ބޯޑަރު ހުޅުވި ފަހުން ރާއްޖެ އައި އެއްލައްކަވަނަ ފަތުރުވެރިޔާއަށް ހޫނު މަރުޙަބާއެއް ކިޔައިިފި
ބޯޑަރު ހުޅުވި ފަހުން ރާއްޖެ އައި އެއް ލައްކަ ވަނަ ފަތުތުވެރިޔާއަށް ހޫނު މަރުޙަބާ އެއް ކިޔައިިފިއެވެ.
ސްވިޓްޒަލޭންޑުން އައި އެ ފަތުރުވެރިޔާ މިއަދު ހެނދުނުގެ ވަގުތެއްގައި ރާއްޖެ
އައިސްފައިވާއިރު، ވެލާނާ އިންޓަނޭޝަނަލް އެއާޕޯޓުން ވަނީ އޭނާއަށް ހޫނު މަރުހަބާ އެއް ކިޔައިފައެވެ.
ބޯޑަރު ހުޅުވާލި މުއްދަތުގައި އެއްލައްކަ ވަނަ ފަތުރުވެރިޔާ ހަމަވެފައިވާ އިރު، 480،000 އަށް ވުރެ ގިނަ ފަތުރުވެރިން މި އަހަރުގެ މިހާތަނަށް ރާއްޖެ އައިސްފައި ވެއެވެ.
އަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމުތަކުގެ ތެރޭގައި ޗައިނާ، ޖަރުމަން، ފްރާންސް، އެމެރިކާ، ޖަޕާން އަދި ސްވިޒަލޭންޑް ހިމެނޭއެވެ. މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމާ ހަމައަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައި ވަނީ އިޓަލީވިލާތުންނެވެ.
ކޮވިޑް-19އާ ގުޅިގެން ބޯޑަރު ބަންދުކުރި ނަމަވެސް މި އަހަރަށް އަންދާޒާ ކޮށްފައިވާ އަދަދަށް ފަތުރުވެރިން ރާއްޖެ އައުން އެކަށީގެންވާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމު މީގެ ކުރިން ވަނީ ވިދާޅުވެފައެވެ.
ކޮވިޑް-19އާ ގުޅިގެން ބޯޑަރު ބަންދު ކުރުމަށްފަހު އަލުން ޖުލައި މަހު ހުޅުވާލި ފަހުން ފަތުރުވެރިން އައިސްފައިވާ މިންވަރުން އަހަރުު ނިމެންވާއިރަށް ޓޫރިޒަމްގެ ޓާގެޓަށް ކަނޑައަޅާފާއިވާ މިންވަރަށް ވުރެ އިތުރަށް ވެސް ފަތުރުވެރިން އަންނާނެ ކަމަށް ބެލެވޭ ކަމަށް މިނިސްޓަރ ވިދާޅުވެފައި ވެއެވެ.
