީ އެއްޗެހި ވެސް ބުނެދެއެވެ. މަންމަގެ އެދުމުގެ މަތިން އަހަރެން އެކަން ކުރި ނަމަވެސް، ހިތާއި ހިތުން ބައްޕައާ ވާހަކަ ދައްކާ ހިތެއް ނުވެއެވެ. ސަބަބަކީ ބައްޕަ އަހަރުމެންނަށް ނުގުޅާތީ އެވެ. އަބަދުވެސް މަންމަ އަމިއްލައަށް ބައްޕައަށް ގުޅާފައި އަހަރުމެންގެ ވާހަކަތައް ބުނެދޭކަން ފާހަގަވުމެވެ.
ބޮޑުވަމުން އައި ވަރަކަށް އަހަރުމެންނަށް މިކަންތައްތައް އިތުރަށް ފާހަގަވެ ވިސްނެން ފެށިއެވެ. ސްކޫލަށް ގެންގޮަސްދޭން ބައްޕަ ކައިރީ މަންމަ ބައެއް ދުވަސް ދުވަހު އެދުމުން ވެސް ބައްޕަ އަށް އާދެވޭ ގޮތެއް ނުވެއެވެ. ކޮންމެވެސް ސަބަބެއް ދައްކައެވެ. މާޔޫސްކަން ފޮރުވަމުން މަންމަ އަހަރުމެންނަށް އެސަބަބުތައް ވިސްނައި ދެވޭތޯ މަސައްކަތް ކުރާކަން ވެސް ފާހަގަވިއެވެ.
އަަހަރުމެން ބަލިވުމުން ވެސް ގާތުގައި ހުރީ މަންމަ އެވެ. ގޮވައިގެން ހޮސްޕިޓަލަށް ދިޔައެވެ. ކާންދީ، ބޭސް ވެސް ދިނުމުގައި އަވަދިނެތި އުޅެއެވެ. އަހަރެންގެ މުޅި ޙަޔާތުގައި ވެސް، ބައްޕަ އަހަރުމެން ބަލިވެގެން އަހަރުމެން ގާތަށް އައި ހަނދާން ވަނީ އެންމެ ދުވަހަކުއެވެ. އެދުވަހު ވެސް މާގިނަ ވަގުތެއް ނުކޮށް ބައްޕަ ހިނގައްޖެއެވެ.
ދުވަސްތައް ވޭތުވަމުން ގޮސް އަހަރެންގެ އުމުރުން 15 އަހަރުގައި ބައްޕަ އެހެން ކައިވެންޏެއް ކޮށްފިކަމުގެ ޚަބަރު ގޭތެރެއިން އިވުނެވެ. ދޮން މަންމައާ ބައްދަލު ކޮށްލަން ކުރިން ބައެއް ދުވަސް ދުވަހު ބައްޕަ އަހަރުމެން ގެންދިޔައެވެ. ނަމަވެސް ދޮން މަންމަގެ ފަރާތުން ބައްޕައަށް އެހެން ދަރިއެއް ލިބުނު ފަހުން އަހަރުމެން ނުގެންދެއެވެ. އެކަމާ އަހަރުމެން އެހާ އަޅައެއް ވެސް ނުލަމެވެ.
ބައްޕައަކީ ވެސް ފޭސްބުކްގައި އުޅޭ މީހެއްކަން އަހަންނަށް އެނގުނީ އަހަރެންގެ އުމުރުން 18 އަހަރުގައި އަހަރެން ވެސް އެފްބީ ބޭނުން ކުރަން ފެށުމުންނެވެ.
ނަމަވެސް ބައްޕަގެ ޕްރޮފައިލުން އަހަންނަށް ފެނުނީ، ބޭނުން ނުވެ ވިޔަސް އަހަރެންގެ ސިކުނޑިއަށް އުނދަގޫތަކެއް ކުރުވި މަންޒަރުތަކެކެވެ. އަހަރެންގެ ހަގު ކޮއްކޮ (ބައްޕައާއި ދޮންމަންމަގެ ދަރިފުޅު) ގޮވައިގެން ގިނަ ދަތުރުތަކެއް ކޮށްފައިހުރި ފޮޓޯތަކާއި، ހޯދައިދީފައިވާ އެއްޗެއްސާއި، ދެމުންދިޔަ އޯގާތެރިކަމާއި ލޯބި ފެނުމުން އަހަރެންގެ ހިތަށް ވެސް އެއްޗެހި އަރަމުން ދިޔައެވެ.
އެހެންކަމުން ދެން އެއެއްޗެހި ނުފެންނާނެ ގޮތް ހެދުމުގެ ގޮތުން އަހަރެން ބައްޕަ ބްލޮކް ކޮށްލީމެވެ.
ދުވަސްތައް ފާއިތުވަމުން ގޮސް އަހަންނަށް މެލޭޝިއާއަށް ކިޔަވަންދާން ފުރުސަތު ލިބުނެވެ. އެތަނުން އަހަންނަށް ވަގުތީ ވަޒީފާއެއް ވެސް ހަމަޖެހުނެވެ. އަދި ބޮޑު ދައިތަ ގޭގައި ހުރެވޭނެ ގޮތް ވެސް ހަމަޖެހުނެވެ. އެހެންވެ އަހަރެން ނިންމީ މަންމައާއި ކޮއްކޮ ވެސް ގޮވައިގެން ދާށެވެ. ބޮޑުދައިތަވެސް އެކަމާ އެއްބަސްވެ، ބޮޑުދައިތަ ހިންގާ ވިޔަފާރީގައި އެހީތެރިވެވޭނެ ކަމަށް ބުންޏެވެ.
ހުރިހާ ކަމެއް ހަމަޖެހި، ފުރަން އޮތް ދުވަހުގެ ކުރީ ދުވަހު އަހަންނާއި ކޮއްކޮ އަދި ބައްޕަ ކެއުމަކަށް ބައްދަލު ކުރީމެވެ. އަހަރުމެން ފުރަން އުޅޭ ވާހަކަ ބުނީ އެރެއެވެ.
ހިތްހަމަ ނުޖެހިފައި އިނދެ ބައްޕަ ފެށީ އަހަރުމެންގެ މަންމަ ކުށްވެރި ކުރާށެވެ. އަހަރުމެން ބައްޕައާ ގާތް ނޫން ކަމަށާއި ކަންކަން ކުރުމުގެ ކުރިން ހިއްސާ ނުކުރާ ވާހަކައާއި، އެއީ މަންމަ އަހަރުމެންނަށް ވިސްނައިދޭ ގޮތް ކަަމަށް ބުންޏެވެ.
މަންމައާ ބެހޭ ގޮތުން އެހެން ބުނުމުން އަހަރެންގެ ކެތްތެރިކަން ކޮޅުންލިއެވެ. އަހަރެން ބައްޕަ ގާތުގައި އެހީމެވެ. 'ބައްޕާ އެވެ. ބައްޕަ އަހަރުމެންނަށްޓަކައި ހުރި ދުވަހެއް ހަނދާން ކޮށްލާފަ ބުނެދީ ބަލާށެވެ. މަންމަ ދުވަހަކު ވެސް ބައްޕަގެ ނުބައި ވާހަކައެއް ނުދައްކައެވެ. ނަމަވެސް ބައްޕަ އަހަރުމެންނަށް ކިޔަވައިދީ، ލޯބިދީ، އަޅާލާ، ބަލިވީމަ ބޭސް ކޮށްދީ، ހަދިޔާދީ، ދިރިއުޅުމުގެ ކަންކަން ބުނެދީ، ގްރެޖުއޭޓްވީމަ އެހަފްލާއަށް ހާޒިރުވެ، އެނޫންވެސް އަހަރުމެންގެ ކަންތައްތަކަށް ހާޒިރު ވީން ހެއްޔެވެ؟ އަހަރުމެންނަށް ބައްޕަ ބޭނުންވާނެ ވަގުތު ހުރިން ހެއްޔެވެ؟ އަހަރުމެންނަަށް ބައްޕައެއްގެ ލޯބި ދިނިން ހެއްޔެވެ؟'
އަަހަރެންގެ އެސުވާލުތަކާއެކު ބައްޕަ ބަސް ހުއްޓުނެވެ. އެރޭގެ ބާކީ ބައި ނިމުނީ އެކަކު ވެސް އިތުރު އެއްވެސް އެއްޗެއް ނުބުނެއެވެ."
