ވެކްސިން ލިބުމުގައި ޑަބްލިޔުއެޗްއޯ ގެ އެހީ ލިބޭނެ ކަމަށް އުންމީދު ކުރަން: ރައީސް
ކޮވިޑް-19އިން ރައްކާތެރިވުމުގެ ގޮތުން ދުނިޔޭގެ ބައެއް ޤައުމުތަކުން އުފައްދަމުން އަންނަ ވެކްސިން ރާއްޖެ ގެނައުމަށް، ދުނިޔޭގެ ސިއްޙަތު ޖަމްއިއްޔާ (ޑަބްލިޔުއެޗްއޯ) ގެ އެހީތެރިކަން ލިބޭނެ ކަމަށް އުއްމީދު ކުރައްވާ ކަމަށް ރައީސް އިބްރާހީމް މުހައްމަދު ޞާލިޙު ވިދާޅުވެއްޖެއެވެ.
ރައީސް ޞާލިޙް މިފަދައިން ވިދާޅުވީ ދުނިޔޭގެ ސިއްހަތު ޖަމިއްޔާއިން ދިވެހިރާއްޖެއަށް ކަނޑައަޅާފައި ހުންނަވާ މަންދޫބު ޑޮކްޓަރު އަރުވިންދު މާތުރުއާއެކު މިއަދު ރައީސް އޮފީހުގައި ބޭއްވެވި ބައްދަލު ކުރެއްވުމުގައި ވާހަކަ ދައްކަވަމުންނެވެ. މިބައްދަލު ކުރެއްވުމުގައި ރައީސް ޞާލިޙު ވަނީ ކޮވިޑް19ގެ ހާލަތުގައި ކުރިމަތިވި ގޮންޖެހުންތަކަކީ ކުދި ޖަޒީރާ ގައުމުތަކަށް ކުރިމަތިވެފައިވާ އެކި ނުރައްކާތަކާއި، އެ ގައުމުތަކުގެ ނާޒުކުކަން ހަނދުމަކޮށްދޭ މިސާލެއްގެ ގޮތުގައި ސިފަކުރައްވާ، މި ހާލަތުން އަރައިގަތުމަށް ކުރަމުންދާ މަސައްކަތުގައި އެ ޖަމްއިއްޔާއިން ދެމުންދާ އެހީތެރިކަމާއި އެއްބާރުލުން ފާހަގަކުރައްވާފައެވެ.
ވަކިން ހާއްސަކޮށް، ޑރ. އަރްވިންދް މާތުރުގެ މަންދޫބުކަމުގެ ދައުރުގައި އެ ޖަމިއްޔާއިން ރާއްޖެއާ މެދު ބަހައްޓަމުންދާ ގާތްކަމާއި، ބަދަހިވަމުންދިޔަ ގުޅުމަށް އިޝާރާތް ކުރައްވާ ރައީސް ވަނީ އެ ކަމަށް ޝުކުރު އަދާކުރައްވާފައެވެ.
މި ބައްދަލުކުރެއްވުމުގައި ޑރ. އަރްވިންދް ދެއްކެވި ވާހަކަފުޅުގައި ވިދާޅުވީ ކޮވިޑް19 ގެ ސަބަބުން ކުރިމަތިވި ހާލަތުން އަރައިގަތުމަށް ސަރުކާރުން ކުރަމުންދާ މަސައްކަތްތައް ފާހަގަކުރެވޭ ކަމަށާއި އަދި ވޭތުވެދިޔަ ދެ އަހަރުގެ ތެރޭގައި ސިއްހީ ދާއިރާ ކުރިއެރުވުމަށް ސަރުކާރުން ކޮށްފައިވާ މަސައްކަތްތަކާއި، ހޯދާފައިވާ ތަރައްގީއާއި ކާމިޔާބީ ވެސް ގިނަ ކަމަށެވެ.
އެ ގޮތުން، ޕްރައިމަރީ ހެލްތު ކެއާގެ ދާއިރާއާއި، ނަފްސާނީ ދުޅަހެޔޮކަމާއި، ސާވިކަލް ކެންސަރުން ރައްކާތެރިވުމަށް އެޗްވީޕީ ވެކްސިން ފޯރުކޮށްދިނުމާއެކު ރާއްޖޭގެ ސިއްހީ ގާބިލުކަން އިތުރުވެފައިވާކަން އެ މަނިކުފާނު ފާހަގަ ކުރެއްވިއެވެ.
މި ބައްދަލުކުރެއްވުން ނިންމަވައިލައްވަމުން ރައީސުލްޖުމްހޫރިއްޔާ ވަނީ ޑޮކްޓަރ އަރްވިންދް މާތުރުއަށް ކުރިއަށް އޮތް ދުވަސްތަކުގައި ފާގަތިކަމާއި ކާމިޔާބީއަށް އެދިވަޑައިގަންނަވާ ކަމުގައި ވިދާޅުވެފައެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލްއުސްތާޛު ޢަލީ ޒާހިރާއި، ސެކްރެޓަރީ ފޮރިން ރިލޭޝަންސް ޞަބްރާ އިބްރާހީމް ނޫރައްދީނާއި، އަންޑަރ ސެކްރެޓަރީ ޑރ ޢަބްދުލްމަލިކުގެ އިތުރުން ދުނިޔޭގެ ޞިއްޙަތު ޖަމުޢިއްޔާގެ ދިވެހިރާއްޖޭގެ ކަންޓްރީ އޮފީހުގެ އެގްޒެކެޓިވް އެސިސްޓަންޓް އައިމިނަތު އިސްމާޢީލް ބައިވެރިވެވަޑައިގެންނެވިއެވެ.
Ads by STO
