ޒިޔަދަމްގެ މަރު: ތުހުމަތުވާ އެކަކުގެ އަތާއި ސޯޓުން ލޭ ފެނުނު ކަމަށް ހެކިވެރިއަކު ބުނެފި
ލ. މުންޑޫ/ ނޫވިލު އަލީ ޒިޔަދަމް މަރާލިކަމަށް ތުހުމަތުކުރެވޭ މީހުންގެ ތެރެއިން އެރަށު ހީނާވިލާ މުހައްމަދު ޝަނޫނުގެ އަތާއި ސޯޓުން ލޭ ފެނުނު ކަމަށް މިމައްސަލައިގައި ސިއްރުން ހެކިބަސް ދިން ހެކިވެރިޔަކު ބުނެފިއެވެ.
މިމައްސަލައިގައި ދައުލަތުން ގަސްތުގައި މީހަކު މެރުމުގެ ދައުވާ އުފުލާފައި ވަނީ ލ. މުންޑޫ، ހީނާވިލާ މުހައްމަދު ޝަނޫން އާއި އެރަށު ބީޗްވިލާ އަލީ ސިފާމްގެ މައްޗަށެވެ.
ދައުލަތުން ބުނެފައިވަނީ 2015 ވަނަ އަހަރުގެ މާރޗް މަހުގެ 20 ވަނަ ދުވަހުގެ ރޭ 10:30 އެހާކަންހާއިރު ލ. މުންޑޫ ވަގުތީހިޔާގޭ ކައިރިން ޒިޔަދަމް ހިނގާފައި ދަނިކޮށް، ޝަނޫނާއި ސިފާމް ، ޒިޔަދަމްގެ ފަލަމަސްގަނޑަށް އަށް އިންޗި ހުންނަވަރުގެ ވަޅިއެއް ހަރާލާފައިވާ ކަމަށެވެ.
މިމައްސަލައާ ގުޅޭގޮތުން މިއަދު ކްރިމިނަލް ކޯޓުގައި ބޭއްވި ޝަރީއަތުގެ މަޖިލީހުގައި ސިއްރު ހެކިވެރިޔާ ބުނީ ޒިޔަދަމް މަރާލުމުގެ ކުރިން ހޫނު ގަދަ ޒުވާބެއް ހިނގި ކަމަށާއި އެ ޒުވާބު ހިނގާ ދިޔައީ ސިފާމްގެ ކޮއްކޮ އާއި ޒިޔަދަމާ ދެމެދު ހިނގި ކަންތައްތަކެއްގެ ސަބަބުން ކަން އެނގޭ ކަމަށެވެ.
ހެކިވެރިޔާ ބުނީ އޭނާއަށް ޒިޔަދަމް މަރާލާފައި އޮއްވާ ފެނިފައިވަނީ ޒިޔަދަމްގެ ޅިޔަނުގެ ގޭގެ ބަދިގޭގެ ތެރެއިން ކަމަށެވެ. ޒިޔަދަމް އޮތީ އައިސްއަލަމާރިއާ ދޮރާދޭތެރޭ ވެއްޓިފައި ކަމަށާއި މުޅި ގައިގައި އޮތީ ލޭ ކަމަށް ވެސް ހެކިވެރިޔާ ހެކިބަސް ދެމުން ބުންޏެވެ.
ހެކިވެރިޔާ ބުނީ ޒިޔަދަމް އެގޭގެ ބަދިގެއިން ނަގައިގެން ސިއްހީ މަރުކަޒާ ހަމައަށް ގެންދިޔައިރު، ސިއްހީ މަރުކަޒު ކައިރިން މައްސަލައިގައި ތުހުމަތު ކުރެވޭ ޝަނޫނު ފެނުނު ކަމަށާއި އޭނާ އެތަނުގައި ވަރަށް އަޑުގަދަކޮށް ހެދި ކަމަށެވެ.
"ޝަނޫނުގެ ސޯޓުގައި އަދި އަތުގައި ލޭ ހުރިތަން ފެނުނު. އަލީ ސިފާމް އެންމެ ފުރަތަމަ ފެނުނު އިރު ލައިގެން ހުރި ހެދުމެއް ނޫން ދެން ފެނުނު އިރު ލައިގެން ހުރީ" ހެކިވެރިޔާ ބުންޏެވެ.
ދައުލަތާއި ދައުވާ ލިބޭ މީހުންގެ ވަކީލުން ކުރި ބައެއް ސުވާލުތަކަށް ހެކިވެރިޔާއަށް ޖަވާބެއް ނުދެވުނެވެ. އޭނާ ބުނިގޮތުގައި އެ މައްސަލައަށް ފަސް އަހަރަށްވުރެ ގިނަ ދުވަސް މިހާރު ވުމުން ބައެއް ކަންކަން ހަނދާން ނެތް ކަމަށެވެ.
