5 މިލިއަން ރުފިޔާއަށްވުރެ ދަށުގެ ޕްރޮކިޔުމަންޓްތަކުގެ މައުލޫމާތު ހާމަ ކުރަން އަންގައިފި
ފަސް މިލިއަން ރުފިޔާއަށް ވުރެ ދަށުގެ ހުރިހާ ޕްރޮކިއުމަންޓުތަކުގެ މައުލޫމާތު ހާމަކުރުމަށް ފިނޭންސް މިނިސްޓަރ އިބްރާހިމް އަމީރު އަންގަވައިފިއެވެ.
މިއަދު ފިނޭންސް މިނިސްޓްރީން ނެރުނު ސާކިއުލާއެއްގައި މިނިސްޓަރ އަންގަވާފައި ވަނީ ސަރުކާރުގެ އޮފީސްތަކުންނާއި، މިނިވަން މުޢައްސަސާތަކުން ކުރިއަށްގެންދާ ޕްރޮކިއުމަންޓަކީ މާލިއްޔަތުގެ ގަވާއިދުގައި ބަޔާންކޮށްފައިވާ އަގުގެ ޕްރޮކިއުމަންޓެއް ކަމުގައިވާނަމަ އެފަދަ ޕްރޮކިއުމަންޓްތައް އެވޯޑްކޮށްފައިވާ ފަރާތުގެ މަޢުލޫމާތު، އެ ޕްރޮކިއުމަންޓެއް އެވޯޑް ކުރެވުނު ތާރީޚުން ފެށިގެން ސަރުކާރު ބަންދުނޫން ފަސް ދުވަހުގެ ތެރޭގައި އާއްމުކުރަން ޖެހޭކަމަށެވެ.
ސަރުކާރުގެ އޮފީސްތަކުންނާއި، މިނިވަން މުއައްސަަސާތަކުން ކުރިއަށްގެންދާ ޕްރޮކިއުމަންޓަކީ މާލިއްޔަތުގައި ބަޔާންކޮށްފައިވާ އަގުގެ ޕްރޮކިއުމަންޓެއް ކަމުގައިވާނަމަ ކޮންމެ މަހެއްގައި އެފަދަ ޕްރޮކިއުމަންޓްތައް އެވޯޑްކޮށްފައިވާ ފަރާތުގެ މަޢުލޫމާތު ވެސް، ދެން ފެށޭ މަހެއްގެ 10 ވަނަ ދުވަހުގެ ކުރިން ދިވެހި ސަރުކާރުގެ ގެޒެޓްގައި ޝާއިޢު ކުރުމަށް ވެސް އެސާކިއުލާގައި މިނިސްޓަރ އަމީރު ވިދާޅުވެފައިވެއެވެ.
މީގެ އިތުރުން އެސާކިއުލާގައި ބުނެފައި ވަނީ ދައުލަތުގެ މާލިއްޔަތުގެ ގަވާއިދުގެ 10.13 ވަނަ މާއްދާގެ ދަށުން ދައުލަތުގެ އޮފީސްތަކުގައި ގާއިމްކޮށްފައިވާ ބިޑް ކޮމިޓީތަކުގައި ހިމެނޭ މެންބަރުންގެ މައުލޫމާތުތައް މިމަހުގެ 31 ވަނަ ދުވަހުގެ 14:00 ކުރިން ހުށަހަޅަން ޖެހޭނެ ކަމަށެވެ.
އެގޮތުން ބަނޑޭރި ޕޯޓަލް ބޭނުންކުރާ ހުރިހާ އޮފީސްތަކުން ބިޑް ކޮމިޓީގެ މެންބަރުންގެ މައުލޫމާތު އެ ޕޯޓަލްގެ މެދުވެރިކޮށް ހުށަހެޅުމަށް އަންގާފައިވާއިރު އެނިސްޓްރީން ބުނީ ބަނޑޭރި ޕޯޓަލް ބޭނުން ނުކުރާ އޮފީސްތަކުން ކޮމިޓީ މެންބަރުންގެ ދަފުތަރު ފުރިހަމަކުރުމަށް ފަހު [email protected] އަށް ފޮނުވަން ވާނެ ކަމަށެވެ.
