ޗުއްޓީއެއް ނުނަގައި މާ ގިނަ ދުވަހު މަސައްކަތް ކުރުމުން އަނބިމީހާ ވަރިވެގެން ހިނގައްޖެ
އިނގިރޭސި ވިލާތުގެ މީހަކު ޗުއްޓީއެއް ނުނަގައި މާ ގިނަ ދުވަހު މަސައްކަތް ކުރުމުން އަނބިމީހާއަށް އޭނާ ދޫކޮށް ވަރިވެގެން ދެވޭނެ ކަމަށް ކޯޓުން ނިންމުމުން، އޭނާގެ އިންސާނީ ހައްގަކަށް އަރައިގަތީ ކަމަށް ބުނެ ފިރިހެނަކު މައްސަލަ ޖައްސައިފިއެވެ.
ޗާލްސް އަޔޭ ނަމަކަށް ކިޔާ މިމީހާ ވަނީ ކޯޓުން އޭނާގެ އަނބިމީހާއަށް އޭނާގެ ކައިރިން މާ "ފަސޭހައިން" ވަރިވުމުގެ ފުރުސަތު ދިނީ ކަމަށް ބުނެ މައްސަލަ ހުށަހަޅައިފައެވެ. އަދި އެއީ އެގައުމުގެ ވަރިކުރުމުގެ ގާނޫނާ ޚިލާފު ކަމެއް ކަމަށް ވެސް އޭނާ ވަނީ ބުނެފައެވެ.
64 އަަހަރުގެ މި މީހާ ބުނެފައި ވަނީ އެއީ އިނގިރޭސި ވިލާތުގެ ގާނޫނުގައި ވަރިވެވެން އޮންނަ ސަބަބުތަކުގެ ތެރޭގައި ހިމެނޭ ކަމެއް ނޫން ކަމަށެވެ. އެހެންކަމުން، އެއްވެސް ސަބަބަކާ ނުލާ ވަރިވެވުމަކީ ވެވިގެންވާނެ ކަމެއް ނޫން ކަމަށް ވެސް އޭނާ ވަނީ ބުނެފައެވެ.
އޭނާ ވަނީ ސަބަބަކާ ނުލާ ވަރި ނުވެވޭނެ ގޮތަށް އިނގިރޭސި ވިލާތުގެ ގާނޫނު ބަދަލުކުރަން ވެސް ޚިޔާލު ހުށަހަޅާފައެވެ. އަދި ކޯޓުގެ އެނިންމުމުގެ ސަބަބުން އޭނާގެ އިންސާނީ ހައްގަކަށް ކޯޓުން އަރައިގަންފައިވާ ކަމަށް ވެސް އޭނާ ވަނީ ތުހުމަތު ކޮށްފައެވެ.
އޭނާ ވަނީ ދެމަފިރިންގެ ތެރެއިން ކޮންމެ ވެސް އެކަކު ބޭނުން ވެގެން ވަރިވެވުމަކީ ރަނގަޅު ގޮތެއް ނޫން ކަމަށާއި ވަރީގެ މުއާމަލާތް ހިނގަން ޖެހޭނީ ދެމަފިރިން ވެސް ބޭނުން ވެގެން ކަމަށް ބުނެފައެވެ. އަދި އޭގެ ސަބަބުން ކައިވެނިތައް ރޫޅުން މަދުވާނެ ކަމަށް އޭނާ ބުނެއެވެ.
Ads by STO
