ހައްދުންމަތީގެ ދެ ރަށަކަށް ކުރެއްވި ދަތުރުފުޅު ނިންމަވާލެެއްވުމަށްފަހު ރައީސް މާލެ ވަޑައިގެންފި
ހައްދުންމަތީގެ ދެ ރަށަކަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށް ފަހު ރައީސް އިބްރާހިމް މުޙައްމަދު ޞާލިޙު މިރޭ މާލެ ވަޑައިގަންނަވައިފިއެވެ. މި ދަތުރުފުޅުގައި ރައީސް ވަޑައިގަންނަވާފައި ވަނީ ލ. ކައްދޫ އަށާއި ގަމަށެވެ.
ކައްދޫއަށް ރައީސް ޞާލިޙު ކުރެއްވި ދަތުރުފުޅުގައި، އެ ރަށުގައި ޤާއިމު ކޮށްފައިވާ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ސެންޓްރަލް އޭރިއާގެ މަރުކަޒަށް ޒިޔާރަތް ކުރައްވާ، ސިފައިންގެ އަސްކަރީ ތަމްރީނުގެ ޑިމޮންސްޓްރޭޝަންއެއް ބައްލަވާލައްވާފައި ވެއެވެ.
މިދިޔަ ބުރާސްފަތި ދުވަހު ކައްދޫގައި ބޭއްވި މި ޑެމޮންސްޓްރޭޝަންއަކީ ހުސްވި ނޮވެންބަރު މަހުގެ 16 އިން ފެށިގެން ޑިސެންބަރު މަހުގެ 3 ވަނަ ދުވަހުގެ ނިޔަލަށް ކުރިއަށް ގެންދިޔަ އެމް.އެން.ޑީ.އެފް.ގެ އަސްކަރީ ތަމްރީނުތަކުގައި ސިފައިން ހޯދާފައިވާ ހެވިކަމުގެ ހުނަރުތައް ދައްކާލުމަށް ކުރިއަށްގެންދިޔަ ޑެމޮންސްޓްރޭޝަން އެކެވެ.
ރައީސް ޞާލިޙު ލ. ގަމަށް ކުރެއްވި ދަތުރުފުޅުގައި ސަރުކާރުން ކުރިއަށް ގެންދިޔަ ތިން މަޝްރޫޢެއްގެ ނިމުން ފާހަގަ ކުރައްވައި، އެ ތިން ތަނުގެ ޚިދުމަތް ރަސްމީގޮތުން އިފްތިތާޙް ކޮށްދެއްވާފައިވެއެވެ.
އެއީ، ގަމު ރީޖަނަލް ހޮސްޕިޓަލްގައި ސީ.ޓީ. ސްކޭންގެ ޚިދުމަތާއި، ގަމުގެ މަރުކަޒީ އިންޖީނުގެ އެއް ވިއުގައަކުން ގުޅައިލުމާއި، އަދި ގަމުގައި އަލަށް ޢިމާރާތްކޮށްފައިވާ ގަމު ޒޯން ސްޓޭޑިއަމްގެ ފުޓުބޯޅަ ދަނޑުގެ މަޝްރޫޢުއެވެ.
މި ދަތުރުފުޅުގައި އެ މަނިކުފާނު ވަނީ ގަމުގައި އަލަށް ބިނާކޮށްފައިވާ މަރުކަޒީ އިންޖީނުގެއަށް ޒިޔާރަތް ކުރައްވާ، އެ ތަން ވެސް ބައްލަވައިލައްވާފައެވެ.
