ގަމުގައި އަންނަ އަހަރު ކެންސަރު ހޮސްޕިޓަލެއް އަޅަނީ
ލ. ގަމުގައި އަންނަ އަހަރު ކެންސަރު ހޮސްޕިޓަލެއް އެޅުމުގެ މަސައްކަތް ފެށިގެންދާނެ ކަމަށް ރައީސް އިބްރާހީމް މުހައްމަދު ޞާލިޙު ވިދާޅުވެއްޖެއެވެ.
ގަމުގައި ތަރައްޤީކުރާ ތިން މަޝްރޫޢުއެއް މިއަދު ހަވީރު އިފްތިތާހް ކޮށްދެއްވަމުން ރައީސް ޞާލިޙު ވިދާޅުވީ ސިއްހީ ހިދުމަތް އިތުރަށް ފުޅާކުރަން ކުރާ މަސައްކަތުގެ ދަށުން ކެންސަރު ހޮސްޕިޓަލެއް ތަރައްގީކުރަން ނިންމާފައިވާ ކަމަށާއި މިހާރު ސަރުކާރުގެ ވިސްނުން ހުރީ ގަމުގައި ކެންސަރު ހޮސްޕިޓަލު އެޅުމަށް ކަމަށެވެ.
އިންޑިއާގެ އެހީގައި އަޅާ އެ ހޮސްޕިޓަލާ ގުޅޭ ލިޔެކިޔުންތަައް ދެ ދުވަހެއް ކުރިން އިންޑިއާ ސަރުކާރާ ހިއްސާ ކުރައްވާފައިވާ ކަމަށް ވެސް ރައީސް ވިދާޅުވިއެވެ.
އެކަމުގެ ނިންމުންތައް ނިމި އަންނަ އަހަރުގެ ތެރޭގައި އެމަސައްކަތް ފެށޭނެ ކަމަށް ވެސް ރައީސް ވިދާޅުވެފައިވެއެވެ.
މީގެ އިތުރުން އެރަސްމިއްޔާތުގައި ރައީސް ވިދާޅުވެފައި ވަނީ ގަމު ހޮސްޕިޓަލު ތަރައްގީ ކުރުމުގެ މަޝްރޫއުގެ ތެރެއިން އާ އިމާރާތް އެޅުމުގެ މަސައްކަތް އަންނަ އަހަރު ފެށިގެންދާނެ ކަމަށާއި އަދި އެތަނުގެ މަސައްކަތް ނިމި ޓާޝަރީ ފެންވަރަށް ހިދުމަތް ދޭން ފެށޭނެ ކަމަށެވެ. އެއާއެކު އެސަރަހައްދުގެ ސިއްހީ ހިދުމަތަށް ބޮޑެތި ކުރިއެރުންތަކެއް ލިބިގެންދާނެ ކަމަށް ވެސް ރައީސް ވިދާޅުވިއެވެ.
Ads by STO
