ލިޔުންތައް ދިރާސާ ކުރެވޭނެ އިންތިޒާމު ރައީސް ޔާމީނަށް ހަމަޖައްސައިދޭން އަންގައިފި
ކުރިގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ދައުލަތުން އުފުލާފައިވާ ދެ ދައުވާއާ ގުޅޭ ލިޔުންތައް ދިރާސާ ކުރެވޭނެ އިންތިޒާމުތައް ޕްރޮސެކިއުޓާ ޖެނެރަލް (ޕީޖީ) އޮފީސް މެދުވެރިވެގެން ހަމަޖައްސައިދިނުމަށް ކްރިމިނަލް ކޯޓުން މިއަދު ދައުލަތަށް އަންގައިފިއެވެ.
ރައީސް ޔާމީންގެ މައްޗަށް ޕީޖީގެ ފަރާތުން އުފުލާފައިވަނީ މަނީ ލޯންޑަރިން ކުށުގެ ދައުވާ އާއި ރިޝްވަތު ގަބޫލު ކުރުމުގެ ދައުވާ އެވެ. މި ދެ ދައުވާ އުފުލާފައިވަނީ ޓޫރިޒަމް މިނިސްޓްރީ އާއި އެމްއެމްޕީއާރްސީ މެދުވެރިކޮށް ރިސޯޓެއްގެ ގޮތުގައި ތަރައްގީ ކުރުމަށްޓަކައި ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެންނެވެ.
އެގޮތުން ޕީޖީ އޮފީހުން ބުނެފައި ވަނީ ނުފޫޒު ބޭނުން ކޮށްގެން މއ. ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުން ކޮށްގެން އެ ފައިސާ ލޯންޑާ ކުރުމަށްޓަކައި ރައީސް ޔާމީން ފަށަލަ ކޮށްފައިވާ ކަމަށެވެ.
ރައީސް ޔާމީންގެ މައްޗަށް އުފުލާފައިވާ ދައުވާތަކުގެ ޝަރީއަތް ފެށުމުގެ ކުރިން މިއަދު ކުރިއަށް ދިޔަ އިބްތިދާއީ އަޑުއެހުމުގައި ވެސް އެމަނިކުފާނުގެ ވަކީލުންގެ ޓީމުން ފާހަގަކުރީ، ދައުވާތަކާ ގުޅިގެން ދައުލަތުން ހުށަހަޅާފައިވާ ލިއުންތައް ނުލިބޭ މައްސަލަ އެވެ.
އެގޮތުން އެއަޑުއެހުމުގައި ވާހަކަ ދައްކަވަމުން ރައީސް ޔާމީނުގެ ޤާނޫނީ ވަކީލު އަދި ކުރީގެ ނައިބު ރައީސް ޑރ. މުޙައްމަދު ޖަމީލު ވިދާޅުވީ މީގެ ކުރިން ބޭއްވި އަޑުއެހުމަށްފަހު ބައެއް ލިޔުންތައް ހޯދުމަށް ދިފާއުން ފޮނުވި ސިޓީގައި ދައުލަތުން ފާހަގަކޮށްފައި ވަނީ އެ ލިޔުންތަކާ ގުޅޭގޮތުން ދެކޭ ގޮތް ކަމަށެވެ.
ނަމަވެސް މައްސަލައިން ދިފާޢުވުމަށް މުހިންމުވާ ލިޔުންތައް ނިންމާނީ ދައުލަތުން ނޫންކަން ފާހަގަ ކުރައްވަމުން ޑރ. ޖަމީލު ވިދާޅުވީ ދައުވާއާ ގުޅޭ ހުރިހާ ލިޔުމެއް ލިބިގެން ނޫނީ ޖަވާބުދާރީ ވެވެން ނެތް ކަމަށެވެ.
މިދައުވާތަކާ ގުޅިގެން ދައުލަތުން ހުށަހަޅާފައިވާ ބައެއް ސީޑީތަކާއި ޑިޖިޓަލް ފޯމެޓުގައި ހުރި ބައެއް ލިއުންތައް ބެލުމަށް އެކަށީގެންވާ ވަގުތު ނުލިބޭ ކަމަށްވެސް ރައީސް ޔާމީންގެ ޤާނޫނީ ވަކީލުން ވަނީ ފާހަގަ ކުރައްވާފައެވެ.
މިއަދުގެ އަޑުއެހުމުގައި ގާޒީ ޝަކީލް ވިދާޅުވީ ވަކީލުންނާއެކު ދެ ގަޑިއިރުގެ ބައްދަލުވުމަކުން އެހާ ގިނަ ލިޔުންތަކާއި ވީޑިއޯތައް ދިރާސާ ނުކުރެވޭނެކަމަށް ގަބޫލުކުރައްވާ ކަމަށާއި އެހެންކަމުން، އެކަމަށް އެކަށީގެންވާ ފުރުސަތު ، ދައުވާ ލިބޭ ފަރާތަށް ފަހިކޮށް ދެއްވުމަށް ދައުލަތަށް އަންގަވާ ކަމަށެވެ.
މިމަހުގެ 15އާ ހަމައަށް އެފުރުސަތު ނުލިބިއްޖެނަމަ އެކަން ޝަރީޢަތާ ހިއްސާ ކުރުމަށް ވެސް ގާޒީ ވަނީ އަންގަވާފައެވެ.
