"މަސްވެރިންނަށް މިސަރުކާރުން ޖައްސާފައިވާ ހާލަތުގެ ހިތްދަތި ޝުއޫރުތައް ފާޅުކުރަން"
މަސްވެރިންނަށް މިސަރުކާރުން ޖައްސާފައިވާ ހާލަތުގެ ހިތްދަތި ޝުއޫރުތައް ފާޅުކުރައްވާ ކަމަށް ކުރީގެ ހައުސިން މިނިސްޓަރ ޑރ.މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވެފައިވަނީ މަސްވެރިން ކުރަމުން ގެންދާ އިހްތިޖާޖްގެ ހިތްދަތި މަންޒަރު ފެންނަ ފޮޓޯއަކާއެކު ޓްވީޓް ކުރަމުންނެވެ. ކަންނެލި މަސްވެރިކަން ކުރާ މަސްވެރިން ދަނީ ސަރުކާރުގެ ސަމާލުކަމަށް މަސްވެރިންގެ ދަތިތައް ގެންނަން މިއަދު ގުޅީފަޅުގައި 60 އަށްވުރެ ގިނަ މަސްދޯނި އަޅައިގެން އިހްތިޖާޖް ކުރަމުންނެވެ.
މިކަމާއި ގުޅިގެން މުއިއްޒު ކުރެއްވި ޓްވީޓެއްގައި ވަނީ މި ސަރުކާރުން މަސްވެރިން ނިކަމެތިކޮށް މަސްވެރިކަމުގެ ސިނާއަތު އިނދަޖައްސާލާފައިވާ ކަމަށްވެސް ވިދާޅުވެފައެވެ.
"މަސްވެރިންގެ ދުވަހު މަސްވެރިންނަށް މިސަރުކާރުން ޖައްސާފައިވާ ހާލަތުގެ ހިތްދަތި ޝުއޫރު ފާޅުކުރަން. މިނާގާބިލް ޒިންމާދާރުކަން ކުޑަ ސަރުކާރުން ވަނީ މަސްވެރިން ނިކަމެތިކޮށް މަސްވެރިކަމުގެ ސިނާއަތު އިނދަޖައްސާލާފަ" މުއިއްޒު ވިދާޅުވިއެވެ.
މިއަދު މަސްވެރިންގެ ދުވަސް ފާހަގަކުރަމުން ދާއިރު މަސްވެރިން ބާނާ މަސް ކިރުވަން ލަސްވުމާއި، ނުކިރިގެން މަސްތައް އުކާލަން ޖެހުމަކީ މިހާރު މަސްވެރިންގެ ޝަކުވާއެކެވެ. އަދި ވިއްކާ މަހަށް ސަރުކާރުގެ މަސް ކުންފުނި ކަމުގައިވާ މިފްކޯއިން ވަގުތުން ފައިސާ ނުދިނުމަކީ ވެސް މަސްވެރިކަމަށް ދިމާވެފައިވާ ބޮޑު ގޮންޖެހުމެކެވެ.
