ބުރެވި ތޫފާނުގެ ބާރު ދަށްވެ ކޮޅިގަނޑަކަށް ބަދަލުވެއްޖެ
ބުރެވި ތޫފާނުގެ ބާރު ދަށްވެ ކޮޅިގަނޑަކަށް ބަދަލުވެފައިވާ ކަމަށް ރާއްޖޭގެ މޫސުމާ ބެހޭ ޤައުމީ އިދާރާއިން ބުނެފިއެވެ.
މެޓް އޮފީހުން ކުރި ޓްވީޓެއްގައި ބުނެފައި ވަނީ ބުރެވި ތޫފާންގެ ބާރު ދަށްވެ، މިހާރު ބާރުގަދަ ކޮޅިގަނޑަކަަށް ބަދަލުވެފައި ކަމަށާއި، ތޫފާން ހުރީ އިންޑިޔާގެ ކަންޔާކުމާރީގެ އިރު އިރުއުތުރުން 200 އެއްހާ ކިލޯމީޓަރު ދުރުގައި ކަމަށެވެ.
މޫސުމާ ބެހޭ ގައުމީ އިދާރާއިން ބުނީ ތޫފާނުގެ ބާރު ދަށްވި ނަމަވެސް ރާއްޖެ ސަރަހައްދުގައި މޫސުން ގޯސް ކަމަށާއި ވައި ގަދަވާނެ ކަމަށް ލަފާކުރެވޭ ކަމަށެވެ. އެގޮތުން ވިލާގަނޑުގައި 45 މޭލަށް ވައި ޖެހޭނެކަމަށް ބެލެވޭ ކަމަށް ވެސް މޫސުމާ ބެހޭ ގައުމީ އިދާރާއިން ބުނެއެވެ
ތޫފާން ބުރެވީގެ ބާރު ދަށްވި ނަމަވެސް، މިއަދު ގއ އިން ފެށިގެން އައްޑޫ ސިޓީއާ ދެމެދުގެ ރަށްތަކަށް ހުދު ސަމާލުވަނީ ނެރެފައެވެ.
ހުކުރު ދުވަހުގެ ރޭގެ 8:00 އާ ހަމައަށް ރާއްޖޭގެ މޫސުން ކުރިއަށް ލަފާކުރާގޮތަށް ބަލާއިރު ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެއެވެ. ހުޅަނގާއި ހުޅަނގުއުތުރުން، ހުރިހާ ހިސާބަކަށް ވެސް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވުން އެކަށީގެން ވެއެވެ.
މޫސުމާބެހޭ ގައުމީ އިދާރާއިން ބުނީ ރާއްޖޭގެ ކަނޑުތައް އާންމު ގޮތެއްގައި ގަދަވާނެ ކަމަށެވެ. އަދި ރާޅުގެ އުސްމިނުގައި 5 ފޫޓާއި 7 ފޫޓާ ދެމެދު ހުންނާނެ ކަމަށާއި، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުމަަކީ އެކަށީގެންވާ ކަމެއް ކަމަށެވެ. އެހެންކަމުން ހުރިހާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
Ads by STO
