ޙަޤީޤީ ޙާދިޘާ: ނައިޓްކުލަބުގެ އަނދިރި ދިރިއުޅުމުން ، ޙައްޤުގެ މަގަށް ރުޖޫޢަވި އުޚްތާ
މިއީ މަޝްހޫރު މީހުން ފަދައިން ހިތްހަމަޖެހުމާއި އުފާވެރިކަން ހޯދަން މަސައްކަތްކުރި ކްރިސްޓިއަނެއްގެ ޙަޔާތް ބަދަލުވި ގޮތުގެ ވާހަކައެކެވެ. ނަމަވެސް މަޝްހޫރު މީހުންގެ ދިރިއުޅުމަށް ލޯބި ކުރި މި އަންހެނާ އެފަދަ މީހުންނާއި ގާތްވެ ، އެމީހުންގެ ދިރިއުޅުން ބަލާލުމުން ފެނުނީ ތަފާތު މަންޒަރެކެވެ. އެފަދަ މީހުންގެ ޙަޔާތުން ފެނުނީ ވަރިވުމާއި ރިހެބްގައި އުޅުމާއި އަމިއްލައަށް މަރުވުން ފަދަ ކަންކަމެވެ.
"އަހަންނަށް ކިޔަނީ ނިކޯލް ކުއީން. އަހަންނަކީ ކުރިން އެމެރިކާގެ ނަން މަޝްހޫރު ފޮޓޯގްރާފަރެކެވެ.
އަހަރެން ވަރަށް ކުޑައިރު އަހަރެންގެ މައިންބަފައިން ވަރިވިއެވެ. އަދި ބައްޕަ އެހެން ކައިވެންޏެއްކޮށް އައު ދިރިއުޅުމެއް ވެސް ހޯދިއެވެ. އަދި އޭގެ ފަހުން މަންމަ މަސްތުވާތަކެތީގެ ވަބާގައިޖެހި އަހަންނަށާއި އަހަރެންގެ ކޮއްކޮއަށް އަނިޔާކުރުންފަދަ އެތައް ކަމެއް ހިނގިއެވެ.
ފަހުން މަންމަގެ އާއިލާގެ އެހެން މީހުން އަހަރުމެން މަންމަ ކައިރިން ސަލާމަތްކޮށް، އާއިލީ މީހެއްގެ ގޭގައި ބެހެއްޓިއެވެ. އަހަރެންގެ އުމުރުން އަށް އަހަރުގައި މަންމަގެ ދެބެންގެ ދެދަރި މީހަކު އަހަރުމެންނާއި ޤާނޫނީ ގޮތުން ހަވާލުވިއެވެ.
އެގެއިން ނިކުމެ އަމިއްލަ ދިރިއުޅުމެއް އުޅުމަށްޓަކައި އުމުރުން 17 އަހަރުގައި އެޕާޓްމެންޓެއް ކުއްޔަށް ނަގާ ވަކިން އުޅެން ފެށީމެވެ. އަހަރެން ޤަބޫލުކުރި ގޮތުގައި، ދިރިއުޅުމުގައި އަމިއްލައަށް އުޅެވޭވަރަށް ހޭނެން ޖެހޭނެއެވެ. އެހެންކަމުން ޕާޓް-ޓައިމްއަށް އެކިއެކި މަސައްކަތްކުރަމުން ކިޔެވުން ފުރިހަމަކޮށް އަދި އުޅޭތަނުގެ ކުލިވެސް ދައްކަމުން އުޅެން ޖެހުމުން ދިރިއުޅުމުގެ ބުރަކަން އިޙުސާސްވިއެވެ. ނަމަވެސް ހިތްވަރުކޮށް، އާމްދަނީ ހޯދޭނެ ދާއިރާއެއް ވެސް ހޯދީމެވެ.
އުމުރުން 21 އަހަރު ފުރުނުއިރު އަހަންނަކީ ނިއު ޔޯކްގެ ނަން މަޝްހޫރު ފޮޓޯގްރާފަރެކެވެ. ޑެލާސްއަށް ދިރިއުޅުން ބަދަލުކޮށް އެތަނުގެ ނައިޓްކްލަބްތަކުގައި ފޮޓޯގްރާފަރަކަށް އަހަރެން މަސައްކަތް ފެށީމެވެ. މަޝްހޫރު މީހުން ކަމުގައިވާ ޖަސްޓިން ޓިމްބަލޭކް، ޓޮމީ ލީ، ޓިމްބާލޭންޑް ފަދަ މީހުންގެ ފޮޓޯ ނަގައި، އަހަރެންގެ ފޮޓޯތައް މެގަޒިންތަކުގައި ވެސް ބޭނުން ކުރަން ފެށިއެވެ. އިސާހިތަކު މުއްސަނދިކަމާއި މަޝްހޫރުކަން އަހަންނަށް ވެސް ލިބުނެވެ. ޕާޓީ ކުރުމާއި މަސައްކަތުގައި ދުވަސްތައް ހޭދަވަމުން ދިޔައެވެ.
އަހަރެން އެފަދަ މީހަކަށް ވުމަށް އެދުނު މަޝްހޫރުމީހުންނާއި ބައްދަލުވަމުން ދިޔައެވެ. އަދި ޙަޔާތަކީ އެފަދަ މީހުން ފަދައިން އަގުބޮޑު ހެދުމާއި ގަހަނާތަކުން މުއްސަނދިވެފައިވާ ޙަޔާތްކަމުގައި ދުށީމެވެ. ނަމަވެސް އެމީހުންނަށް ލޯބި ކުރަމުންދިޔައިރު އެމީހުންގެ ޙަޔާތުގެ ކަންކަމުން ބަލަން ފެށުމުން އަހަންނަށް ފެނުނީ އެފަދަ ބައެއް މީހުން އަމިއްލައަށް މަރުވާ މަންޒަރާއި ވަރިވުމާއި ރިހެބަށް ދިޔުންފަދަ ކަންކަމެވެ. އަބަދުވެސް ކޮންމެވެސް ކަމެއްގައި ''ފިތިފައި''ތިބޭ ކަމެވެ. އެހިސާބުން ރައްޓެހިންނާއި ކުރަމުންދާ މަޝްވަރާގައި ދިރިއުޅުމާއި ޙަޔާތަކީ ކޮބައިކަމާމެދު ވާހަކަ ދެކެވެއެވެ. ނަމަވެސް އޭގެ ޙަޤީޤީ ޖަވާބަކާއި ހަމަޔަކަށް ނުދެއެވެ.
އަހަރެންގެ ހަޔާތް ބަދަލުވީ އެއްރޭ ކްލަބުން މުސްލިމު ފިރިހެނަކާއި ބައްދަލުވުމުންނެވެ. އެއީ އޭނާގެ އެކުވެރިންތަކެއް ކުރި އާދޭހަށް ޓަކައި ގޮސްހުރި ޙަސަން އެވެ. އެހެންމީހުންނާ އޭނަގެ ޢަމަލުތައް ތަފާތެވެ. ރަލެއް ނުބޮއެ ، އެއްވެސް މީހަކާ ވާހަކަ ނުދައްކާ ޙަސަން އެތަނުގައި ހުރީ ބީރައްޓެހިވެފައެވެ. އެތަނަށް ވަންނަ އެހެން އެންމެންނާއި ޚިލާފަށް އޭނާ އަހަންނަކާއި ވާހަކައެއް ނުދައްކައެވެ. އަހަރެންގެ ފޯނު ނަމްބަރެއް ނާހައެވެ.
ޙަސަންއާއި އަހަރެންގެ ޙަޔާތުގައި ދިމާވި އެހެން މުސްލިމުންގެ ޢަމަލުތަކާއި މެދު އަހަރެންގެ ހިތުގައި ސުވާލު އުފެދުނެވެ. އެމީހުން ހިތްހަމަޖެހި އުފަލުގައި ދިރިއުޅެނީ އަހަރެމެންގެ ނުކުރާ ކޮންކަމެއް އެމީހުން ކުރާތީބާވައޭ ސުވާލު އުފެދުނެވެ. ރާނުބޮއެ އެމީހުންނަށް ލިބެނީ ކޮން އުފަލެއް ހެއްޔެވެ؟
އަހަރެން އެރޭ ޙަސަން އާއި ވާހަކަ ދައްކާ ފަހުން ވެސް އޭނާ އާއި ބައްދަލު ކުރީމެވެ. އިސްލާމްދީނާއި ބެހޭގޮތުން އެނގުނު އެއްޗެހި ކިޔައިދިނީމެވެ. އަހަރެންގެ ޝައުޤުވެރިކަން ފެނިފައި އޭނާ އަހަންނަށް ޤުރްއާނުގެ މުސްޙަފެއް ދިނެވެ. އަދި ޑަލާސް ގެ މިސްކިތެއްގައި ދީން އުނގަންނައިދޭ ކްލާސްތަކެއް ހިންގާ ވާހަކަ ވެސް ބުންޏެވެ.
އޭގެފަހުން އަހަންނާއި ހަސަން ބައްދަލެއް ނުވެއެވެ. ނަމަވެސް އެކްލާސްތަކަށް އަހަރެން ދާން ފެށީމެވެ. އިސްލާމްދީނުގެ ރީތިކަމާއި ސުލްޙަވެރިކަމުން އަހަރެންގެ ހިތް އިސްލާމްދީނަށް އެނބުރެން ފެށިއެވެ. ކްލަބްތަކަށް ދިޔުން ހުއްޓި، ތެދުމަގަށް އެޅެން ފެށުނެވެ. ރާބުއިންވެސް ހުއްޓުނެވެ. އިސްލާމްދީނުގައި އަންހެނުންނަށް ދީފައިވާ ޚާއްސަ ޤަދަރު އެނގިފައި ވެސް އަހަރެން ފެންކަޅިވިއެވެ.
އެހިސާބުން އަހަރެން ނިންމީ އިތުރަށް ވަގުތު ފާއިތު ކުރުމަކާއިނުލާ މުސްލިމަކަށް ވާށެވެ. އެގޮތުން 2007 ވަނަ އަހަރުގެ އޭޕްރިލްމަހުގެ ފަހުކޮޅު އަހަރެން އައިއޭއެންޓީ ގައި ޝަހާދަތުގެ ދެކަލިމަ ކިޔާ މުސްލިމަކު ކަމުގައިވީމެވެ. އަހަންނަށް ޝަހާދަތް ލައިދިނީ އިމާމް ޔޫސުފް ކަވާކީ އެވެ. އޭރު އެތަނުގައި ޙަސަން ވެސް ހުއްޓެވެ.
އަހަރެން އިސްލާމްވީ އިސްލާމްދީން ނުވަތަ ޙައްޤު ދީނެއް ހޯދަން ކުރި މަސައްކަތަކުން ނޫނެވެ. އަހަރެން މަސައްކަތް ކުރީ ނަފްސްގެ ހިތްހަމަ ޖެހުން ހޯދާށެވެ. އަދި އިސްލާމްދީނާއި މެދު ޝައުޤުވެރިކަން އުފެދުނީ އިސްލާމުންގެ ސާދާ އަދި އުފާވެރި ދިރިއުޅުން ފެނިފައެވެ. އިސްލާމަކަށްވުމާއެކު އަހަރެން ހޯދަން ބޭނުންވި ހިތްހަމަޖެހުމާއި އުފާވެރިކަން އަހަންނަށް ލިބިގެން ދިޔައެވެ.
ޙަސަންގެ އެހީއާއެކު އަހަންނަށް އައު އަދި ދިރުމާއި އުފާވެރިކަން އެކުލެވޭ ދިރިއުޅުމެއް ލިބުނެވެ. އެހެންކަމަށްވުމާއެކު އަހަރެންގެ ޙަޔާތް ބަދަލު ކުރުމުގައި އެހީވި ޙަސަންއާއި ކައިވެނި ކުރުމުގެ ފުރުސަތު ލިބި އަހަރެން އެ އުފާވެރި ނިންމުން ނިންމީމިއެވެ. އަދި ޙަސަންގެ ޤައުމު ޖޯޑަންއަށް ގޮސް ހިޖާބުވެސް އަޅަން ފެށީމެވެ. އަދި އެނބުރި ޤައުމަށް ގޮސް ﷲގެ ރަޙުމަތުން ދިރިއުޅެމުން މިގެންދަނީ މުސްލިމެއްގެ އުފާވެރި ދިރިއުޅުމެވެ.
އަހަންނާއި ހަސަން ކައިވެނި ކުރީ 2008 ވަނަ އަހަރުގެ އޭޕްރިލް މަހުގައެވެ. އަދި އަހަރުމެންގެ ދެކުދިން ވެސް މިހާރު ތިބެއެވެ."
Ads by STO
