ވިއްސާރަ ދުވަސްވަރަކަށް ވުމާއެކު، މާލޭ މަގުމަތީގައި ކުނި ނުބެހެއްޓުމަށް ސިޓީ ކައުންސިލުގެ އިލްތިމާސެއް
މި ދުވަސްވަރަކީ ވިއްސާރަ ދުވަސްވަރަކަށް ވުމާއެކު، މާލެ މަގުމަތީގައި އޮޔާދާ ގޮތަށް ކުނި ނުބެހެއްޓުމަށް މާލެ ސިޓީ ކައުންސިލުން އިލްތިމާސް ކުރައްވައިފިއެވެ.
މާލެ ސިޓީ ކައުންސިލުގެ މޭޔަރު ޝިފާ މުހައްމަދު "ޕީއެސްއެމް ނިއުސް" އަށް ދެއްވި އިންޓަވިއުއެއްގައި ވަނީ ވިއްސާރަ ދުވަސްވަރު މާލެ މަގުމަތީގައި އަދި ވަކިން ހާއްސަކޮށް ފެންބޮޑުވާ މަގުތަކުގައި އޮޔާދާ ގޮތަށް އެކި ޒާތުގެ ކުނި ބަހައްޓާފައި ހުންނާތީ އެކަމާ މެދު ކަންބޮޑުވުން ފާޅުކުރައްވާފައެވެ.
ޝިފާ ވިދާޅުވީ ކޮންމެ ވިއްސާރަ ދުވަސްވަރެއްގައި ވެސް މާލެ މަގުމަތީގައި ކުނީގެ މައްސަލަ ދިމާވެ، ވެމްކޯ އާއެކު ގިނަ މަސައްކަތްތަކެއް ކުރަން ޖެހޭ ކަމަށެވެ. އެގޮތުން އެންމެ ފަހުން މާލެއަށް ކުރި ބޮޑު ވިއްސާރައިގައި ވެސް 4 ފަހަރެއްގެ މަތިން ކުނި ނަގަން ޖެހުނު ކަން ޝިފާ ފާހަގަކުރެއްވިއެވެ.
"ވިއްސާރަ ދުވަސްވަރަކަށް މިދުވަސްވަރު ވާއިރު މަގުތަކަށް ކުނި ދޫކޮށްލައްވަން ނުހައްދަވާ ހުރިހާ ބޭފުޅުންވެސް ދުރާލާ ކުނި އަމިއްލައަށް އުކާލައްވަން ސަމާލުކަން ދެއްވާތި. ކޮންމެ ހަފްތާއަކުވެސް ރައްޔިތުންގެ އެތައް ފައިސާއެއް ދީފައި މިހާރުވެސް މަގުތަކުގައި ހުންނަ ކުނި އަޅުގަނޑުމެން ނަގަން އެބަޖެހޭ." މި މައްސަލައާ ގުޅިގެން ވާހަކަ ދައްކަވަމުން ޝިފާ ވިދާޅުވިއެވެ.
މިހާރު ކުރަމުން އަންނަ ވިއްސާރައިގައި ރާއްޖޭގެ އެކި ހިސާބުތަކަށް މިއަދާ އަދި މާދަމާ ވެސް ބޯކޮށް ވާރޭ ވެހޭނެ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާ ކޮށްފައެވެ.
ވެމްކޯއިން ކުރިން ކުނި ނަގަމުން އައީ ފްލޯ ތަކަށް އަރާ މިހާރު މިނެހެނީ އަމިއްލަޔަށް ކުނި މަގު މައްޗަށް ބާލަން، ބޭލިޔަސް ނުބޭލިޔަސް އަގު އެއްވަރެއް، ވެމްކޯ އިން ގެޔަކަށް ނުވަދޭ، ދެން މިޖެހެނީ ކުނި މަގުމަތީ ބަހައްޓަން، ދެން ޝިފާމެން މިއަންގަނީ މަގުމަތީ ކުނި ނުބަހައްޓަން، ދެން ކޮންތާކު ކުނި ބަހައްޓާނީ ޝިފާމެންގޭގަތޯ ބަހައްޓަންވީ؟